Roma

9 Mpovele ludi muna Kristu; kivunini ko, kadi e ntona zame zisianga yame umbangi muna mwand’avelela 2 vo, ntantu zayingi ye mpasi zilembi suka imonanga muna ntima. 3 Kadi, edi yadi zola vo mono kibeni yavambuka muna Kristu nze muntu a sibwa mu kuma kia mpangi zame, yitu yame mun’owu wa nitu, 4 i sia vo, Aneyisaele. O Nzambi wabatambula se wan’andi yo kubavana nkembo, makangu, Nsiku, salu kiavauka ye nsilu. 5 Muna akulu eto i batuka, o Kristu mpe muna yau i katuka mun’owu wa nitu. O Nzambi ona wina vana ntandu a yawonso, yambula kakembelwa yakwele mvu. Amen.

6 Kansi, ke sia ko vo e diambu dia Nzambi difungidi. Kadi ke awonso ko batuka muna Isaele* i “Isaele” kikilu. 7 Ke sia mpe ko vo wau bena vo mbongo a Abarayama, yau awonso wana; kansi, “Kina kiyikilwa vo mbongo aku, muna Isaki kikwizila.” 8 I sia vo, ke wan’awonso ko a Abarayama i wan’a Nzambi, kansi awana kaka bawutukila muna nsilu, i bebadikilwa vo wan’a Abarayama. 9 Kadi e diambu dia silwa o nsilu i diadi: “Muna nsungi yayi se ngiza, o Sara owuta mwan’a yakala.” 10 Ke diau kaka ko, kansi vava Rebeka mpe kayimita mapasa kwa Isaki wa se dieto; 11 kadi una ke bawutukidi ko yo vanga diambu diambote ngatu diambi, kimana e kani dia Nzambi dia kubasola diasikila, ke muna mavangu ko, kansi muna Ndiona kabokela, 12 Nzambi wavovesa Rebeka vo: “O mbuta okala se ntaudi a nleke.” 13 Wauna wasonama vo: “Nzolele Yakobo, kansi mbengene Esau.”

14 Ozevo, adieyi tuvova? Nga Nzambi nkwa vilwa e? Ke wau ko! 15 Kadi wavovesa Mose vo: “Ifwa e nkenda konso ndiona nzolele fwila e nkenda, isonga walakazi kwa konso ndiona nzolele songa walakazi.” 16 Dianu vo, e nsola ke ina muna luzolo lwa muntu ko yovo muna ngolo zandi,* kansi muna Nzambi kaka, ona ofwang’e nkenda. 17 Kadi muna kuma kia Faro sono kivovele vo: “Kiaki i kuma ngiambulwidi vo wakala kaka o moyo: kimana yasonga o nkum’ame muna ngeye, e nkumbu ame yasamunwa mu nza yawonso.” 18 Ozevo, konso ndiona kazolele i kefwil’e nkenda, kansi obâdisa mpe o ntim’a konso ndiona kazolele.

19 Dianu vo, ongeye okumpovesa vo: “Ekuma o Nzambi ketumbilanga wantu? Nani olenda kakidila lukanu lwandi?” 20 Kansi, ngeye muntu, u nani wavutulwila Nzambi kuna lutiangu? Nga kinzu kilenda vovesa nwumbi andi vo: “Ekuma umpangidi e mpila yayi?” 21 Nki? Nga o nwumbi kena ye wisa ko kia wumba yinzu yole muna mbumba mosi, kimosi se sadilwa kia zitu, kiakaka se sadilwa kia kondwa zitu? 22 Ozevo, avo Nzambi una yo lukanu lwa songa makasi mandi yo nkum’andi, ekuma kayambulwila yo ntim’a vunda e yinzu ya makasi ina yakubamena muna lufwasu? 23 Avo ediadi diavangama kimana o nkembo andi anene wazayakana muna yinzu ya nkenda, ina kateka kubikila muna nkembo, 24 i sia vo, oyeto, ana kabokela ke muna Ayuda kaka ko, kansi muna zula mpe. 25 I wau mpe kavovela muna Osea: “Awana bena vo ke nkangu ame ko, ikubayikila vo ‘nkangu ame,’ o nkento walembi zolwa, oyikilwa vo ‘nzolwa’; 26 vana fulu kina bavoveselwa vo, ‘oyeno ke nu nkangu ame ko,’ i vâna beyikilwa vo ‘wan’a Nzambi amoyo.’”

27 Yesaya waboka mu kuma kia Isaele vo: “Kanele vo lutangu lwa wan’a Isaele luna nze senge dia kalunga, nsadiswa kaka ivuluzwa. 28 Kadi Yave otá e mbalu yo wantu bezingilanga ova ntoto, ofokola yo, okufika yo.”* 29 Diaka, nze una Yesaya kasakula vo: “Kele vo Yave a vu katusisila mbongo ko, twadi kituka nze Sodoma yo fwaninikwa ye Ngomora.”

30 Ozevo, adieyi tuvova? Esi zula* kana una vo ke batatidila ndungidi ko, balungiswa vana ndose a Nzambi mu kuma kia lukwikilu; 31 kansi Isaele, kana una vo otatidilanga nsiku a ndungidi, kalunda nsiku wauna ko una ufwene. 32 Ekuma? E kuma kadi ke batatidila wo muna lukwikilu ko, kansi muna mavangu. Batele sakuba muna “tadi dia sakuba”; 33 wauna wasonama vo: “Tala! Nsidi muna Zione tadi dia sakuba yo nsenzele* a nlelo, kansi ndiona okwikila muna yandi ke fusulwiswa nsoni ko.”