Ntalu

10 I bosi, Yave ovovese Mose vo: 2 “Uyivangila mpungi zole;+ vangila zo mu palata yatutilwa mu malutelo yo sadila zo mu bokela o nkangu yo vanga e sinsu kimana e ndo zalondoka. 3 Avo mpungi zau zole zisikilu, nkangu awonso ulungalakana oku wina kuna mwelo a saba kia wananina.+ 4 Kansi, avo mpungi mosi kaka isikilu, amfumu kaka, i sia vo, ntu mia mafunda ma Isaele kaka belungalakana oku wina.+

5 “Avo nusikidi e mpungi muna zú dia zakama, e ndo z’awana bena kuna este+ zilondoka. 6 Avo nusikidi e mpungi muna zú dia zakama mu nkumbu azole, e ndo z’awana bena kuna sude+ zilondoka. I wau wuwu besikila e mpungi konso ntangwa kilondoka ndo imosi.

7 “Muna bokela o nkangu walungana, nufwete sika e mpungi zau zole,+ kansi ke mu zú dia zakama ko. 8 O wan’a Arone, anganga, i besika e mpungi,+ o sadila e mpungi dikala se nkanikinu a mvu ke mvu muna mbandu zeno zawonso.

9 “Avo se nunuana e vita muna nsi eno yo mbeni ona okunubangikanga, nufwete vaikisa zú dia vita muna mpungi,+ o Yave wa Nzambi eno okunusungamena yo kunuvuluza vana moko ma mbeni zeno.

10 “Vana ntandu, muna nsungi zeno za nkembo+—muna nkinzi mieno+ ye muna lubantiku lwa ngonde zeno—nufwete sika e mpungi vana vena tukau tweno twangioka+ ye yimenga yeno ya ungudi;+ tukau twatu tukala se luyindulu mu kuma kieno vana ntadisi a Nzambi eno. Mono i Yave wa Nzambi eno.”+

11 Muna mvu wanzole, muna ngonde yanzole, muna lumbu kia 20 kia ngonde,+ e tuti dikatukidi vana ntandu a saba+ kia Kimbangi. 12 Muna kuma kiaki, Aneyisaele bayantikidi londoka tuka muna makanga ma Sinai mun’owu wa nkubika yasikidiswa ya ngialuka zau,+ e tuti diningamene muna makanga ma Parani.+ 13 Owau i nkumbu antete wayaluka o nkangu mun’owu wa nkanikinu a Yave muna Mose.+

14 Muna diadi, e buka kia makanda tatu kia ndo ya wan’a Yuda, i kiau kiantete kialondoka mun’owu wa buka yau,* o Nakesone+ wa mwan’a Aminadabi yandi wavitanga o ntu muna buka kiaki. 15 O Netanele+ wa mwan’a Suare, yandi wavitanga o ntu muna buka kia kanda dia wan’a Yisakare. 16 O Eliabe+ wa mwan’a Kelone, yandi wavitanga o ntu muna buka kia kanda dia wan’a Zebulune.

17 Vava e saba kiayalulwa,+ o wan’a Ngeresone+ yo wan’a Merare+ ana banatanga e saba, balondokele.

18 I bosi, e buka kia makanda tatu kia ndo ya Rubeni balondokele mun’owu wa buka yau,* o Elisu+ wa mwan’a Sedeu yandi wavitanga o ntu muna buka kiaki. 19 O Selumiele+ wa mwan’a Surisadai, yandi wavitanga o ntu muna buku kia kanda dia wan’a Simeone. 20 O Eleyasafe+ wa mwan’a Dewele, yandi wavitanga o ntu muna buka kia kanda dia wan’a Ngadi.

21 I bosi, Anekoate ana banatanga e salanganu ya nzo avauka,+ balondokele. E saba kiatelameswanga vitila balwaka.

22 I bosi, e buka kia makanda tatu kia ndo ya wan’a Eferaime kilondokele mun’owu wa buka yau,* o Elisama+ wa mwan’a Amiudi yandi wavitanga o ntu muna buka kiaki. 23 O Ngamaliele+ wa mwan’a Pedasu, yandi wavitanga o ntu muna buka kia kanda dia wan’a Manase. 24 O Abidani+ wa mwan’a Ngidoni, yandi wavitanga o ntu muna buka kia kanda dia wan’a Benyamini.

25 I bosi, e buka kia makanda tatu kia ndo ya wan’a Dani kilondokele mun’owu wa buka yau,* yau bakala kuna nima se akengedi a ndo zawonso, o Akieze+ wa mwan’a Amisadai yandi wavitanga o ntu muna buka kiaki. 26 O Pangiele+ wa mwan’a Okerane, yandi wavitanga o ntu muna buka kia kanda dia wan’a Asere. 27 O Akira+ wa mwan’a Enane, yandi wavitanga o ntu muna buka kia kanda dia wan’a Nafetali. 28 I wau wuwu balandanenanga Aneyisaele ye buka yau* vava balondokanga.+

29 I bosi, Mose ovovese Kobabe wa mwan’a Ruele*+ wa musi Midiani, wa kô wandi vo: “Se tukwenda kuna fulu kina Yave kavova vo: ‘Ikunuvana kio.’+ Wenda yeto,+ mambu mambote tukuvanga, kadi o Yave mambu mambote kasila o nsilu kwa Isaele.”+ 30 Kansi, oyandi ovovese Mose vo: “Kikwenda ko. Vutuka ivutuka kuna nsi ame, kuna kwa yitu yame.” 31 Muna diadi, Mose umvovese vo: “Dodokolo kutusisi ko, kadi ongeye otomene zaya vana tufwete sikidisila e ndo muna makanga, olenda kala se mfidi eto.* 32 Avo wele yeto,+ konso wete kekutusonga o Yave, oyeto mpe tukusonga wo.”

33 Muna diadi, bakatukidi kuna mongo a Yave+ bayantikidi o nkangalu a lumbu tatu, e nkel’a+ kangu dia Yave ikedi kuna ntwal’au muna lumbu tatu ya nkangalu muna kubavavila e fulu balenda vundila.+ 34 E tuti dia Yave+ dikedi vana ntandu au muna mwini, vava bakatukidi vana basikidisila e ndo.

35 Konso ntangwa e Nkela yalondokanga, Mose wavovanga vo: “Telama, e Yave,+ yambula e mbeni zaku zamwangana, yambula awana bekumenganga batina vana ndose aku.” 36 Vava e Nkela yaningamanga, Mose wavovanga vo: “Vutuka, e Yave, kuna kwa mafunda ye mafunda ma Isaele+ malembi tangakana.”*