Maku

6 Okatukidi ko, wele kuna zunga kiandi, alongoki andi banlende. 2 Vava lumbu kia Vundu kialuaka, oyantikidi longa muna sambilu, ayingi mun’awana banwidi basivikidi yo vova vo: “Ondioyu akweyi kebakilanga mambu mama? Ekuma kavaninwa ngangu zazi yo mavangu mama mankuma mavangamene muna moko mandi? 3 Ke yandi ko i mvadi a nti, wa mwan’a Maria ye mpangi a Yakobo, Yosefe, Yuda yo Simone? E nsanga zandi, ke bena yeto ko e?” Batele sakuba mu kuma kiandi. 4 Kansi, Yesu ubavovese vo: “O ngunza ke zitiswanga ko muna zunga kiandi, kwa yitu yandi ye muna nzo andi.” 5 Dianu vo, kasidi mo vangila mavangu mankuma ko, nanga mbevo zakete kaka katenseka moko yo kubawuka. 6 Osivikidi kikilu mu kuma kia kondwa kwau kwa lukwikilu. Wele zieti muna mavata ma zunga, wele longinge.

7 Obokele yau Kumi ye Zole, ubatumini nwole-nwole, ubavene wisa muna mianda mia usafu. 8 Ubakanikini mpe vo ke banati má ko muna nkangalu, nanga nkau kaka—ke banati mbolo ko, yovo kifunda, ngatu nzimbu* muna mponda zau— 9 ke banati yinkutu yole* ko, kansi bavuata kaka nsampatu. 10 Ubavovese vo: “Konso nzo nukota, nukala mûna yavana nuvaika muna fulu kiokio. 11 Konso zunga kilembi kunutambula yovo kunuwa, vava nukatuka mo, nukubula e mbundukutu muna tambi yeno muna umbangi kwa yau.” 12 I bosi, bele yo longa vo wantu baviluk’o ntima, 13 bavaikisi nkuya miayingi yo kusa mazi muna mbevo zayingi yo kubawuka.

14 Erodi wa Ntinu owidi wo, kadi wantu muna fulu yawonso nkumbu a Yesu kaka bamokenenanga, bavovele vo: “Yoane wa Mvubi ofulukidi muna mafwa, i kuma mavangu mama mankuma mevangamenanga muna yandi.” 15 Kansi, akaka bavovele vo: “I Eliya.” Akaka vo: “Ngunza kwandi nze ngunza za nz’ankulu.” 16 Erodi vava kawidi wo, ovovele vo: “Yoane ona yazeng’o ntu, ofulukidi.” 17 Kadi Erodi yandi kibeni watuma vo babaka Yoane yo kunsia muna pelezo mu kuma kia Erodia wa nkaz’a Filipo wa mbut’andi, wau kansompa. 18 Kadi Yoane wavovesanga Erodi vo: “Ke diansongi ko kwa ngeye dia sompana yo nkaz’a mbut’aku.” 19 Dianu vo, Erodia wanlundila makasi yo vava kumvonda, kansi kalendele wo ko. 20 Kadi Erodi watoma zitisanga Yoane, wau kazaya wo vo muntu ansongi kwandi yo velela, watoma kunlunda. Vava kanwá, watokana kikilu yo lembi zaya dina kekumvanga, kansi wakwamanana kunwa ye kiese kiawonso.

21 Kansi, lau diambote dialuaka muna lumbu kia luwutuku lwa Erodi, vava kalambisa e lambu mu kuma kia mbanda-banda zandi, mfumu za makesa y’akwa tunda a Ngalili. 22 O mwan’ankento a Erodia okotele, okinini, oyangidikidi Erodi y’awana badianga yandi vana meza. O ntinu ovovese mwan’a ndumba vo: “Undomba konso kina ozolele, ikuvana kio.” 23 Undididi e ndofi vo: “Konso kina okundomba, ikuvana kio, kana nkutu ndambu a kintinu kiame.” 24 Ovaikidi, wele yuvula ngudi andi vo: “Nki mfwete lomba?” Umvutwidi vo: “Ntu a Yoane wa Mvubi.” 25 Vana vau, wele kwa ntinu, umvovese vo: “Nzolele wampana-mpana ntu a Yoane wa Mvubi muna longa.” 26 O ntinu okendalele kikilu, kansi mu kuma kia ndofi kadidi vana ndose y’awana kabokelese,* kazolele bembola ndomb’andi ko. 27 Vana vau, o ntinu otumini nyingidi kantwasila ntu a Yoane. Wele zenga ntu andi muna pelezo, 28 otwese wo muna longa. Ovene wo kwa mwan’a ndumba, mwan’a ndumba ovene wo kwa ngudi andi. 29 Vava alongoki andi bawidi wo, bele, babongele e vimbu diandi, basidi dio muna ziami.

30 Antumwa balungalakene vana vena Yesu, banzayisi mawonso bavangidi yo longa. 31 Ubavovese vo: “Nwiza, twenda vana fulu kia yeto kaka, kuna makanga, twavunda fiakete.” Kadi ayingi bekwizanga yo vutuka, ke bakedi nkutu ye ntangwa ya dia ko. 32 Bakotele muna nzaza, bele va yau kaka kuna makanga. 33 Kansi, una se bekwendanga, wantu babamwene, ayingi mpe bazeye wo, batukidi muna mavata mawonso, yau awonso bele kia malu mu nzaki zawonso, babavitidi kuna ntwala. 34 Vava kakulumukini, omwene ndong’ayingi, ubafwididi e nkenda, kadi bakedi nze mameme makondwa mvungudi. Oyantikidi kubalonga mambu mayingi.

35 O kuma vava se kufwa, alongoki andi bezidi kwa yandi, bavovele vo: “Ovava va makanga, o kuma se kufwa. 36 Ubasindika, benda muna mpatu ye muna mavata mazietele, bayisumbila má kia dia.” 37 Ubavutwidi vo: “Oyeno nubavana má kia dia.” Bamvovese vo: “Nga twenda sumba mbolo za 200 za denali, twavana nkangu badi’e?” 38 Ubayuvuidi vo: “Mbolo kwa nuna zau? Nwenda tala!” Vava basolwele zo, bavovele vo: “Zitanu ye mbizi zole za maza.” 39 Ovovese wantu awonso bavuanda mu buka-buka vana titi yankunzu. 40 Bavuende mu buka ya nkama-nkama ye makumatanu-makumatanu. 41 Obongele mbolo zau tanu ye mbizi za maza zau zole, osengwele meso kuna zulu, osambidi. I bosi, obukunwini e mbolo, ovene zo kw’alongoki bakaya zo kwa nkangu, okayanisi mpe mbizi za maza zau zole kw’awonso. 42 Awonso badidi yo yukuta, 43 bakutikidi e nkesona za mbolo, yitunga 12 yazala, lembi tanga yina ya mbizi za maza. 44 Awana badidi e mbolo, 5.000 ma akala.

45 Vana vau, ovovese alongoki andi bakota muna nzaza benda viti kuna simu dia Betesaida, ekolo yandi kibeni kesindika e ndonga. 46 Vava kabasindikidi, wele kuna mongo kasamba. 47 O kuma una kwafwa, nzaza ilueke vana kati kwa mbu, kansi osidi yandi mosi kuna seke. 48 Wau kamwene alongoki benwananga mu singika e nzaza, kadi tembwa kibaluakidi, muna tezo kia ngingil’a fuku ina yeya* wizidi kwa yau, odiatilanga vana mbu; kansi ovangidi nze yandi ozolele kubavioka. 49 Wau bamwene Yesu kediatilanga vana mbu, bavovele vo: “Ekiaki mona-meso!” Bakazidi. 50 Yau awonso bàmwene, batokanene. Vana vau ubavovese vo: “Ke nutokani ko! I mono kwame; ke numoni wonga ko.” 51 I bosi, okotele muna nzaza, e tembwa kidingalele. Basivikidi kikilu, 52 kadi ke babakula e nsas’a sivi dia mbolo ko, e ntima miau miakangama kaka yo lembi bakula.

53 Vava basaukidi, balueke kuna Ngenesarete, bakangidi nzaza vana kumu. 54 Kansi, una bavaikidi muna nzaza, wantu banzayididi. 55 Bele ntinu muna zunga kiakina kiawonso, bayantikidi kuntwasila e mbevo muna yipoyo konso kuna bawidi vo i kena. 56 Konso muna kakotele, kiakala muna mavata, mbanza yovo nsi, basidi e mbevo muna mazandu yo kundodokela vo baviakana kaka o nswiku a mvuatu andi. Awonso ana baviakanene wo, basasukidi.