Luvaiku

24 I bosi, ovovese Mose vo: “Tomboka kwa Yave oku mongo, ongeye yo Arone, Nadabi yo Abiu+ yo 70 lwa akuluntu a Isaele, nuvumbama kuna kwandá. 2 Ngeye Mose kaka ofwete finama mono Yave; vo i ankaka ke bafwete finama ko, o nkangu mpe ke ufwete tomboka yaku ko.”+

3 I bosi, Mose wizidi kwa nkangu yo kubazayisa mawonso kavovele o Yave ye nzengo zawonso za mfundisa.+ O nkangu awonso uvutwidi mu ndinga mosi vo: “Mawonso kavovele o Yave, vanga tuvanga mo.”+ 4 Muna kuma kiaki, Mose osonekene mvovo miawonso mia Yave.+ Osikamene muna mene, otungidi e ziku vana sina dia mongo ye malunzi 12 mun’owu wa makanda 12 ma Isaele. 5 I bosi, otumini matoko ma Aneyisaele, batambikidi tukau twangioka, bakelele yimenga ya ungudi ya ngombe+ kwa Yave. 6 Mose obongele ndambu a menga, osidi mo mu pidi, e yaka ndambu a menga ozazidi mo vana ziku. 7 Obongele nkand’a kangu yo tanga wo mu nding’a ngolo kuna kwa nkangu.+ O nkangu uvutwidi vo: “Mawonso kavovele o Yave vanga tuvanga mo, lemvokela tukunlemvokela.”+ 8 Muna kuma kiaki, Mose obongele menga, ozazidi mo kwa nkangu+ yo vova vo: “Omama i menga ma kangu dina Yave kakangidi yeno mun’owu wa mvovo miami miawonso.”+

9 Mose yo Arone, Nadabi yo Abiu yo 70 lwa akuluntu a Isaele batombokele kuna mongo, 10 bamwene Nzambi a Isaele.+ Vana kadiete vakedi nze vau vayalwa tadi dia safire, vatoma velela nga zulu.+ 11 Nzambi kavangidi mbi ko kwa afidi awaya a wan’a Isaele,+ bamwene mona-meso kia Nzambi aludi, badidi yo nua.

12 Yave ovovese Mose vo: “Tomboka kwa mono kuna mongo, kala kûna. Ikuvana e babu ya matadi ina isoneka e nsiku ye nkanikinu muna kubalonga.”+ 13 Muna diadi, Mose otombokele yo Yosua wa nsadisi andi,+ Mose otombokele kuna mongo a Nzambi aludi.+ 14 Kansi, ovovese akuluntu vo: “Nutuvingila ovava yavana tuvutuka kwa yeno.+ O Arone yo Kure+ bena yeno. Konso ndiona una ye diambu kenda kwa yau.”+ 15 I bosi, Mose otombokele kuna mongo ekolo e tuti diafukanga o mongo.+

16 O nkembo a Yave+ ukedi vana Mongo a Sinai,+ e tuti difukidi o mongo mu lumbu sambanu. Muna lumbu kiansambwadi, Nzambi obokele Mose tuka vana kati kwa tuti. 17 Kuna kwa Aneyisaele ana batalanga, e mpw’a nkembo a Yave yakala nga nlaku a tiya vana ntandu a mongo. 18 I bosi, Mose okotele muna tuti, otombokele kuna mongo.+ Mose okele kuna mongo lumbu 40, fuku yo mwini.+