Mavangu

²⁶ Angeripa ovovese Paulu vo: “Oveno nswa kimana wakivovela.” I bosi, Paulu olambwidi koko, ovovele vo:

2 “E Ntinu Angeripa, o unu ngina ye kiese kia kuyivovela ova ndose aku muna mambu mawonso yafundilu kwa Ayuda, 3 musungula wau otomene zaya e fu ye mawonso mana Ayuda befilanenang’e mpaka. Dianu idodokele vo kala ye luzindalalu muna kungwa.

4 “Kieleka, tuka kileke kiame, e mpila zingu kiame vana vena nkangu ame* ye muna Yerusaleme, kitomene zayakana kwa Ayuda awonso, 5 ana banzeye tuka kolo, avo bazolele sia kimbangi, bazeye wo vo Mfarisi yakala, yatoma landanga malongi ma nsambila eto. 6 Kansi owau, ifundiswanga mu kuma kia vuvu kiame muna nsilu una Nzambi kasila mase meto; 7 e ndungan’a nsilu wau, i yau mpe bevingilanga makanda meto 12, wau bekunsadilanga e salu kiavauka, fuku ye mwini. E Ntinu, muna vuvu kiaki i mfundilu kwa Ayuda.

8 “Ekuma nulembi kwikidila vovo nwina vo Nzambi ofulanga mafwa? 9 Mono kibeni yamona vo mfwete vanga mawonso mu telamena e nkumbu a Yesu, wa mwisi Nazarete. 10 I wau yavanga muna Yerusaleme, aveledi ayingi yazikidila muna pelezo, wau yatambula e wisa kwa nganga zambuta; vava diavavanga vo bavondwa, yatambulwilanga wo. 11 Nkumbu miayingi yabawanda muna masambilu mawonso, yavava kubakomekena babembola lukwikilu lwau; wau vo makasi kikilu yabamwenanga, yaluaka mu tezo kia kubabangika muna mavata mankaka.

12 “Wau yayendanga kuna Damaseke ye kani diadi muna wisa ye lutumu lwa nganga zambuta, 13 e Ntinu, muna ola ya 12, yamona muna nzila ntemo utukidi kuna zulu, usundidi kezima kwa ntangwa, untemène y’awana bakangalanga yame. 14 Vava yeto awonso twabwa vana ntoto, ngwidi e ndinga impovesele muna Kiyibere, oku vo: ‘E Saulu, e Saulu, ekuma okumbangikilanga? Diampasi kwa ngeye wau owandanga kinsi kuna ntu a mpalu.’* 15 Kansi, yayuvula vo: ‘U nani e Mfumu e?’ O Mfumu ovutwidi vo: ‘Mono i Yesu ona obangikanga. 16 Kansi, vumbuka, telama. Mbonekene kwa ngeye kimana yasola se selo ye mbangi ame muna mambu mana omwene ye mana ikusonga mu kuma kiame. 17 Ikuvuluza vana moko ma nkangu wau ye kwa zula ina ikutuma, 18 watemona meso mau, bakatuka muna tombe beza mu ntemo, bakatuka muna wisa kia Satana beza kwa Nzambi, kimana balolokwa masumu yo tambula evua kumosi y’awana baveleleswa muna lukwikilu lwau omu mono.’

19 “Dianu vo, e Ntinu Angeripa, kiakolamena mona-meso kia zulu ko, 20 kansi entete yayenda kw’awana muna Damaseke, i bosi muna Yerusaleme ye muna mvivu wawonso wa Yuda ye kuna kwa zula mpe, yabasamunwini vo baviluk’o ntima, baviluka kwa Nzambi yo songa mavangu ma luviluku lwa ntima. 21 Ekiaki i kuma Ayuda bambakila muna tempelo yo vava kumponda. 22 Kansi, wau yatambula lusadisu lwa Nzambi, yamu lumbu kiaki ikwamanananga sila umbangi kwa asakaladi ye akwa tunda, kivovele mambu mankaka ko, mana kaka basakula Angunza yo Mose vo vangama mevangama— 23 i sia vo, Kristu omona e mpasi, i wantete mpe ofulwa muna mafwa, osamuna o ntemo kwa nkangu wau ye kwa esi zula.”*

24 Wau Paulu kavovelenge mambu mama muna kuyitanina, Feseto ovovele muna nding’angolo vo: “E Paulu, olaukidi! Zayi wayingi ulaukisi!” 25 Paulu ovovele vo: “Kilaukidi ko, e Mfumu Feseto, kansi mambu maludi ye lulungalalu mpovele. 26 Kieleka, ngina ye unkabu wamokena yo ntinu kadi otomene zaya mambu mama mawonso; ngina ye ziku vo ke vena diambu ko muna mambu mama olembele zaya, kadi mambu mama ke mavangamena ku sweki ko. 27 E Ntinu Angeripa, nga okwikilanga Angunz’e? Nzeye wo vo okwikilanga.” 28 Kansi, Angeripa ovovese Paulu vo: “Muna kolo kiakete nga unkwikidisi yakituka se Nkristu.” 29 Muna diadi Paulu ovovele vo: “Nsambidi kwa Nzambi vo kana mu kolo kiakete yovo kiayingi, ke ngeye kaka ko, kansi awonso bangwidi o unu bakituka owu ngina, katula kaka tuvambu twatu.”

30 O ntinu otelamene kumosi yo nguvulu yo Beniki ye awana bavuende yau. 31 Kansi wau se bekatuka, bayantikidi vovaziana vo: “Muntu ndioyu kavangidi kwandi diambu ko dimfwanukini tumbu kia lufwa yovo pelezo.” 32 I bosi, Angeripa ovovese Feseto vo: “Muntu ndioyu wadi yambulwa kele vo kakilombela ko vo kafundiswa kwa Kaisa.”