Daniele

9 Muna mvu wantete wa luyalu lwa Dareyuse+ wa mwan’a Akasurose—wa mwan’a musi Madai ona wayadikwa se ntinu a kintinu kia Akaladi+— 2 elo, muna mvu wantete wa luyalu lwandi, omono Daniele, mbankwidi muna nkanda, o lutangu lwa mvu miayikwa muna diambu dia Yave kuna kwa Yeremiya wa ngunza muna lunganisa kolo kina Yerusaleme+ isala e nkatu, i sia vo, mvu 70.+ 3 I dianu vo, mvilwidi ndose ame kuna kwa Yave wa Nzambi aludi, indodokele muna sambu, muna mfionkonona,*+ muna ngoto ye ntoto ampolo. 4 Nsambidi kwa Yave wa Nzambi ame yo funguna masumu, mpovele vo:

“E Yave wa Nzambi aludi, Nzambi wanene ye wansisi, ona olundanga e kangu diandi yo songa walakazi*+ kwa awana bekuzolanga yo lunda nkanikinu miaku,+ 5 twasumukina yo vanga vilwa ye mambu mambi, twatelamena;+ twavengomoka muna nkanikinu miaku ye nzengo zaku. 6 Ke twawila ntaudi zaku a ngunza ko,+ ana bavovela muna nkumbu aku kwa ntinu mieto, mfumu zeto, mase meto ye kwa nkangu wawonso wa nsi. 7 E Yave, unsongi i waku, kansi e nsoni i zeto o unu — kwa esi Yuda, kwa nkangu wa Yerusaleme, kwa Isaele yawonso, ana bafinamene ye awana bena kwandá, muna nsi zawonso zina wabamwanganesa mu kuma kia kondwa kwau kwa kwikizi muna ngeye.+

8 “E Yave, e nsoni* i zeto — kwa ntinu mieto, kwa mfumu zeto yo mase meto, kadi tusumukini. 9 E Yave wa Nzambi eto, ngeye u nkwa nkenda ye nloloki,+ kadi twatelamena.+ 10 Ke twalemvokela nding’a Yave wa Nzambi eto ko muna landa nsiku miandi mina katusila muna ntaudi zandi angunza.+ 11 E Isaele yawonso bakulula Nsiku aku, bavengomoka yo lembi lemvokela e nding’aku, i dianu ututwasidi* e sibu ye ndofi yasonama muna Nsiku a Mose wa selo kia Nzambi aludi,+ kadi twansumukina. 12 Olunganese mambu mandi mana kavova mu kuma kieto+ ye atinu eto ana batuyalanga* ye kututwasila mpasi zayingi; ku nsi a zulu diawonso ke kusidi vangama diambu dia mpila yayi ko nze dina diavangwa muna Yerusaleme.+ 13 Wauna diasonama muna Nsiku a Mose, e mpasi zawonso zitulwakila;+ kansi ke twavava dienga dia* Yave wa Nzambi eto ko muna yambula bi weto+ yo songa vo twabakula e ludi* kiaku.

14 “Muna kuma kiaki, Yave watoma sia sungididi yo kututwasila e mpasi, kadi Yave wa Nzambi eto wansongi muna mavangu mandi mawonso; kansi ke twalemvokela nding’andi ko.+

15 “Owau, e Yave wa Nzambi eto, ngeye wavaikisa nkangu aku muna Engipito muna koko kwaku kwankuma,+ wakivangila e nkumbu yakinu yamu unu kiaki,+ oyeto twasumuka yo vanga mambu mambi kikilu. 16 Dodokolo, e Yave, mun’owu wa mavangu maku mawonso mansongi,+ yambula vo nsita yo makasi maku makatuka muna mbanz’aku Yerusaleme, wa mongo aku avauka; kadi muna kuma kia masumu meto yo vilwa wa mase meto, Yerusaleme yo nkangu aku, ukitukidi se luvezo kwa awonso batuzungidi.+ 17 Owau, e Nzambi eto, wá e sambu ye ndodokela za ntaudi aku, yambula ndose aku yakezima muna nzo aku avauka+ ina yasala nkatu,+ mu kuma kia nkumbu aku, e Yave. 18 Tamba o kutu kwaku, wá, e Nzambi ame! Temona meso wamona e mpasi zeto ye mbanza iyikilwanga nkumbu aku; kadi ke tudodokele ko muna kuma kia mavangu meto mansongi, kansi mu kuma kia nkenda zaku zayingi.+ 19 E Yave, wunikina. E Yave, loloka.+ E Yave, tamba o matu, vanga diambu! Kuzingila ko, mu kuma kia nkumbu aku, e Nzambi ame, kadi e mbanz’aku ye nkangu aku nkumbu aku benatanga.”+

20 Ekolo yavovanga yo samba yo funguna masumu mame ye masumu ma nkangu ame Isaele yo dodokela vana vena Yave wa Nzambi ame, mu kuma kia mongo avauka wa Nzambi ame,+ 21 elo, ekolo yalombanga muna sambu, Ngambiele,+ o muntu ndiona yateka mona muna mona-meso,+ umfinamene una yakala wayoya, muna tezo kia ola ya tambika lukau lwa masika. 22 Umpene umbakuzi, oku vo:

“E Daniele, owau ngizidi kuvana ngangu yo umbakuzi. 23 Kuna lubantiku lwa ndodokela zaku, ntambwidi nsamu, ngizidi yasamunuina wo, kadi mfunu kikilu wina.*+ Muna kuma kiaki, toma yindula e diambu, wabakula e mona-meso.

24 “70 lwa tumingu* twazengelwa nkangu aku ye mbanz’aku avauka,+ muna manisa o bi ye sumu,+ muna loloka masumu+ yo twasa unsongi wakwele mvu,+ muna sia mona-meso e dimbu ye ungunza+ yo kusa e Fulu Kisundidi o Vauka Muna Fulu Yawonso. 25 Zaya yo bakula edi vo: Vava kivewa nkanikinu wa vutulwisa yo tungulula Yerusaleme+ yakuna ngiz’a Masia*+ wa Mfidi,+ tumingu 7 tuvioka, yo tumingu 62.+ Yerusaleme ivutulwiswa yo tungululwa ye ntanda* ye mvuila miazunga yo, kansi muna ntangw’a mpasi.

26 “Vava kivioka tumingu 62, Masia ovondwa,+ ke sala ye lekwa ko.+

“O nkangu wa mfumu ona okwiza, ufwasa e mbanza ye nzo avauka.+ E mbaninu au i kizalu. Kuna nsuka kukala vita; mun’owu wa nzengo za Nzambi vekala yo lufwasu.+

27 “Muna kuma kia wantu ayingi oyambula vo kangu diakala mu lumingu lumosi; muna kati kwa lumingu osukisa e kimenga yo lukau.+

“Mfwasi okwizila muna ve dia lekwa yangemi; yamuna lubukumuku,+ dina diasikidiswa ditiamunua mpe muna ndiona wasiswa e nkatu yakuna lufwasu.”