Ntalu

15 Yave ovovese diaka Mose vo: 2 “Zayisa Aneyisaele vo: ‘Vava nukota muna nsi ina ikunuvana nuazingila mo+ 3 yo tambika ngombe yovo meme yovo nkombo se lukau kwa Yave lwayoka vana tiya—kiakala lukau lwa ngioka+ yovo kimenga kia sila nsilu a mfunu yovo lukau lwa mvevo+ yovo konso lukau nuvana muna nkinzi mieno muna nsungi+ yasikidiswa kimana lwakala se lekwa kia nsunga* kuna kwa Yave  + —​ 4 o muntu ona osunzula lukau lwandi, kafwete sunzula mpe kuna kwa Yave lukau lwa mbwaza lwa mfumfu yambote,+ tini kiakumi kia efa,* lwasangwa tini kiaya kia yini* kia mazi. 5 Ofwete vana mpe tini kiaya kia yini kia vinyu se lukau lwa ndua kumosi yo lukau lwa ngioka+ yovo mu kuma kia kimenga kia konso mwan’a meme a koko. 6 Mu kuma kia meme dia koko, ofwete vana tini yole muna tini kumi ya efa ya mfumfu yambote se lukau lwa mbwaza lwasangwa e tini kiatatu kia yini ya mazi. 7 Osunzula tini kiatatu kia yini kia vinyu se lukau lwa ndua, se lekwa kia nsunga* kuna kwa Yave.

8 “‘Kansi, avo ngombe a koko ovana se lukau lwa ngioka+ yovo kimenga muna sia nsilu a mfunu+ yovo yimenga ya ungudi kuna kwa Yave,+ 9 osunzula mpe kumosi ye ngombe a koko, tini tatu muna tini kumi ya efa se lukau lwa mbwaza+ lwa mfumfu yambote yasangwa o bula kati kwa yini ya mazi. 10 Ofwete sunzula mpe bula kati kwa yini ya vinyu se lukau lwa ndua,+ se lukau lwayoka vana tiya, se lekwa kia nsunga* kuna kwa Yave. 11 I diau difwete vangwa muna konso ngombe a koko yovo muna konso meme dia koko yovo muna konso mwan’a meme a koko yovo muna konso nkombo. 12 Konso lutangu nutambika, i wau wuwu nuvanga muna konso bulu, mun’owu wa lutangu lwau. 13 Konso Nyisaele a kingutukila i wau wuwu kesunzulwila lukau vana tiya, se lekwa kia nsunga* kuna kwa Yave.

14 “‘Avo nzenza ozinganga yeno yovo muntu okalanga ova kati kweno muna ulolo wa mbandu zeno ozolele mpe vana lukau lwayoka vana tiya, se lekwa kia nsunga* kuna kwa Yave, kafwete vanga wauna nuvanganga.+ 15 Oyeno nuina muna nkutakani yo nzenza ona ozinganga yeno, nkanikinu wau umosi nukala wau. Owau ukala se nkanikinu a mvu ke mvu muna mbandu zeno zawonso. O nzenza ozinganga yeno okala nga yeno vana ndose a Yave.+ 16 Vekala yo nsiku umosi ye nzengo zimosi za mfundisa mu kuma kieno ye mu kuma kia nzenza ona ozinganga yeno.’”

17 Yave ovovese Mose vo: 18 “Zayisa Aneyisaele vo: ‘Vava nukota muna nsi ina ikununata 19 yo dia konso madia ma* nsi,+ nufwete vana lukau kwa Yave. 20 Nufwete vana lukau lwa mbolo zina nga nlunga zavangilwa muna nseka zeno za mbwaza zantete.+ Nuvana lukau lolo wauna nuvaninanga lukau lwa bundilu. 21 Muna mbandu zeno zawonso, nufwete vana ndambu a nseka zeno za mbwaza zantete se lukau kwa Yave.

22 “‘Avo nuvangidi vilwa yo yambula lemvokela e nkanikinu miami miawonso mina Yave kazayisa kwa Mose, 23 mawonso mana Yave kanukanikina muna Mose, tuka muna lumbu kina Yave kanuvana e nkanikinu yamuna mbandu zeno zilanda, 24 avo vilwa wowo ku bubu uvangamene ye o nkangu ke ubakwidi wo ko vo vilwa uvangidi, o nkangu wawonso ufwete tambika mwan’a ngombe se lukau lwayoka, se lekwa kia nsunga* kuna kwa Yave, kumosi yo lukau lwandi lwa mbwaza yo lukau lwandi lwa ndua wauna wasikidiswa+ yo mwan’a nkombo se lukau lwa sumu.+ 25 O nganga olomba luyambulwilu lwa masumu mu kuma kia nkangu awonso a Isaele, oyau belolokwa.+ Kadi vilwa kwandi, batwese lukau lwau, i sia vo, lukau kwa Yave lwayoka vana tiya yo lukau lwa sumu vana ndose a Yave, mu kuma kia vilwa wau. 26 O nkangu awonso a Isaele yo nzenza ona ozingilanga vana kati kwau belolokwa, kadi owau vilwa wa nkangu awonso.

27 “‘Avo muntu* osumukini lembi wo kana, kafwete sunzula nkombo ankento wa mvu mosi se lukau lwa sumu.+ 28 O nganga olomba luyambulwilu lwa masumu mu kuma kia muntu ovangidi e mbi, wau kasumukini vana ndose a Yave lembi wo kana, olomba luyambulwilu lwa sumu, e sumu dikunlolokwa.+ 29 Avo muntu ovangidi diambu lembi wo kana,+ kiakala mungutukila vana vena Aneyisaele yovo nzenza ona ozingilanga vana kati kwau, nsiku wau mosi kaka nufwete sadila.

30 “‘Kansi, avo muntu ovangidi diambu mu lukanu,+ kiakala mungutukila yovo nzenza, Yave katiangwini, kafwete vondwa vana vena nkangu andi. 31 Kadi diambu dia Yave kavezele yo kulula nkanikinu andi, o muntu ndioyo kafwete vondwa kikilu.+ Otumbwa mu kuma kia bi wandi.’”+

32 Ekolo Aneyisaele bakala muna makanga, basolwele muntu mosi watiamanga e nkuni muna Lumbu kia Vundu.+ 33 Awana bansolwele ekolo ketiamanga e nkuni, bantwese kwa Mose yo Arone ye kwa nkangu awonso. 34 Bankangididi,+ kadi muna nsiku ke diasikidiswa ko dina kafwete vangwa.

35 Yave ovovese Mose vo: “O muntu ndioyo kafwete vondwa kikilu,+ o nkangu awonso ufwete kuntuba matadi kuna mbazi a ndo.”+ 36 Muna kuma kiaki, o nkangu awonso unete kuna mbazi a ndo yo kuntuba matadi, ofwidi, wauna Yave kakanikina Mose.

37 Yave ovovese Mose vo: 38 “Zayisa Aneyisaele vo bafwete sia nsele muna nswiku a mvuatu miau, muna mbandu zau zawonso, bafwete sia nsing’a bule vana ntandu a nsele zina muna nswiku.+ 39 ‘Nufwete kala ye nsele zazi muna nswiku mia mvuatu kimana vava numona mio nuasungamena e nkanikinu miawonso mia Yave yo lemvokela mio.+ Ke nufwete landa ntima mieno yo meso meno ko, oma mekunufilanga mu kondwa e kwikizi muna mono.*+ 40 Ediadi dikunusadisa mu sungamena e nkanikinu miame miawonso, oyeno nulemvokela mio yo kala nuavauka kwa Nzambi eno.+ 41 Mono i Yave wa Nzambi eno, ona wanuvaikisa muna nsi ya Engipito, kimana yakala Nzambi eno.+ Mono i Yave wa Nzambi eno.’”+