Yoane

¹2 Lumbu sambanu una ke kiayantikidi e Nduta ko, o Yesu wizidi kuna Betania, kuna kwakala Lazaro, ona kafula muna mafwa. 2 Banlambìdi o nlekelo,* Mareta ubasadidi kuna meza, kansi Lazaro mosi muna awana bedianga yandi vana meza. 3 I bosi, Maria obongele ndambu a kilo* kia mazi mansunga, nardu yambote, yantalu, okusidi mo muna malu ma Yesu, okungwini malu mandi muna nsuki zandi. E nzo izele ye nsunga za mazi. 4 Kansi, Yuda mwisi Kereote, wa nlongoki andi, ona okunyekola, ovovele vo: 5 “Ekuma tulembi tekela mazi mama mu 300 za denali yo vana zo kw’asukami?” 6 Ediadi kavovele, ke musia ko vo asukami katokanenanga, kansi mwivi, kadi wau kalundanga e nkel’a nzimbu, wayiyanga e nzimbu zasiwanga mo. 7 Yesu ovovele vo: “Nunyambula, kadi ovangidi wo muna kubika luziku lwame. 8 Kadi asukami nuna yau ntangwa zawonso, kansi omono ke nukala yame ntangwa zawonso ko.”

9 Ke kolo ko, ndong’ayingi ya Ayuda bazeye wo vo i kuna kena, bezidi, ke muna diambu dia Yesu kaka ko, kansi bamona mpe Lazaro ona kafudidi muna mafwa. 10 Nganga zambuta bavuende mfulu kimana bavonda mpe Lazaro, 11 kadi muna kuma kiandi, Ayuda ayingi bayendanga ko yo kwikila muna Yesu.

12 Muna lumbu kialanda, ndong’ayingi ina yayiza kuna lambu, bawidi wo vo Yesu mu kwiza kena kuna Yerusaleme. 13 Babongele ndala, bavaikidi, bele kunkika, bakazidi oku vo: “E Nzambi, tudodokele, umvuluza! Nkwa nsambu ndiona okwizilanga muna nkumbu a Yave wa Ntinu a Isaele!” 14 Una Yesu kasolwele swala dia buluku, ofongele dio, wauna wasonama vo: 15 “Kumoni wonga ko, e mwan’ankento a Zione. Tala! O ntinu aku okwizanga, ofongele vana mwan’a buluku.” 16 O mambu mama alongoki ke bavita mo bakula ko, kansi vava Yesu kakembeswa, basungamena vo mambu mama masonama mu kuma kiandi, i mau mpe bamvangidi.

17 E ndonga ina yakala yandi vava kabokela Lazaro muna ziami yo kumfula muna mafwa, basidi umbangi. 18 Muna diambu diadi mpe, ndonga bezidi kunkika kadi bawidi wo vo sinsu kiaki kavangidi. 19 Afarisi bavovazianene vo: “Se nutadi, ke nuna y’owu nuvanga ko. Tala, e nza yawonso yele anlandi.”

20 Vakedi Mingerekia miankaka vana ven’awana bezidi sambila kuna lambu. 21 Bezidi kwa Filipo wa mwisi Betesaida a Ngalili, bamvovese vo: “E Mfumu, tuzolele monana yo Yesu.” 22 Filipo wizidi samunwina Andere. Andere yo Filipo bezidi samunwina Yesu.

23 Kansi, Yesu ubavutwidi vo: “E ntangwa ifwene kimana o Mwan’a muntu kakembeswa. 24 Kieleka, kieleka, inusamunwini vo, e mbwaz’a disa, avo ilembele bwa muna ntoto yo fwa, imosi kaka ikala; kansi avo ifwidi, mbongo ayingi iwuta. 25 Konso ona ozolele o moyo andi fwasa kefwasa wo, konso ona omenga moyo andi omu nza yayi, lunda kelunda wo yamuna moyo a mvu ya mvu. 26 Avo muntu ozolele kunsadila, yambula kandanda, konso oku ngina, i kuna mpe kekala selo kiame. Avo muntu ozolele kunsadila, o S’ame okunzitisa. 27 O moyo ame utelamene, aweyi mvova? E Tata, umpuluza omu ntangwa yayi. Muna diambu diadi kaka i ndwakìdi omu ntangwa yayi. 28 E Tata, kembesa nkumbu aku.” Dianu vo, e ndinga itukidi kuna zulu, oku vo: “Nkembese yo kala, nkembesa yo diaka.”

29 E ndonga itelamene vo bawidi wo, bavovele vo, mbandanu utalumukini. Akaka bavovele vo: “Mbasi ovovele kwa yandi.” 30 Yesu ovutwidi vo: “E ndinga yayi ke izidi muna diambu diame ko, kansi muna diambu dieno. 31 Owau i mfundis’a nza yayi; owau se kevaikiswa kuna mbazi, o nyadi a nza yayi. 32 Omono vava imanikwa, itunta wantu a mpila zawonso oku ngina.” 33 Ovovele ediadi muna songa e mfwa ina kefwa. 34 I bosi, e ndonga imvutwidi vo: “Twawa muna Nsiku vo o Kristu ozinga kaka yakwele mvu. Aweyi ovovele vo, o Mwan’a muntu kafwete manikwa? Nani i Mwan’a muntu ndioyo?” 35 Yesu ubavovese vo: “O ntemo mu fikolo kaka ukala vovo nwina. Nukangala wau nwina yo ntemo, kimana nwalembi bukamwa e tombe; konso ona okangalelanga muna tombe, kuna kekwenda kazeye ko ko. 36 Ekolo nwina yo ntemo, nukwikila muna ntemo, kimana nwakituka wan’a ntemo.”

O Yesu wau kavovele mambu mama, okatukidi, ubaswekamene. 37 Kana una vo sinsu yayingi kavangidi vana bena, ke bakwikila muna yandi ko, 38 kimana mvovo mia Yesaya wa ngunza mialungana, ona wavova vo: “E Yave, aki nani bakwikidi mana bawidi kwa yeto? O koko kwa Yave kwa nani kusengomokene?” 39 Yesaya wayika diaka e kuma balembi kwikidila, vava kavova vo: 40 “Ovondele meso mau yo badisa ntima miau, kimana balembi mona muna meso yo bakula muna ntima miau, baviluka, omono yabawuka.” 41 Yesaya wavova mambu mama mu kuma kia Kristu kadi wamona nkembo andi. 42 Kana nkutu afidi a Ayuda, engi bakwikidi muna yandi, kansi muna diambu dia Afarisi i balembele kuntambulwila, kimana balembi yingwa muna sambilu; 43 kadi basundidi o zola nkembo a wantu, ke mu nkembo a Nzambi ko.

44 Dianu, Yesu ovovele mu nding’angolo, oku vo: “Konso ona okwikilanga omu mono, ke mu mono kaka ko kekwikilanga, kansi muna ndiona wantuma mpe; 45 konso ona umbwene, omwene mpe Ndiona wantuma. 46 Omono ngizìdi nze ntemo ova nza, kimana konso ona okwikilanga omu mono, kekala mu tombe ko. 47 Kansi, avo muntu owa mvovo miame yo lembi mio lunda, kikumfundisa ko; kadi kizidi fundisa nza ko, yavuluza kak’e nza. 48 Konso ona okumbembola yo lembi tambula mvovo miame, vena ye ndiona okumfundisa. E diambu dina mpovele, i diau dikumfundisa muna lumbu kiambaninu. 49 Kadi kivovele muna ngindu za mono kibeni ko, kansi, o Se ona wantuma, i yandi wampana nkanikinu mu kuma kia mana mvova yo longa. 50 Nzeye wo vo o nkanikinu andi i moyo a mvu ya mvu. Dianu vo mana mvovanga, wauna o Se kampovesela, i una mvovelanga mo.”