Nsiku

22 “Avo omwene ngombe yovo meme dia mpangi aku diyungananga, kuvioki dio ko vika sia vo kumwene dio ko.+ Ofwete dio nata wavutula dio kwa mpangi aku. 2 Kansi, avo mpangi aku ke zinganga yaku lukufi ko yovo kuzeye ko kana nani ovuidi e bulu, ofwete kio nata kuna nzo aku, okala kiau yavana o mpangi aku kevava kio. I bosi, okumvutulwila kio.+ 3 I diau mpe ofwete vanga mu kuma kia buluku diandi, mvuatu andi ye konso lekwa kavidisi o mpangi aku, kina ongeye osolwele. Kufwete kio vioka ko vika sia vo kumwene kio ko.

4 “Avo omwene buluku yovo ngombe a mpangi aku yibwidi muna nzila, kufwete yo vioka ko vika sia vo kumwene yo ko. Ofwete sadisa ndiona ovuidi e bulu muna kio telamesa.+

5 “O mwan’ankento kafwete vuata mvuatu mia mwan’ayakala ko, ngatu mwan’ayakala kavuata mvuatu mia mwan’ankento. Kadi konso ndiona ovanga wo wangemi kuna kwa Yave wa Nzambi aku.

6 “Avo omwene nzialw’a nuni muna nzila, kiakala ku nti yovo va ntoto, ina yo wana yovo maki, o ngudi kakala vana ntandu a wana yovo vana ntandu a maki, ongeye kubongi ngudi kumosi yo wan’andi ko.+ 7 Yambula o ngudi kenda kwandi, kansi olenda kwaku bonga o wana. Vanga wo kimana wakala kiambote ye wazinga kolo kiayingi.

8 “Avo otungidi nzo, ofwete zungisa yaka kuna nludi,+ kimana walembi twasa nkanu a menga muna nzo aku mu kuma kia muntu obwidi tuka kuna nludi.

9 “Kufwete kuna mbongo ya mpila yankaka ko muna mpatu aku a vinyu.+ Avo ke wau ko, yawonso ituka muna mbongo okunini kumosi ye mbongo a mpatu a vinyu ikutumunua yo vewa kuna nzo avauka.

10 “Kuvatisila ngombe ye buluku mu vangu kimosi ko.+

11 “Kuvuati mvuatu ko wavangilwa mu mika ye lino yasangalakana.+

12 “Ofwete vanga nkuta mia nsele muna konko yá ya mvuatu ovuete.+

13 “Avo yakala osompele nkento, kavukana yandi, i bosi kansaula* 14 ye kamfunda vo nkwa mavangu mansoni yo yivisa nkumbu andi muna vova vo: ‘Nkento ndioyu yasompele, kansi vava yavukane yandi, kiamwene ziku kia kimwenze ko,’ 15 o se yo ngudi a mwan’a ndumba bafwete songa e ziku kia kimwenze kia mwan’au a ndumba kwa akuluntu vana vitu dia mbanza. 16 O se dia mwan’a ndumba ovovesa akuluntu vo: ‘Mpene mwan’ame ankento kwa yakala ndioyu kakala se nkento andi, kansi unsawidi* 17 ye umfundidi vo nkwa mavangu mansoni muna vova vo: “Kisolwele ziku kia kimweze ko muna mwan’aku ankento.” Owau, eki e ziku kia kimweze kia mwan’ame ankento.’ I bosi, beyalumuna o nlele vana vena akuluntu a mbanza. 18 Akuluntu a mbanza+ bebonga o yakala yo kuntumba.+ 19 Bekunzengela 100 za sekele* za palata yo vana zo kwa se dia mwan’a ndumba, kadi o yakala ofusulwisi mwenze a Isaele e nsoni,+ o nkento okwamanana kala nkaz’andi. O yakala ke yambulwa ko kavambana yandi muna zingu kiandi kiawonso.

20 “Kansi, avo mfundu waludi ye ke vena ziku ko kisonganga vo mwan’a ndumba mwenze kakala, 21 bafwete nata o mwan’a ndumba kuna mbazi, vana mwelo a nzo a se diandi, o wan’amakala a mbanza andi bafwete kuntuba matadi yavana kefwa, kadi vangu diansoni kavangidi+ muna Isaele wau katele e zumba* muna nzo a se diandi.+ I mpila yayi okatulwila o bi ova kati kwaku.+

22 “Avo yakala wele wanuka ovukananga yo nkento una vo nkaz’angani, yau awole bafwete vondwa, i sia vo, o yakala ona ovukane yo nkento yo yandi nkento mpe.+ I mpila yayi okatulwila o bi muna Isaele.

23 “Avo ndumb’a mwenze wazitikilwa kwa yakala, o yakala diankaka kanwana muna mbanza yo vukana yandi, 24 nufwete nata yau awole kuna mbazi a vitu dia mbanza yo kubatuba matadi yavana befwa, o mwan’a ndumba wau kalembele kaza muna mbanza, o yakala wau kafusulwisi nkento a nkwandi e nsoni.+ Muna mpila yayi, okatula edi diambi ova kati kwaku.

25 “Kansi, avo yakala mu kiana kawene o mwan’a ndumba wazitikilwa, o yakala kambaka mu kingolo yo vukana yandi, ozevo, yakala ona ovukane yo ndumba yandi kaka ovondwa, 26 kansi kuvangi diambu ko kwa ndumba. O ndumba kavolele sumu ko difwanukini tumbu kia lufwa. E diambu diadi dina nze muntu onuanisi nkwandi yo kumvonda.+ 27 Kadi oyandi mu kiana kanwene, o ndumba wazitikilwa okazidi, kansi ke vakele muntu ko kamvuluza.

28 “Avo yakala owanane yo ndumb’a mwenze ona kazitikilwa ko, kanyilama yo vukana yandi, babakama,+ 29 o yakala ona olele yo ndumba kafwete futa 50 ma sekele za palata kwa se dia ndumba, o ndumba okituka se nkaz’andi.+ Wau vo nsoni kamfusulwisi, ke yambulwa ko kavonda o longo yo ndumba muna zingu kiandi kiawonso.

30 “Ke vena mwan’ayakala ko ofwete bonga nkento a se diandi, kimana kalembi kondwa se diandi luzitu.*+