Matai

24 Una Yesu kevaikanga muna tempelo, alongoki andi bezidi kwa yandi bansonga o lûmbu lwa tempelo. 2 Ubavutwidi vo: “Nga numwene e lekwa yayi yawonso e? Kieleka inuvovese vo, ke vesala tadi va ntandu tadi ko ovava, dina dilembi kunkumunwa.”

3 Una kavuende vana Mongo a Olive, alongoki bezidi kwa yandi vana va yau kaka, banyuvuidi vo: “Utuzayisa, nkia ntangwa mekala e mambu mama? Nki i sinsu kia ngiz’aku* ye mbaninu a tandu?”*

4 O Yesu ubavutwidi vo: “Nutoma kuyikenga valembi kala muntu okunuvukumuna, 5 kadi ayingi bekwizila muna nkumbu ame yo vova vo, ‘Mono i Kristu,’ yo vukumuna wantu ayingi. 6 Nuwá vita ye nsangu za vita. Nuyikenga nwalembi telamwa mioyo, kadi mambu mama mafwete vangama, vo i mbaninu* ke yayizidi ntete ko.

7 “Kadi zula kitelamena zula, kintinu kitelamena kintinu, mukala mvengele ye nzakama za ntoto muna zunga eki ye kiankaka. 8 Omama mawonso i lubantiku lwa nsongo.

9 “I bosi, wantu bekunumwesa e mpasi yo kunuvonda, numengwa kwa zula yawonso mu kuma kia nkumbu ame. 10 Ayingi mpe beta e sakuba yo yekoziana yo mengana. 11 Ngunza zayingi zaluvunu zibundumuka yo vukumuna wantu ayingi; 12 muna kuma kia wokela kwa umpumbulu, o zola kwa wantu ayingi kuvola. 13 Kansi, ndiona ozindalala yakuna mbaninu,* yandi ovuluzwa. 14 E nsangu zazi zambote za Kintinu zisamunwa mu nza yawonso muna umbangi kwa zula yawonso, i bosi ikwiza e mbaninu.*

15 “Kansi, vava numona má kiangemi, kiamfwasi, kina kayika Daniele wa ngunza, kitelamene vana fulu kiavauka, (o ntangi, yambula kasadila umbakuzi), 16 ana bena muna Yuda yambula batinina muna miongo. 17 Ndiona una vana nludi a nzo kakulumuki ko mu kwenda bonga e má ina muna nzo andi, 18 ndiona una kuna mpatu kavutuki ko kenda bonga e kinkutu kiandi. 19 Tâtu kwa akento bayimita y’awana beyemeka muna lumbu yayina! 20 Nusambanga kimana e ntin’eno yalembi kala mu nsungi a sivu* ngatu mu lumbu kia Vundu; 21 kadi mukala mpasi zayingi zina ke zateka kala ko tuka kuna semo dia nza yamu wau, ke zikala diaka ko. 22 Dianu vo, e lumbu yayina kele vo ke yakufikwa ko, ke vadi vuluka nkutu muntu ko; kansi mu kuma ki’awana basolwa, e lumbu yayina ikufikwa.

23 “Avo muntu unuvovese vo, ‘Tala! O Kristu una vava,’ yovo ‘Kûna i kena!’ ke nukwikila wo ko. 24 Kadi Kristu zaluvunu ye ngunza zaluvunu zibundumuka yo vanga sinsu yanene ye masivi, bevukumuna kana nkutu awana basolwa, avo dilendakana. 25 Ntekele kunulukisa. 26 Kansi, avo wantu banuvovese vo, ‘Kuna makanga kena,’ ke nwendi ko ko; ‘Muna suku kena,’ ke nukwikila wo ko. 27 Kadi nze una o ntemo uvaikilanga kuna este yo luaka kuna weste, i una mpe ukala e ngiz’a* Mwan’a muntu. 28 Konso kuna kwina e fwila, e mbemba i kuna zilungalakena.

29 “Vava kifokoka kaka e mpasi za lumbu yayina, o ntangwa obukama e tombe, e ngonde ke ivana diaka miezi ko, e ntetembwa zibetomoka tuka kuna zulu, ye ngolo za zulu zinikunwa. 30 I bosi, e sinsu kia Mwan’a muntu kimoneka kuna zulu, makanda mawonso ma nza mebunda e tulu mu kuma kia ntantu, bemona Mwan’a muntu okwizila muna matuti mazulu ye nkuma yo nkembo ayingi. 31 Otuma mbasi zandi ye zú diangolo dia mpungi balungalakesa awana basolwa muna konko* yau yá ya nza, tuka kuna nsuk’a zulu ye kuna yaka e nsuka.

32 “Ozevo, nulongoka e kingana eki muna nsanda: Avo tayi yandi isavukidi makaya, nuzeye wo vo nsungi a mvula ifinamene. 33 Diau dimosi mpe, oyeno avo numwene mambu mama mawonso, nuzaya wo vo Mwan’a muntu va mwelo se kena. 34 Kieleka, inuvovese vo, e mbandu yayi ke ikuviokela nkutu ko yavana mambu mama mawonso mevangama. 35 E zulu ye nza vioka ivioka, kansi mambu mame ke mevioka nkutu ko.

36 “Mu kuma kia lumbu kiakina ye ola, ke vena muntu ko ozeye kio, kana nkutu mbasi za zulu yovo Mwana, kansi Se kaka. 37 Kadi wauna wakala muna lumbu ya Noa, i una mpe ukala muna ngiz’a* Mwan’a muntu. 38 Kadi nze una wakala muna lumbu yayina, ina yavitila e Kizalu, badianga, banuanga, akala basompanga, akento basompeswanga, yamuna lumbu kiakota Noa muna nzaza, 39 ke basia sungididi ko yavana Kizalu kiayiza, kiabakukulwisa yau awonso, i una mpe ukala muna ngiz’a Mwan’a muntu. 40 Wantu wole bekala muna mpatu; mosi obongwa, wankaka obembolwa. 41 Akento wole betuta vana su; mosi obongwa, wankaka obembolwa. 42 Dianu vo, nuyingila, kadi ke nuzeye kio ko e lumbu kikwiza o Mfumu eno.

43 “Nuzaya diambu edi: Kele vo mfumu a nzo kayizayila e ola ikwiza o mwivi muna fuku, yingila kadi yingila, ke mu yambula ko vo e nzo andi yabangulwa. 44 Muna diadi, oyeno mpe nukubama, kadi o Mwan’a muntu okwiza muna ola ina nulembi yindula.

45 “Nani kieleka i ntaudi akwikizi yo lulungalalu* ona wavewa kiyekwa kwa mfumu andi kia lunga-lunga selo ya nzo andi, kabavana madia muna ntangwa ifwene? 46 Nkwa nsambu e ntaudi ina iwanuka kwa mfumu andi vo iwau ivanganga! 47 Kieleka inuvovese wo vo, okumvana kiyekwa kia lunga-lunga salanganu yandi yawonso.

48 “Kansi avo ntaudi ambi ovovele muna ntim’andi vo, ‘O mfumu ame zingila kezingila,’ 49 kayantika wanda akw’andi ntaudi yo dia yo nua vamosi ye akwa nkolwa, 50 o mfumu a ntaudi yayina okwiza muna lumbu kina ntaudi kalembi kumvingila ye muna ola kalembi zaya, 51 okuntumba tumbu kiangolo* yo kumvana e fulu kiandi vana vena akwa kivunina. I kuna kedidila yo kwetesa meno.