Maku

4 Oyantikidi diaka longa vana ndambu a mbu, ndong’ayingi ilungalakene vana kena. Okotele muna nzaza, ofongele, kansi ndonga yawonso ikedi vana kumu. 2 Ubalongele mambu mayingi muna yingana, una kabalongelenge, ubavovese vo: 3 “Nuwá. O nkuni wele kuna e mbongo. 4 Wau kakunininge, e mbongo yankaka ibwidi vana mbel’a nzila, e nuni zizidi, zididi yo. 5 Yankaka ibwidi vana matadi, ke vena ntoto wayingi ko, imenene-menene wau vo ntoto ke wasina ko. 6 Kansi vava mwini uvaikidi, ilengele yo zina, kadi ke ina ye mianzi ko. 7 E mbongo yankaka ibwidi vana vena nsende, e nsende zimenene, zifinangese yo, ke iyimini mbongo ko. 8 Kansi, yankaka ibwidi vana ntoto ambote, imenene yo nungunuka, iyimini e mbongo, makumatatu-makumatatu, makumasambanu-makumasambanu ye nkama-nkama.” 9 I bosi ovovele vo: “Ndiona una ye matu manwe, yambula kawa.”

10 E ndonga vava yayenda, alongoki ana basala kumosi ye yau Kumi ye Zole bayantikidi kunyuvula oma ma yingana. 11 Ubavovese vo: “Kwa yeno diveno edi dia bakula mbumb’avauka ya Kintinu kia Nzambi, kansi kw’awana bena kuna mbazi, mawonso muna yingana mena, 12 kadi kana una vo betalanga, yau ke bamoni, kana una vo bewanga, yau ke babakudi; ngatu viluka yo lolokwa.” 13 Ubavovese diaka vo: “Ke nubakwidi kingana kiaki ko e? Ozevo, aweyi nubakulwila yingana yankaka?

14 “O nkuni diambu kakunini. 15 Ankaka bena nze mbongo ibwidi vana mbel’a nzila; kansi una bawidi kaka e diambu, o Satana wizidi yo katul’e diambu dikuninu muna yau. 16 Ankaka mpe bena nze ina ikuninu vana vena matadi; una bawidi kaka e diambu, batambulwidi dio kuna kiese. 17 Kansi, wau vo ke bena ye mianzi ko, kolo kiandwelo kaka bezingila; vava kizidi kaka e mpasi yovo lubangamu mu kuma kia diambu, batel’e sakuba. 18 Vena mpe ye ankaka bena nze ina ikuninu vana vena nsende. I yau yana bawidi e diambu, 19 o ntelamw’a moyo mu kuma kia tandu* kiaki ye tima dia vuama* ye maketo mawonso mafinangesa e diambu yo lembi yima e mbongo. 20 Ina ikuninu vana ntoto ambote, i yau yana bawidi e diambu, batambulwidi dio yo yima e mbongo, makumatatu-makumatatu, makumasambanu-makumasambanu ye nkama-nkama.”

21 Ubavovese diaka vo: “E mini nga kuna nsi a mbangu* yovo kuna nsi a mfulu kisiwanga e? Ke kisiwanga vana fulu kiazanguka ko e? 22 Kadi ke vena diambu ko diaswekama dilembi sengomoka; ke vena diambu ko diatoma swekama dilembi zayakana. 23 Konso ona una ye matu manwe, yambula kawa.”

24 Ubavovese diaka vo: “Nutoma tala mana nuwanga. Muna nzongo una nuzongela i nuzongelwa, yayingi mpe nukudikilwa. 25 Kadi konso ona una ye má, yayingi kevewa, kansi konso ona kena ye má ko, kana nkutu kina kena kiau, katulwa kikunkatulwa.”

26 Ovovele vo: “E Kintinu kia Nzambi kina nze muntu omwenge mbongo vana ntoto. 27 Olele yo sikama, fuku yo mwini, e mbongo imenene yo kula—e mbena imenene kazeye yo ko. 28 O ntoto malembe-malembe uyimanga e mbongo, entete lulembe, i bosi disa, kuna kulanda, e mbwaza zikudidi muna disa. 29 Kansi avo mbongo ibweke, vana vau obongele sakilwa, kadi e nsungi a nkutika ifwene.”

30 Ovovele diaka vo: “Nki tulenda tezanesa ye Kintinu kia Nzambi? Yovo, nkia kingana tulenda tá muna sasila kio? 31 Kina nze disu dia mutade,* dina vo wau dikuninu muna ntoto, dilutanga keva vana vena mbongo yawonso in’ova nza. 32 Kansi avo dikuninu yo mena, dikitukidi se nene vana vena e mvûdi yawonso ya mpat’a nsengo yo vaikisa tayi yampwena, e nuni za zulu zilenda vundila kuna nsi a viozi kiandi.”

33 Muna yingana yayingi ina wau i kabalongel’e diambu, muna tezo kina balenda bakulwila. 34 Kieleka, kasidi kubalonga diambu ko kondwa kingana, kansi osasidi mawonso kw’alongoki andi vana va yau kaka.

35 Muna lumbu kiakina, una kuma se kufwa, ubavovese vo: “Tusauka kweto kuna simu.” 36 Una basindikidi e ndonga, bakotele muna nzaza ina kakala, vakedi mpe nzaza zakaka. 37 Tembwa kiangolo kinikukini, mavuku mayantikidi kota muna nzaza, yavana e nzaza yayantik’o zala yo maza. 38 Kansi oyandi kuna konko kakedi, waleka vana mfika. Bansikamese, bamvovese vo: “E Nlongi, nga okutuyambula twafw’e?” 39 Vava kasikamene, otumbidi e tembwa, yo voves’o mbu vo: “Dingalala! Kal’e pi-i!” E tembwa kidingalele, vakedi kikilu e pi-i. 40 Ubavovese vo: “Ekuma nwinina yo wonga? Yamu wau ke nwina ye lukwikilu ko e?” 41 Bamwene kikilu o wonga, bavovazianene vo: “Ondioyu ozevo nani? E tembwa ye mbu nkutu unlemvokele.”