Maku

12 I bosi, ubavovesele muna yingana oku vo: “Muntu mosi okunini mpatu a vinyu, ozungidi yo lûmbu, otimini mo e kaminu dia vinyu yo tunga mo nzo e zulu; osompekele yo kw’avati, i bosi wele kuna nsi ankaka. 2 Vava kialuaka e nsungi, otumini ntaudi katambula e kunku kiandi kia mbongo a mpatu a vinyu kw’avati. 3 Kansi, bambakidi, banwende, bansindikidi moko-moko. 4 Ubatumini diaka ntaudi ankaka, oyandi mpe banwende vana ntu, bamfusulwisi e nsoni. 5 I bosi, otumini diaka wankaka, oyandi bamvondele, otumini ayingi, akaka babawende, akaka babavondele. 6 Mosi diaka kakala yandi, i mwan’andi anzolwa. I bosi, untumini, oku vo, ‘O mwan’ame bekunzitisa.’ 7 Kansi, avati awaya bavovazianene vo, ‘I yandi ndioyu osala ye fwa dia mpatu a vinyu. Nwiza twamvonda, e fwa dikala se dieto.’ 8 Bambakidi, bamvondele, bamvetele kuna mbazi a mpatu a vinyu. 9 Adieyi kevang’o mfumu a mpatu a vinyu? Kwiza kekwiza kavonda avati yo vana mpatu a vinyu kwa wantu ankaka. 10 Nga ke nwatanga kio ko e Sono kiaki: ‘E tadi dina diabembolwa kw’atungi i diau diakituka se mbuta tadi dia konko?* 11 Ediadi kwa Yave diatuka, diasivi omu meso meto.’”

12 Bazolele kumbaka,* kansi bamwene ndonga o wonga, kadi babakwidi wo vo mu kuma kiau katelele e kingana. Muna kuma kiaki, bansisidi, bele kwau.

13 I bosi, bantumini akaka muna Afarisi y’alandi a Erodi kimana bambakila muna mpov’andi. 14 Una balueke, banyuvuidi vo: “E Nlongi, tuzeye wo vo ludi ovovanga, kuvavang’e dienga dia muntu ko, kadi kutalanga muna mpw’a wantu ko, olongelanga nzil’a Nzambi muna ludi. Nga diansongi dia futa e mpaku kwa Kaisa yovo ve? 15 Twafuta yovo ke tufuti ko?” Una kabakwidi umpuki wau, ubavovese vo: “Ekuma nuntontele? Nuntwasila denali, yatala yo.” 16 Batwese imosi, ubayuvuidi vo: “E fwaniswa ye sono yayi yanani e?” Bamvutwidi vo: “Ya Kaisa.” 17 I bosi, Yesu ovovele vo: “Nuvana kwa Kaisa ina ya Kaisa, kwa Nzambi ina ya Nzambi.” Bansivikidi kikilu.

18 Asaduki, ana bevovanga vo ke vena lufuluku ko, bezidi kwa yandi, banyuvuidi vo: 19 “E Nlongi, Mose watusonekena vo avo muntu ofwidilu o mpangi, kasisa nkento kansi kasisidi wana ko, o nleke andi obonga nkento ndioyo, kawutila mpangi andi e mbongo. 20 Vakala mpangi nsambwadi. Wantete osompele nkento, ofwidi lembi sisa wana. 21 Wanzole umbongele, kansi ofwidi lembi sisa wana, wantatu mpe diau dimosi. 22 Yau nsambwadi ke basisidi wana ko. I bosi, o nkento mpe ofwidi. 23 Muna lufuluku, nkento a nani kekala? Kadi yau nsambwadi bambonga se nkaz’au.” 24 Yesu ubavovese vo: “Nga ke diau ko nwavidila, wau nulembele zaya e Sono ngatu nkum’a Nzambi e? 25 Kadi vava befuluka muna mafwa, akala ke besompa ko ngatu akento basompeswa, kansi bekala nze ambasi kuna zulu. 26 Muna diambu dia mafwa, mana mefuluka, nga ke nwatanga wo ko muna nkand’a Mose, o lusansu lwa nti walemanga, vava Nzambi kamvovesa vo: ‘Omono i Nzambi a Abarayama, Nzambi a Isaki ye Nzambi a Yakobo e’? 27 Oyandi ke Nzambi a mafwa ko, kansi Nzambi y’awana ben’o moyo. Nwavila kikilu.”

28 Vezidi nsoneki mosi ubawidi befilananga e mpaka, wau kazeye vo otomene kubavutula, unyuvuidi vo: “Nkia nkanikinu i wantete* muna miawonso?” 29 Yesu ovutwidi vo: “Wantete i wau wuwu, ‘Wa, e Isaele, Yave wa Nzambi eto i Yave mosi kaka, 30 zola Yave wa Nzambi aku muna nsi a ntim’aku yawonso, muna kiwuntu kiaku kiawonso, muna nyindu aku wawonso ye muna ngolo zaku zawonso.’ 31 Wanzole i wau wuwu, ‘Zola nkw’aku wauna okuyizolelanga.’ Ke vena nkanikinu wankaka ko usundidi miami.” 32 O nsoneki umvovese vo: “E Nlongi, otomene vova ludi, ‘Yandi Mosi, ke vena wankaka ko, yandi kaka’; 33 yo kunzola muna nsi a ntima yawonso, muna zayi wawonso, muna ngolo zawonso yo zola nkw’aku wauna okuyizolelanga, i disundidi yimenga yawonso yangioka ye tukau.” 34 Yesu una kabakwidi vo kuna ngangu kavutulwidi, umvovese vo: “Ofinamene muna Kintinu kia Nzambi.” Kansi ke vakedi diaka muntu ko una yo unkabu wa kunyuvula diambu.

35 O Yesu una kalongelenge muna tempelo, oyuvuidi vo: “Ekuma asoneki bevovelanga vo Kristu i mwan’a Davidi? 36 Yandi kibeni Davidi muna mwand’avelela wavova vo: ‘O Yave ovovese Mfumu ame vo: “Vuanda oku koko kwame kwalunene yavana nsia mbeni zaku kuna nsi a tambi yaku.”’ 37 Wau vo yandi kibeni Davidi wanyikila vo Mfumu, aweyi kalenda kadila se mwan’andi?”

E ndong’ayingi inwinikini kuna kiese. 38 Muna longi diandi ovovele vo: “Nuyikenga ye asoneki ana bazola kangadila muna mvuela yo kayiswa muna mazandu 39 yo vuanda vana kunda yantete* muna masambilu ye vana fulu y’akwa tunda muna malambu. 40 Beyiyanga e nzo* za akento bafwilwa akala yo samba e sambu yandá muna kuyisonga kwa wantu. Awaya tumbu kisundidi bevewa.”

41 Ofongele kuna sambu diankaka dia nkela za tukau yo tala e ndonga yatubanga e nzimbu muna nkela za tukau, mvuama zayingi mpe batubidi mo nzimbu zayingi. 42 Vezidi nkento a nsukami, wafwilwa yakala, otubidi mo mpata* miole. 43 Obokele alongoki andi, ubavovese vo: “Kieleka inuvovese vo kina katubidi o nkento ndioyu wa nsukami, wafwilwa yakala, kiviokele awonso batubidi nzimbu muna nkela za tukau. 44 Kadi yau awonso zina zisuvidi i batubidi, kansi oyandi, muna usukami wandi, i katubidi yawonso kena yau, yawonso ya zingu kiandi.”