Zasoneka Luka

12 Muna ntangwa yayina, mafunda ye mafunda ma wantu bezidi lungalakana yo diataziana, oyantikidi vovesa ntete alongoki andi vo: “Nuyikenga ye mfuna ya Afarisi, i sia vo, umpuki.+ 2 Kansi ke vena diambu ko diatoma swekama dilembi sengomonua, ke vena mbumba ko ilembi zayakana.+ 3 Konso dina nuvovela vana tombe, diwakana vana ntemo, konso dina nuwuninina muna masuku, disamunua vana nludi mia nzo. 4 Akundi ame,+ inuvovese vo, ke nubamoni wonga ko awana balenda vonda e nitu, kansi ke balendi vanga diaka diambu diankaka ko.+ 5 Ikunusonga ndiona numwena o wonga: Numona o wonga wa Ndiona wina vo, avo omene vonda, ovuidi wisa kia tuba kuna Ngeena.*+ Elo, inusamunuini vo, Yandi numwena o wonga.+ 6 Nga ke ntietie tanu ko zitekwanga muna mbiya zole?* Kansi, ke mosi nkutu ko muna yau ovilakanua* kwa Nzambi.+ 7 Kana nkutu i nsuki zawonso za ntu mieno zamana tangwa.+ Ke numoni wonga ko; oyeno nusundidi ntietie zayingi.+

8 “Inusamunuini vo, konso ona okuntambulwila vana vena o wantu,+ o Mwan’a muntu mpe okuntambulwila vana vena mbasi za Nzambi.+ 9 Kansi, konso ona okumpanina nkalu vana vena o wantu, oyandi mpe ovaninua nkalu vana vena mbasi za Nzambi.+ 10 Konso ona ovovela Mwan’a muntu diambu diambi, dilolokwa kwa yandi, kansi, konso ona otianguna mwand’avelela, ke lolokwa ko.+ 11 Vava bekunuyekola muna masambilu ye kwa mfumu za luyalu ye akwa wisa, ke nutelama mioyo ko mu kuma kia mvutu nuvana, yovo dina nuvova muna kuyitanina,+ 12 kadi muna kolo kiakina, mwand’avelela ukunulonga mana nufwete vova.”+

13 I bosi, mosi vana vena ndonga umvovese vo: “E Nlongi, vovesa mpangi ame twakayana e vua.” 14 Umvovese vo: “Nani untumbikidi kimfundisi yovo kimvambudi kia yeno wole?” 15 Ubavovese vo: “Nutoma tala, nuyikenga ye loko diawonso,+ e kuma kadi, o muntu kana nkutu vo ulolo wa mavua kena mau, o moyo andi ke utukanga muna mavua mandi ko.”+ 16 Dianu vo, ubatelele kingana, oku vo: “E yana ya mvuama mosi yatoma yima mbongo. 17 Dianu vo, yantikidi yindula muna ntim’andi vo: ‘Aweyi mfwete vanga wau vo kina ye fulu kia lundila mbongo ame ko?’ 18 I bosi, ovovele vo: ‘Edi ivanga:+ Ibangula malundilu mame, yatunga mana masundidi o nene, i muna ikutikila e mbongo ame yawonso, ye lekwa yame yawonso yambote, 19 i bosi, ivovesa moyo ame vo: “E moyo, lekwa yayingi yambote una yau ikubamene mu mvu miayingi; vunda kwaku, dia, nua yo mona e kiese.”’ 20 Kansi Nzambi umvovese vo: ‘U zowa kwaku, muna fuku wau o moyo aku katulwa ukukatulwa. Ozevo, e lekwa yoyo okubikidi nani osala yau?’+ 21 Diau dimosi yo muntu okuyilundilanga mavua, kansi ke mvuama ko kuna kwa Nzambi.”+

22 I bosi, ovovese alongoki andi vo: “Kiaki i kuma inuvovese vo, nuyambula tokana kwayingi mu kuma kia mioyo mieno, kana nki nudia, ngatu muna diambu dia nitu zeno, kana nki nuvuata.+ 23 Kadi o moyo usundidi madia, e nitu mpe isundidi e mvuatu. 24 Nuyindula e ngono-ngono: Ke zikunanga ko, ngatu kutika; ke zina ye malundilu ko, kansi Nzambi odikilanga zo.+ Nga yeno ke nusundidi e nuni mfunu ko e?+ 25 Nani vovo nuina muna tokana kwayingi olenda kudikila kana nkutu miniti mosi muna zingu kiandi? 26 Edi diandwelo, avo ke nulenda dio vanga ko, ekuma nutokanena e mambu mankaka?+ 27 Nuyindula una e mvuma zimenenanga: Ke zifuntukanga ko ngatu tunga nlele; kansi inuvovese wo vo, kana nkutu Solomo muna nkembo andi wawonso, kasidi vuatila nze imosi muna mvuma zazi ko.+ 28 Avo Nzambi ovuikanga e titi ya mfuta, eyi ina o unu, mbazi iyokelo vana tiya, nga ke luta kunuvuika ko, oyeno akwa filukwikilu e? 29 Dianu vo, nuyambula vava eki nudia ye eki nunua ye nuyambula tokana kwasaka;+ 30 kadi yawonso yayi i yau befuntukinanga wantu a nza, kansi o Se dieno ozeye wo vo lekwa yayi nuvuidi o mfunu.+ 31 Kansi, nukwamanana vava Kintinu kiandi, ozevo e lekwa yayi ikunukudikilwa.+

32 “Ke numoni wonga ko, oyeno fikambi-kambi,+ kadi i luzolo lwa Se dieno lwa kunuvana e Kintinu.+ 33 Nuteka ina nuvuidi, nuvana tukau twa nkenda.*+ Nuyivangila nkutu za nzimbu ke zilendi fwa ko, lusalu luna ke lusuka ko kuna zulu,+ kuna ke kulendi finama mwivi ko, ngatu fwasila nselele. 34 Kadi kuna kwina lusalu lweno, i kuna mpe kukala ntima mieno.

35 “Nuvuata yo kubama,*+ nukwika e minda mieno,+ 36 nukala nze wantu bevingilanga mfumu au otuka+ kuna nkinzi a longo,+ vava kelwaka yo dodela, vana vau banziulwila. 37 Akwa kiese e ntaudi bena vo vava o mfumu au kekwiza, bewanuka vo mu yingila bena! Kieleka inuvovese vo, vuata kevuata nlele* a salu, okubavuandisa vana meza yo kubasadila. 38 Avo wizidi mu ngingila ina yazole,* kana nkutu ina yatatu* yo kubawana bakubama, ozevo akwa kiese! 39 Nuzaya diambu edi, kele vo mfumu a nzo kayizayila e ola ikwiza o mwivi, kadi yambula ko vo nzo andi yabangulwa.+ 40 Oyeno mpe se nukubama, e kuma kadi, o Mwan’a muntu okwiza muna ntangwa nulembi yindula.”+

41 Petelo unyuvuidi vo: “E Mfumu, nga yeto kaka otelele kingana kiaki, yovo wantu awonso?” 42 O Mfumu ovovele vo: “Nani kieleka i selo* kiakwikizi yo lulungalalu,* ona ovewa kiyekwa kia ntaudi za nzo* kwa mfumu andi, kimana kabavananga madia muna ntangwa ifwene?+ 43 Kiese kwa ntaudi yoyo avo owanukini kwa mfumu andi vo i wau kevanganga! 44 Kieleka inuvovese wo vo, okumvana kiyekwa kia lunga-lunga e salanganu yandi yawonso. 45 Kansi avo e ntaudi yoyo ovovele muna ntim’andi vo: ‘O mfumu ame mu zingila kena,’ yo yantika wanda selo yamakala ye yamakento, yo dia, yo nua, yo kolwa,+ 46 o mfumu a ntaudi yoyo okwiza muna lumbu kalembi kumvingila, ye muna ola kalembi zaya, okuntumba tumbu kiangolo yo kumvana e kunku kiandi vana vena minkondwa kwikizi. 47 Ozevo, e ntaudi ina ibakwidi luzolo lwa mfumu andi kansi kakubamene ko yovo vanga dina kalombelo,* bundwa ketoma bundwa.+ 48 Kansi, ntaudi ina ke ibakwidi ko ye ivangidi mana kafwete bundilwa, ke bundwa kwayingi ko. Kieleka, konso ona wavewa yayingi, mayingi kelombwa, ona mpe wasiwa kiyekwa kiayingi, mana bekunlomba masundidi.+

49 “Tiya ngizidi kwika ova nza, wau vo tulemene kala, adieyi ndenda vanga diaka? 50 Kieleka, ngina ye luvubu luna mfwete vubilwa, ekwe ntantu ngina zau yavana lulungana!+ 51 Nga nubenze vo luvuvamu ngizidi sia ova nza e? Inuvovese vo, ke wau ko, mpambani kaka ngizidi sia.+ 52 Kadi tuka owau, wantu atanu bekala muna nzo mosi bevambana, ntatu besia nwole kimbeni, nwole besia ntatu kimbeni. 53 Bevambana, o se yo mwan’andi ayakala, mwan’ayakala yo se diandi, ngudi yo mwan’andi ankento, mwan’ankento yo ngudi andi, kô wa nkento yo mwan’andi a longo, mwan’a longo yo kô wandi wa nkento.”+

54 I bosi ovovese mpe ndonga vo: “Avo numwene e tuti dikwizanga kuna weste, vana vau nuvovanga vo: ‘Mvula ikwizanga,’ i diau mpe divangamanga. 55 Avo numwene tembwa kia sude kivevomokanga, nuvovanga vo: ‘Mbangazi ikwizanga,’ i diau mpe divangamanga. 56 Ampuki, oyeno nuzeye bakula e mpw’a ntoto ye zulu, kansi aweyi nulembele bakulwila kolo kiaki?+ 57 Ekuma nulembele zayila dina diansongi? 58 Muna bong’e nona, avo se kwenda ku mbazi a nkanu yo ntantu aku, muna nzila vanga mawonso mu wizana yandi kimana kalembi kuyekola kwa mfundisi, o mfundisi kayekola kwa kesa, e kesa diasia muna pelezo.+ 59 Isamunuini vo, kuvaika mo nkutu ko, yavana ofuta e mbiya yansuka.”*