Wantete wa Paulu Kuna kwa Esi Korinto

1 Paulu, ona wasolwa se ntumw’a+ Kristu Yesu muna luzolo lwa Nzambi, yo Sosetene wa mpangi eto, 2 kuna kwa nkutakani a Nzambi ina momo Korinto,+ yeno nuavaulwa se alongoki a Kristu Yesu,+ nuasolwa mu kala se avauki, ye awonso ana bevovelanga nkumbu a Mfumu eto, Yesu Kristu+ muna fulu yawonso, Mfumu au ye Mfumu eto mpe:

3 Yambula nuakala ye nsambu yo luvuvamu lutukidi kwa Nzambi wa Se dieto yo Mfumu eto Yesu Kristu.

4 Ivutulanga matondo kwa Nzambi ame mu kuma kieno wau nuavewa e nsambu za Nzambi muna Kristu Yesu; 5 e kuma kadi muna mambu mawonso nuavuamisinua muna yandi, muna ngangu za samuna diambu ye muna zayi wawonso,+ 6 wauna umbangi mu kuma kia Kristu+ usikididi muna yeno, 7 kimana nualembi kondwa konso lukau, ekolo nuvingilanga lusengomoko lwa Mfumu eto Yesu Kristu ye tima diawonso.+ 8 Okunusikidisa mpe yakuna mbaninu kimana nuakondwa tumbu muna lumbu kia Mfumu eto Yesu Kristu.+ 9 Nzambi nkwa kwikizi,+ ona wanubokela nuakala entwadi yo Mwan’andi, Yesu Kristu wa Mfumu eto.

10 Ampangi, inudodokele muna nkumbu a Mfumu eto Yesu Kristu vo, nuvova dimosi yeno awonso, ke vakadi mpambula ko vana kati kweno,+ kansi nukala kaka nuayikana muna nyindu mosi ye kani dimosi.+ 11 Kadi, e mpangi zame, akaka muna nzo a Keleo banzayisi vo, ntantani zina vana kati kweno. 12 Edi nzolele vova vo, konso muntu muna yeno ovovanga vo: “Mono kwa Paulu mvuilu,” “Kansi mono kwa Apolo,”+ “Mono kwa Kefa,”* “Kansi mono kwa Kristu.” 13 Nga Kristu wavambuka? Nga Paulu wavondelwa vana nti muna wete dieno e? Nga mu nkumbu a Paulu nuavubilwa? 14 Ntondele Nzambi wau vo kiavuba kana muntu mosi ko muna yeno, nanga Keresepo+ kaka yo Ngayo,+ 15 kimana valembi kala muntu ovova vo mu nkumbu ame nuavubilwa. 16 Elo, esi nzo a Setefana mono mpe yabavuba.+ Katula awaya, kizeye ko kana vena diaka yo muntu yavuba. 17 Kadi Kristu kantuma ko ngienda vubi, kansi yasamuna e nsangu zambote;+ ke mu ngangu za vovela* ko, kimana o nti ampasi* a Kristu walembi vezua.

18 E nsangu za nti ampasi* i uzowa kw’awana bena muna nzil’a lufwasu,+ kansi kwa yeto tuna muna nzil’a luvuluzu, i nkum’a Nzambi.+ 19 Kadi diasonama vo: “Sukisa isukisa e ngangu za akwa ngangu, bembola ibembola o lulungalalu lw’alungaladi.”+ 20 O nkwa ngangu, akweyi kena? O nsoneki,* akweyi kena? O mfidi a mpaka za tandu* kiaki, akweyi kena? Nga Nzambi kakitula e ngangu za nza ko se uzowa? 21 Kana una vo e nza muna ngangu zandi ke izeye Nzambi ko,+ o Nzambi muna ngangu zandi wamona vo diambote kavuluza awana bekwikilanga muna uzowa wa nsangu zisamunuanga.+

22 Kadi Ayuda balombanga sinsu,+ Mingerekia bavavanga e ngangu; 23 kansi oyeto Kristu ona wavondelwa vana nti tusamunanga, kuna kwa Ayuda kuma kia tela sakuba, kansi kuna kwa esi zula i uzowa.+ 24 Kansi kuna kw’awana babokelwa, Ayuda ye Mingerekia, Kristu i nkum’a Nzambi ye ngangu za Nzambi.+ 25 E kuma kadi, eki kibadikilwanga vo uzowa wa Nzambi kiviokele ngangu za wantu, eki kibadikilwanga vo lutovoko lwa Nzambi kiviokele ngolo za wantu.+

26 Ampangi, nutala e mboka ina kanubokela, kavena akwa ngangu ayingi ko muna kinitu,*+ kavena akwa nkuma ayingi ko, kavena ayingi ko bawutwa kwa akwa tunda,*+ 27 kansi Nzambi wasola lekwa ya uzowa ya nza, muna fusulwisa akwa ngangu e nsoni; Nzambi wasola lekwa yatovoka ya nza, muna fusulwisa lekwa yangolo e nsoni;+ 28 Nzambi wasola e lekwa ya nza yakondwa o mfunu ye lekwa yavezwa, e lekwa ke ina ko, muna fwasa e lekwa ina,+ 29 kimana ke vakadi muntu ko okuyisana vana ndose a Nzambi. 30 Kansi muna Nzambi nuinina entwadi yo Kristu Yesu, ona wakituka kwa yeto se ngangu za Nzambi, ye unsongi mpe,+ luveleleso+ yo luvevoko muna lukûlu,+ 31 kimana diakala wauna wasonama vo: “Ndiona okuyisana, yambula kayisanina muna Yave.”*+