Wanzole wa Ntinu

18 Muna mvu una watatu wa luyalu lwa Oseya+ wa mwan’a Ela wa ntinu a Isaele, Kizekeya+ wa mwan’a Akazi+ wa Ntinu a Yuda, oyantikidi yala. 2 Mvu 25 kakala miau vava kayantika yala, mvu 29 kayala muna Yerusaleme. E nkumbu a ngudi andi Abi* wa mwan’a Zakariya.+ 3 Wavanga mambu mambote vana meso ma Yave,+ wauna kavanga o Davidi wa nkulu andi.+ 4 Yandi wakatula mabata,+ wabangula malunzi mavauka yo bwisa vindi diavauka.*+ Wakosomona mpe nioka ya nsongo ina yavanga Mose;+ kadi yamu lumbu yayina, nkangu a Isaele wayokelanga yo ndumbu yo yikila yo vo teke kia nioka ya nsongo.* 5 Kizekeya obundidi Yave+ wa Nzambi a Isaele e vuvu; ke vakala ona wafwanana yandi ko muna ntinu miawonso mia Yuda mina miamvita ngatu mina mianlandila. 6 Watatidila Yave.+ Kayambula kunlanda ko; walunda nkanikinu mina Yave kavana kwa Mose. 7 Yave wakala yandi. Kizekeya wavangilanga mawonso muna ngangu. Otelamene ntinu a Asuri, kansadidi ko.+ 8 Otufakese Afelesetia+ yakuna Ngaza ye zunga yandi, tuka kuna yingidilu yakuna mbanza yangolo.*

9 Muna mvu wa yá wa luyalu lwa Kizekeya wa Ntinu, i sia vo, mvu una wa nsambwadi wa luyalu lwa Oseya+ wa mwan’a Ela wa ntinu a Isaele, Samanese wa Ntinu a Asuri, otombokele kuna Samaria, ozungidi yo.+ 10 Kuna mfoko a mvu tatu, babakidi yo;+ muna mvu wa sambanu wa luyalu lwa Kizekeya, i sia vo, mvu una wa vua wa luyalu lwa Oseya wa Ntinu a Isaele, Samaria yabakama. 11 O ntinu a Asuri onete nkangu a Isaele muna kinkole+ kuna Asuri, ubasidi muna Kalaki ye Kabo vana nkoko a Ngozane ye muna mbanza za Madai.+ 12 Kadi ke bawila nding’a Yave wa Nzambi au ko, bakulula e kangu diandi ye mawonso kakanikina Mose wa selo kia Yave.+ Ke bawá ko ngatu lemvoka.

13 Muna mvu wa 14 wa luyalu lwa Kizekeya wa Ntinu, o Sankerebe wa ntinu a Asuri+ otombokele yo nuanisa e mbanza zawonso zangolo za Yuda yo kutumuna zo.+ 14 Muna kuma kiaki, Kizekeya wa Ntinu a Yuda otumini nsamu kwa ntinu a Asuri kuna Lakisi, oku vo: “Nsumukini. Katuka mu nsi ame, konso kina okunzengela, ikuvana kio.” O ntinu a Asuri ozengele Kizekeya wa Ntinu a Yuda 300 za talanta* za palata ye 30 ma talanta za wolo. 15 Kizekeya ovene palata yawonso yasoloka muna nzo a Yave ye muna lusalu lwa nzo a* ntinu.+ 16 Muna ntangwa yayina, Kizekeya okatwidi yelo ya tempelo+ a Yave ye nkambikwa ya yelo ina Kizekeya wa Ntinu a Yuda kalenga wolo,+ ovene yo kwa ntinu a Asuri.

17 Ntinu a Asuri otumini Tatani,* Rabi-sarese* yo Rabesake* yo makesa mayingi tuka kuna Lakisi,+ kuna kwa Kizekeya wa Ntinu kuna Yerusaleme.+ Batombokele kuna Yerusaleme, bakiatamene vana mvuila utukanga kuna zinga kia ntandu, kina vana nzil’ampwena ya mpatu a nsukudi a mvuatu.+ 18 Vava babokele ntinu kavaika, Eleyakime+ wa mwan’a Kilekiya ona wavitanga o ntu muna nzo,* yo Sebena+ wa nsoneki yo Yoake wa mwan’a Asafi wa nsoneki a lusansu, bavaikidi muna wanana yau.

19 Rabesake ubavovese vo: “Dodokolo, nuzayisa kwa Kizekeya vo, ‘I wau wuwu kavovele o ntinu anene, o ntinu a Asuri: “Mu nki obundidi e vuvu?+ 20 Ongeye ovovele vo: ‘Ngina ye ndekwa ye ngolo za nuanina e vita,’ kansi e miami mvovo miankatu. Kwa nani obundidi e vuvu muna kunkolamena?+ 21 Tala, ongeye obundidi e vuvu muna tutu diadi diabosoka, i sia vo, Engipito,+ edi dikotanga yo tobola e kandazi kia muntu oyekamene dio. I una kena Faro wa ntinu a Engipito kw’awonso bekumbundanga e vuvu. 22 Avo umpovese vo: ‘Muna Yave wa Nzambi eto+ tubundidi e vuvu,’ nga o Kizekeya kabangula mabata mandi ko+ ye maziku mandi yo vovesa Yuda ye Yerusaleme vo: ‘Ova ntadisi a ziku diadi nufwete vumbamena muna Yerusaleme’?”’+ 23 Owau, dodokolo vana nsimbi yayi kwa mfumu ame wa ntinu a Asuri: Ikuvana 2.000 ma mvalu, tutala kana olenda solola wantu afwana muna diatisa mio.+ 24 Ozevo, aweyi osundila kana nkutu nguvulu mosi ona osundidi o keva vana vena e ntaudi za mfumu ame, wau obundidi e vuvu muna Engipito mu vua makalu ma vita ye akwa mvalu? 25 Owau, nga ke mu lutumu lwa Yave ko ntombokele oku fulu kiaki kimana yafwasa kio? Yandi kibeni Yave umpovese vo: ‘Tomboka wanuanisa e nsi yayi yo fwasa yo.’”

26 Muna kuma kiaki, Eleyakime wa mwan’a Kilekiya yo Sebena+ yo Yoake bavovese Rabesake vo:+ “Dodokolo, vovesela e ntaudi zaku muna nding’a Ki-aramiti,*+ kadi bakula kweto tubakula yo; kutuvovesela mu nding’a Ayuda ko, kadi nkangu una vana yaka mu wá bena.”+ 27 Kansi, Rabesake ubavutwidi vo: “Nga o mfumu ame kwa mfumu eno ye kwa yeno kaka kantumini yavova mambu mama? Nga ke kwa nkangu mpe ko una ufongele vana yaka, una udia e mvindu au a vumu yo nua masuba mau kumosi yo yeno e?”

28 I bosi, Rabesake otelamene, okazidi muna nding’a Ayuda, oku vo: “Nuwá e mvovo mia ntinu anene, o ntinu a Asuri.+ 29 I wau wuwu kavovele o ntinu: ‘Ke nuyambula ko vo Kizekeya kanuvuna, kadi kalendi kunuvuluza ko ova moko mame.+ 30 Ke nuyambula ko vo Kizekeya kanufila nuabunda e vuvu muna Yave, oku vo: “O Yave vuluza kikilu kekutuvuluza, e mbanza yayi ke iyekolwa vana moko ma ntinu a Asuri ko.”+ 31 Ke nuwila Kizekeya ko, kadi i wau wuwu kavovele o ntinu a Asuri: “Nuvanga yame luvuvamu, nuyitambika,* konso muntu muna yeno odia e bundu ya nsing’andi a vinyu ye bundu ya nsand’andi yo nua maza ma sima kiandi, 32 yavana ikwiza, yanunata muna nsi yafwanana ye nsi eno,+ nsi a masa ye vinyu yampa, nsi a mbolo ye mpatu za vinyu, nsi a olive ye wiki. Nukwamanana zinga, ke nufwa ko. Ke nuwila Kizekeya ko, kadi vuna kekunuvunanga ekolo kevovanga vo: ‘Yave okutuvuluza.’ 33 Nga vena ye mosi muna nzambi za zula ona wavuluza e nsi andi ova moko ma ntinu a Asuri? 34 Akweyi zina e nzambi za Kamati+ ye Ampadi? Akweyi zina e nzambi za Sefavayime,+ Ena ye Iva? Nga nzambi zazi zavuluza e Samaria ova moko mame?+ 35 Muna nzambi zawonso za nsi zazi, nkia nzambi yavuluza e nsi andi ova moko mame? Nga o Yave olenda vuluza e Yerusaleme ova moko mame?”’”+

36 Kansi, nkangu ukedi kaka e pi-i, ke bamvutwidi kana diambu dimosi ko, kadi o ntinu wakanikina vo: “Ke numvani mvutu ko.”+ 37 Kansi, Eleyakime wa mwan’a Kilekiya, ona wavitanga o ntu muna nzo,* yo Sebena wa nsoneki yo Yoake wa mwan’a Asafi wa nsoneki a lusansu, bele kwa Kizekeya ye mvuatu miau miatiazuka, banzayisi e mvovo mia Rabesake.