Mavangu

¹⁹ Ekolo Apolo kakala muna Korinto, Paulu oviokele kuna ntandu muna zunga ya Asia, okulumukini kuna Efeso. I kûna kawananene y’alongoki akaka, 2 ubayuvuidi vo: “Nga mwand’avelela nwatambula vava nwakituka minkwikizi e?” Bamvutwidi vo: “Ke twawidi wo nkutu ko vo vena yo mwand’avelela.” 3 Ovovele vo: “Ozevo, mu nki nwavubilwa?” Bavutwidi vo: “Muna mvub’a Yoane.” 4 Paulu ovovele vo: “E mvub’a Yoane i sinsu kia luviluku lwa ntima, wavovesang’o wantu vo bakwikila muna ndiona okwiz’anlandi, i sia vo, muna Yesu.” 5 Una bawidi wo, bavubilu muna nkumbu a Mfumu Yesu. 6 Vava Paulu kabatensekele o moko, batambwidi mwand’avelela, bayantikidi vovela muna ndinga za nzenza yo sakula. 7 Yau awonso, tezo kia akala 12.

8 Una kakotele muna sambilu, ovovelenge kuna unkabu mu ngonde tatu, olongelenge yo kwikidisa wantu oma ma Kintinu kia Nzambi. 9 Kansi, akaka wau babadisi ntima yo lembi kwikila yo tianguna Nzila vana meso ma ndonga, Paulu okatukidi vana bena, ovambwidi alongoki, e lumbu yawonso olongelenge muna seka dia sikola ya Turano. 10 Wavanga wo mu mvu miole, awonso bakala muna mvivu a Asia bawidi e diambu dia Mfumu, Ayuda ye Mingerekia.

11 O Nzambi wakwamanana vangila mavangu mankuma muna moko ma Paulu, 12 kana nkutu malenswa ye nlele miandi vava mianatwanga kwa mbevo, e mbevo zasasukanga, e mianda miambi mpe miavaikanga. 13 Kansi Ayuda akaka ana bayenda kangalanga mu vaikisa e nkuya, bavava mpe sadila e nkumbu a Mfumu Yesu kw’awana bakala ye mianda miambi; bavovanga vo: “Inukanikini muna nkumbu a Yesu ona Paulu kelonganga.” 14 O wana nsambwadi a Sekeva wa ngang’ambuta wa Nyuda, yau bavanganga wo. 15 Kansi, o mwand’ambi ubavutwidi vo: “O Yesu inzeye, o Paulu mpe inzeye; kansi oyeno nu aki nani e?” 16 Muna diadi, o muntu wina ye mwand’ambi ubayilamene, ubasundidi e ngolo, bavaikidi muna nzo yayina mu ntinu ye nkonga ye mputa zau. 17 Diambu diadi diazayakana kw’awonso, Ayuda ye Mingerekia ana bazingilanga muna Efeso; awonso bamwene wonga, e nkumbu a Mfumu Yesu yakembelelwa. 18 Ayingi mun’awana bakituka minkwikizi bezidi funguna yo samuna mavangu mau. 19 Ndonga mun’awana basadilanga e mpandu batwese nkanda miau, bayokele mio vana meso ma wantu awonso. Batangidi e ntalu miafwa, 50.000 ma palata. 20 E diambu dia Yave diakwamanana wokela yo sunda e ngolo.

21 Mambu mama vava mavangama, Paulu okanini muna ntim’andi vo vava keviokela muna Makedonia ye Akaya, kuna Yerusaleme mpe kekwenda. Ovovele vo: “Vava ikwenda ko, mfwete mona mpe Roma.” 22 Dianu vo, otumini kuna Makedonia nwole mun’awana bansadisanga, Timoteo ye Eraseto, kansi yandi kibeni osidi mu fikolo muna mvivu a Asia.

23 Muna kolo kiaki mpe, mubundumukini mvuanga yangolo mu kuma kia Nzila. 24 Kadi muntu mosi, nkumbu andi Demeterio, ngangul’a palata, nluta miayingi katwasilanga akwa umbangu wau bavanganga tempelo zakete za palata za Atemi. 25 Okutakese akw’andi ye ankaka basalanga e salu kiaki, ovovele vo: “Akundi, nutomene wo zaya vo kimvuama kieto mu salu kiaki kitukanga. 26 Numwene yo wá, ke muna Efeso kaka ko, kansi muna zunga yawonso yifinamene mvivu a Asia, una Paulu kekwikidisilanga ndonga yo kubasob’e ngindu, wau kevovanga vo e nzambi zavangilwa muna moko ke nzambi zakieleka ko. 27 E vonza ke kina kaka muna salu kieto ko, wau kivezwa, kansi mpe muna tempelo ya Atemi wa nzambi ankento anene, ibadikilwa se yakondwa o mfunu, yandi osambilwanga muna mvivu awonso wa Asia ye nza yawonso, e tunda diandi divila.” 28 Una bawidi wo, bafungidi kikilu makasi, bavovele muna nding’angolo vo: “Wanene Atemi a Efeso!”

29 E mbanza izele ye mavuanga, bele kumosi kuna yanzala kia yimpa, babakidi Ngayo yo Aresetako, esi Makedonia ana bakangalanga yo Paulu. 30 Muna diadi, Paulu wazola kota vana vakala nkangu, kansi alongoki ke banyambula ko. 31 Kana nkutu akaka muna akubiki a nkinzi ye nsaka, ana bakala yandi kikundi, bantwikidi e nsangu yo kundodokela kalembi kuyisia mu vonza kia kota vana yanzala kia yimpa. 32 Ozevo, mavuanga makota vana vena o nkangu: Awaya bakazìdi diankaka, awana diankaka; kadi ayingi muna yau ke bazaya ko e kuma bakutakanena. 33 Dianu vo, bavaikisi Alesandero vana vakala nkangu, Ayuda banungwini kuna ntwala, Alesandero olambwidi koko, ozolele vovesa nkangu. 34 Kansi vava babakwidi vo Nyuda, awonso bakazidi kumosi mu tezo kia ola zole, oku vo: “Wanene Atemi a Efeso!”

35 I bosi, o mfumu a mbanza vava kalembekele o nkangu, ovovele vo: “Esi Efeso, nkia muntu vava twina olembele zaya vo e mbanz’a Efeso yau ilundanga tempelo ya Atemi wanene ye teke kiasotoka tuka kuna zulu? 36 Wau vo e mambu mama ke malendi fidiswa mpaka ko, nuvuvama, ke nuvangi diambu dia uzowa ko. 37 Kadi wantu awaya nutwese ovava, ke bayiyidi tempelo ko ngatu tianguna nzambi eto ankento. 38 Dianu vo, Demeterio ye akwa umbangu avo muntu babakidi diambu, e mbazi a nkanu ina, e nguvulu* mpe zina; yambula bafundana. 39 Kansi, avo diambu diankaka nuvavanga, difwete zengelwa muna lukutakanu lwa nkangu luna lwavaninwa nswa kwa ayadi. 40 Kadi mu vonza kikilu twina kia fundwa mu kuma kia nkindu yibwidi o unu, wau vo ke vena kuma ko tulenda songa muna mvuanga yayi.” 41 Vava kavovele mambu mama, osindikidi e ndonga.