Zakariya

7 Muna mvu wayá wa luyalu lwa Dareyuse wa ntinu, e diambu dia Yave dizidi kwa Zakariya+ muna lumbu kiayá muna ngonde yavua, i sia vo, ngonde ya Kisileu.* 2 O nkangu a Betele batumini Sareze, Rengemeleke ye wantu ana kakala yau kimana badodokela e dienga dia* Yave, 3 yo vova kwa nganga za nzo* a Yave a vu ye kw’angunza vo: “Nga mfwete dila muna ngonde yatanu+ yo yambula dia, nze una yavanga se vioka mvu miayingi?”

4 E diambu dia Yave a vu, dizidi diaka kwa mono, oku vo: 5 “Vovesa nkangu awonso wa nsi ye anganga vo: ‘Vava nuafionkononanga* yo dila muna ngonde yatanu ye muna ngonde ya nsambwadi,+ mu mvu 70,+ nga kwa mono kikilu nuafionkononanga? 6 Vava nuadianga yo nua, nga ke mu kuma kia yeno kibeni ko nuadilanga yo nua? 7 Nga ke nuafwana lemvokela mvovo mia Yave ko mina kasakula muna ngunza zina zavita,+ ekolo Yerusaleme ye mavata mandi makala lukufi mazingilwanga kwa nkangu kuna luvuvamu, ekolo Nengebe yo Sefela yazingilwanga kwa nkangu?”’

8 E diambu dia Yave dizidi diaka kwa Zakariya, oku vo: 9 “I wau wuwu kavovele o Yave a vu, ‘nufundisila muna unsongi waludi,+ nusonga walakazi*+ ye nkenda kwa muntu yo nkwandi. 10 Ke nuvunginiki nkento wafwilwa yakala ko, mwan’ansona*+ yovo nzenza+ ngatu nsukami;+ ke nukani mbi kwa muntu yo nkwandi ko muna ntima mieno.’+ 11 Kansi, oyau ke bazola tamba matu ko,+ yo lulendo lwawonso bamfila nima+ yo kaka matu mau kimana balembi wá.+ 12 Babadisa e ntima miau nze diamanta,*+ ke balemvokela nsiku* ye mvovo mia Yave a vu ko mina katwikanga muna mwand’andi ye ngunza zina zavita.+ I dianu vo, o Yave a vu ubafungidi kikilu makasi.”+

13 “‘Wauna balembi kungwila vava yabokela,+ mono mpe kiabawá ko vava bambokelanga,’+ u kavovele o Yave a vu. 14 ‘Muna tembwa kiangolo, yabamwanganesa muna zula yawonso ina ke bazaya ko,+ e nsi ina basisa yakituka se mfuta, ke mwaviokelanga diaka muntu ko ngatu vutuka;+ kadi bakitula e nsi yambote se kuma kia zakamena.’”