Lusengomono

7 I bosi, mbwene mbasi yá zitelamene muna konko yá ya nza, zisimbinini e tembwa yá ya nza kimana valembi vekomoka tembwa ova nza yovo muna kalunga ngatu muna konso nti. 2 Mbwene mbasi yankaka itombokele kuna kuvaikilanga ntangwa,* ina ye dimbu kia Nzambi amoyo; ibokele muna nding’angolo kwa mbasi zau yá zina zavewa o nswa wafwasa e nza ye kalunga, 3 oku vo: “Ke nuvangi e nza diambu ko yovo kalunga ngatu nti, yavana tusia ntaudi za Nzambi eto e dimbu vana ndose zau.”

4 Ngwidi lutangu lwa awana basiwa e dimbu, 144.000, basiwa e dimbu muna makanda mawonso ma wan’a Isaele:

5 Muna kanda dia Yuda 12.000 basiwa e dimbu;

9 I bosi, mbwene ndong’ayingi ina ke ilendi tangakana kwa muntu ko, batukidi muna zula yawonso ye makanda ye nkangu ye ndinga, batelamene vana ndose a kunda ye vana ndose a Mwan’a meme, bavuete mvuatu miampembe; bena ye ndala vana moko mau. 10 Bekazanga muna nding’angolo, oku vo: “Luvuluzu lutukidi kwa Nzambi eto ona ovuende ova kunda ye kwa Mwan’a meme.”

11 Mbasi zawonso zitelamene muna nzunguluk’a kunda ye akuluntu ye vangwa yá yamoyo, babukikidi tuse twau vana ndose a kunda, bakundidi Nzambi, 12 bavovele vo: “Amen! Lusanisinu yo nkembo ye ngangu yo matondo yo zitu ye nkuma ye ngolo kuna kwa Nzambi eto yamu mvu ya mvu. Amen.”

13 Mosi muna akuluntu umpovese vo: “Aki nani awaya bavuete mvuatu miampembe, akweyi batukidi?” 14 Vana vau imvovese vo: “E Mfumu ame, ngeye ozeye.” Umpovese vo: “Awaya i yau batukidi muna mpasi zayingi, basukwidi e mvuatu miau yo pembesela mio muna menga ma Mwan’a meme. 15 I kuma benena vana ndose a kunda kia Nzambi, bekunsadilanga salu kiavauka fuku yo mwini muna tempelo andi; Ndiona ovuende vana kunda okubayalumwina e saba kiandi. 16 Ke bemona diaka nzala ko yovo vuina, ke bebangikwa kwa mwini ko ngatu kwa mbangazi, 17 kadi o Mwan’a meme, ona una vana kati kwa kunda okubavungula yo kubafila kuna nto za maza ma moyo. Nzambi okunguna mansanga mawonso muna meso mau.”