Lusengomono

12 I bosi, sinsu kianene kimonekene kuna zulu: Nkento ovuete ntangwa, o ngonde kuna nsi a tambi yandi, vana ntu andi vakedi ye kolowa kia ntetembwa 12, 2 vumu kakala kiau. Okazidi muna ndunza zandi, e nsongo mia wuta mimbakidi.

3 Sinsu kiankaka kimonekene kuna zulu. Tala! Ngobodi ampwena wambwaki una ye ntu nsambwadi ye mpaka kumi, ye banda* nsambwadi ya kimfumu vana ntu miandi; 4 e nkil’andi uvolele tini kiatatu kia ntetembwa za zulu, utubidi zo ova ntoto. E ngobodi itelamene vana ndose a nkento ofinamene wuta kimana vava kewuta, kavempola mwan’andi.

5 Owutidi mwan’a yakala, ona ovungula zula yawonso muna mvual’a sengwa. O mwan’andi ozavuinu* kuna kwa Nzambi yakuna kunda kiandi. 6 O nkento otinini kuna makanga, kuna kakubikilwa e fulu kwa Nzambi, i kûna bekundikila mu 1.260 ma lumbu.

7 Kukedi vita kuna zulu: Mikaele* ye mbasi zandi banwene ye ngobodi, o ngobodi ye mbasi zandi banwene, 8 kansi ke basundidi ko,* ngatu moneka diaka e fulu kiau kuna zulu. 9 Dianu vo, ngobodi anene ovetelo, nioka ankulu, ona oyikilwanga vo Nkadi ampemba ye Satana, ona ovukumunanga nza yawonso; ovetelo ova nza, e mbasi zandi zivetelo yandi kumosi. 10 Ngwidi nding’angolo kuna zulu, ivovele vo:

“Owau, o luvuluzu luizidi, ye nkuma, ye Kintinu kia Nzambi eto ye wisa kia Kuswa* kiandi, e kuma kadi o mfundi a mpangi zeto ovetelo, ona okubafundanga vana ndose a Nzambi eto, fuku yo mwini! 11 Bansundidi muna menga ma Mwan’a meme ye mu kuma kia diambu dia umbangi wau, ke bazolele mioyo* miau ko kana nkutu muna vonza kia lufwa. 12 Dianu vo, yangalala e zulu yo yeno nukalanga mo! Tâtu kwa nza ye kalunga, e kuma kadi Nkadi ampemba unukulumukini, makasi mayingi kena mau, wau kazeye wo vo kolo kiandwelo kaka kasidi kiau.”

13 Vava ngobodi kamwene vo ovetelo ova nza, obangikidi nkento ona owutidi mwan’a yakala. 14 Kansi, mave mole ma ngo-zulu ampwena maveno kwa nkento kimana katilumuka kuna makanga kuna fulu kiandi, kuna kedikilwa mu kolo kimosi, ye kolo yole ye ndambu a kolo, kavavuka vana ndose a nioka.

15 O nioka ovaikisi maza nze nkoko muna nu’andi kuna nim’a nkento kimana o nkoko wankukulwisa. 16 Kansi o ntoto usadisi o nkento, uziwidi nu’andi, uminini o nkoko una kavaikisi o ngobodi muna nu’andi. 17 O ngobodi ofungidi nkento makasi, wele nwanisa nsadisw’a mbongo andi, ana belundanga nkanikinu mia Nzambi, bena ye kiyekwa kia sia umbangi mu kuma kia Yesu.