Luka

21 Una kasengwele meso, omwene mvuama zitubanga tukau muna nkela za tukau. 2 I bosi, omwene mpe nkento wafwilwa yakala, wa nsukami otubidi mo mpata* miole, 3 ovovele vo: “Kieleka inuvovese vo kina katubidi nkento ndioyu wa nsukami, wafwilwa yakala, kiviokele awonso. 4 Kadi awonso awaya, ina isuvidi batubidi muna nkel’a tukau, kansi oyandi muna usukami wandi, otubidi mo yawonso kakedi yau muna zingu kiandi.”

5 I bosi, akaka una bayikidinge edi dia tempelo, e mpiengeswa yaviengeselwa muna matadi mambote yo tukau, 6 ovovele vo: “E lekwa yayi numwene, e lumbu ikwiza ke vesala tadi va ntandu a tadi ko ovava, dina dilembi kunkumunwa.” 7 Banyuvuidi vo: “E Nlongi, nkia ntangwa mekala e mambu mama? Nki i sinsu mpe kisonga vo mambu mama se mevangama?” 8 Ovovele vo: “Nutoma kuyikenga nwalembi vukumunwa, kadi ayingi bekwizila muna nkumbu ame, yo vova vo, ‘Mono i Kristu,’ ‘E ntangwa yasikidiswa ifinamene.’ Ke nubalandi ko. 9 Kansi oyeno, vava nuwá e nsangu za vita ye mavuanga, ke nuzakami ko. Kadi mambu mama mafwete teka vangama, vo i mbaninu,* ke ikala vana vau ko.”

10 I bosi ubavovese vo: “E zula kitelamena zula, e kintinu kitelamena kintinu. 11 Mukala nzakama zangolo za ntoto, muna zunga eki ye kiankaka mvengele ye vuku; mukala mpe mambu mansisi ye sinsu yanene yituka kuna zulu.

12 “Kansi vitila mambu mama mavangama, wantu bekunusia o moko yo kunubangika, bekunuyekola muna masambilu ye muna pelezo. Bekununata kwa atinu ye ayadi mu kuma kia nkumbu ame. 13 Omama mekunuvana e lau dia sila umbangi. 14 Dianu vo, ke nuteki badika muna ntima mieno ko dina nuvova muna kuyitanina, 15 kadi ikunuvana mvovo ye ngangu, zina vo atantu eno awonso, ke balendi zo telamena ko, ngatu tumba zo. 16 Mase ye ngudi, ye mpangi, ye yitu, y’akundi bekunuyekola, bevonda akaka vovo nwina, 17 Wantu awonso bekunumenga mu kuma kia nkumbu ame. 18 Kansi kana nkutu lusuki lumosi lwa ntu mieno ke luvila ko. 19 Muna luzindalalu lweno i nuvuluzila mioyo mieno.*

20 “Kansi, vava numona Yerusaleme izungilu kwa vu kia makesa, ozevo nuzaya wo vo lufwasu lwandi lufinamene. 21 Dianu vo, ana bena muna Yuda yambula batinina muna miongo, ana bena muna mbanza yambula bayaluka, ana bena muna mpatu, ke bakoti mo ko, 22 kadi i lumbu ina ilandwa e kunda kimana mawonso masonama malungana. 23  Tâtu kwa akento bayimita y’awana beyemeka muna lumbu yayina! Kadi mukala mpasi zayingi omu nsi, yo makasi muna nkangu wau. 24 Bebwila muna meno ma nsosolo, benatwa muna kinkole muna zula yawonso; Yerusaleme idiatakeswa kwa zula,* yavana e tandu ya zula* ilungana.

25 “Mukala mpe sinsu muna ntangwa, ngonde, ye ntetembwa, ova nza e zula iyangama o ntima, yo lembi zaya dina bevanga mu kuma kia kumbu dia mbu yo mavuku. 26 Wantu befwa kiambu yo wonga, ye swengenia kia vingila mana mekwiza ova nza, kadi e ngolo za zulu zinikunwa. 27 I bosi, bemona Mwan’a muntu okwizila muna matuti ye nkuma yo nkembo ayingi. 28 O mambu mama vava meyantika o vangama, nutelama yo vumbula ntu mieno, kadi luvuluzu lweno lufinamene.”

29 Dianu vo, ubatelele kingana eki: “Nutala nsanda ye nti miankaka. 30 Avo numwene vo misavukidi, nuzeye wo vo nsungi a mvula ifinamene. 31 Diau adimosi mpe, oyeno avo numwene mambu mama mavangamene, nuzaya wo vo e Kintinu kia Nzambi kifinamene. 32 Kieleka, inuvovese vo, e mbandu yayi ke ikuviokela nkutu ko yavana mambu mama mawonso mevangama. 33 E zulu ye nza vioka ivioka, kansi mambu mame ke mevioka nkutu ko.

34 “Nutoma kuyilunga-lunga kweno, kimana e ntima mieno mialembi bimuka yo mazitu mu kuma kia dia yo nua kwasaka ye ntelamw’a moyo muna mambu ma zingu, e lumbu kiakina kikwa kunuluakila kuna kinsalukisa 35 nze sokolo. Kadi i una kikwizila kw’awonso bena ova nza. 36 Dianu vo, nuyingila, nudodokelanga ntangwa zawonso, kimana nwavua owu nutinina mambu mawonso mevangama, nwatelama vana ven’o Mwan’a muntu.”

37 E lumbu yawonso muna tempelo kalongèlenge, kansi muna fuku wayendanga vana mongo uyikilwanga vo Mongo a Olive. 38 Muna mene-mene, o nkangu awonso wayizanga kunwinikina muna tempelo.