Ayibere

9 Vo i kangu diantete diakala ye nsiku mia salu kiavauka ye fulu kiandi kiavauka ova ntoto. 2 Kadi e suku diantete dia saba diakubikwa, diayikilwanga vo Fulu Kiavauka, i mwakala zangikilwa kia mini, meza ye mbolo zatambikwanga vana ndose a Nzambi. 3 Kansi kuna nim’a nlele a ngumbu* una wanzole, i kwakala suku diayikilwanga vo Fulu Kisundidi o Vauka. 4 I mûna mwakala yokelwa kia ndumbu kia wolo, nkela a kangu yakuswa wolo mwawonso, i mûna mwakala e kinzu kia wolo kiakala ye mana ye nkau a Arone una wasavuka e mvuma ye babu ya kangu; 5 vana ntandu a nkela vakala ye akelubi a nkembo ana bayitalelanga e fukwa kia lubakanisu.* Kansi eyayi ke ntangw’a sasila mambu mama ko.

6 Vava mambu mama makubikwa mu mpila yayi, ntangwa ke ntangwa anganga bakotanga muna suku diantete dia saba muna sala e salu yavauka; 7 kansi muna suku dianzole, ngang’ambuta kaka wakotanga mo, nkumbu mosi muna mvu, ka kondwanga menga ko, mana katambikanga mu kuma kia yandi kibeni ye mu kuma kia masumu mana nkangu bavangilanga kuna bubu. 8 Mwand’avelela watoma dio kiesesa vo e nzil’a kotela mu fulu kiavauka ke yasengomonwa ko ekolo saba kiantete kiakala kiatelama. 9 E saba kiaki i kingana kia ntangwa yayi, tukau ye yimenga itambikwanga mun’owu wa nkubika yayi. Kansi ke ilendi velelesa e mvimba ko e ntona za wantu besalanga e salu kiavauka. 10 O tukau ye yimenga yayi ya ndia ye ndua kaka, ye nsukula za mpila mu mpila.* O mama mambu ma kinitu malombwanga muna nsiku, masiwa yavana ifwana e ntangwa yasikidiswa muna singika e mambu.

11 Kansi, vava Kristu kayiza nze ngang’ambuta a mambu mambote mateka vangama, wakota muna saba kianene ye kiambote, kina ke kiavangilwa muna moko ko, i sia vo, ke kia nza yayi ko. 12 Wakota muna fulu kiavauka, ke muna menga ma nkombo ye wan’a ngombe ko, kansi muna menga ma yandi kibeni i kakotela e mvimba yo kutukûla yakwele mvu. 13 Kadi avo menga ma nkombo ye ngombe za makoko yo ntoto ampolo a wan’a ngombe, mazazwangwa kw’awana bafunzuka, mabavelelesanga muna nitu, 14 ozevo o menga ma Kristu, ona wakitambikila muna mwand’a mvu ya mvu kwa Nzambi kondwa tona, nga ke meluta velelesa ntona zeto muna mavangu mafwa ko kimana twasadila Nzambi amoyo salu kiavauka e?

15 Kiaki i kuma kenena se nkambami* a kangu diampa, kimana wau kafwa se lukûlu lw’awana bakuzukila kuna nsi a kangu diantete, awana basolwa batambula o nsilu wa e vua dia mvu ya mvu. 16 Kadi konso kuna kukangilu e kangu, o muntu okangidi e kangu yo Nzambi kafwete fwa, 17 e kuma kadi e kangu kuna nim’a lufwa kaka disikidilanga, wau kezinganga ndiona wakanga dio ke dikalanga yo nkuma ko. 18 Dianu vo, kana nkutu e kangu diantete ke diasikidiswa ko kondwa menga. 19 Kadi vava Mose kasamuna e nkanikinu mia Nsiku kwa nkangu awonso, wabonga o menga ma wan’a ngombe ye nkombo, ye maza, ye mika miambwaki, ye nti a isopo, wazaza mo vana nkanda e kangu ye kwa nkangu awonso, 20 ovovele vo: “Omama i menga ma kangu dina nukanikinu kwa Nzambi nwalunda.” 21 Ozazidi mpe menga muna saba ye salanganu yawonso yasadilwanga e salu kiavauka. 22 Kadi lekwa yayingi yaveleleselwa muna menga mun’owu wa Nsiku, vana valembi bungulwa o menga, ke vena luloloko ko.

23 I dianu diakadila o mfunu vo, e fwaniswa kia lekwa ina kuna zulu kiaveleleselwa muna yimenga ya bulu, kansi e lekwa ya zulu, yimenga isundidi wete yavavanga, ke mu yimenga ya bulu ko. 24 Kadi Kristu kakota mu fulu kiavauka kiavangilwa muna moko ko, kina vo i kopi kia fulu kialudi, kansi kuna zulu kikilu kakota, kimana kamoneka owau vana ndose a Nzambi muna wete dieto. 25 Kayitambika ntambika zayingi ko, wauna ngang’ambuta kekotanga vana fulu kiavauka e mvu miawonso yo menga mena vo ke mandi ko. 26 Kele vo ke wau ko, nkumbu miayingi kadi mona e mpasi tuka kuna semo dia nza. Kansi owau oku mbaninu a tandu* uyisengomwene nsengomoka imosi kaka mu katula masumu muna kuyitambika yandi kibeni. 27 Wauna diasikidiswa vo wantu befwa mfwa mosi kaka, i bosi befundiswa, 28 o Kristu mpe ntambikwa mosi kaka katambikwa kimana kanata masumu ma wantu ayingi; e mboneka ina yanzole kemoneka, ke mu diambu dia masumu ko, kansi mu diambu dia awana bekumvavanga mu kuma kia luvuluku lwau.