Nkand’a Yakobo

3 Ke yeno awonso ko nufwete kala alongi, e mpangi zame, wau tuzeye wo vo mfundisa isundidi e mpasi tutambula.+ 2 Kadi yeto awonso nkumbu miayingi tutanga e sakuba.*+ Avo muntu ke tanga sakuba ko muna mvovo, i muntu alunga, olenda yala nitu andi yawonso. 3 Avo tusidi bindikilwa muna nua mia mvalu kimana batulemvokela, tufila mpe nitu zau zawonso. 4 Tala mpe nzaza: Kanele vo zanene kikilu yo filakeswa kwa tembwa yangolo, zifilwanga kwa bindikilwa yandwelo kikilu konso kuna kazolele o mbindiki.

5 Diau dimosi, o lubini mpe kîkwa kiandwelo muna nitu, kansi lukuyisananga muna mambu manene. Nutala, una fitiya fiyo⁠kelanga e futa kiampwena! 6 O lubini mpe i tiya.+ O lubini i nza ya vilwa vana vena e yîkwa yeto, kadi lusafulanga nitu yawonso.+ Lukwikanga tiya muna zingu kia muntu, o tiya twandi tutwasanga lufwasu nze Ngeena.* 7 E mpila zawonso za bulu ya mfuta, ye nuni, ye má yiyatatanga, ye mbizi za kalunga, zilenda lemvolwa ye zilemvolwanga kwa wantu. 8 Kansi o lubini ke vena muntu ko olenda lo lemvola. Ke lulendi singikwa ko, lwambi kikilu, luzele ye nlongo mia mpondi.+ 9 I lwau tusanisinanga Yave,* wa Se, i lwau mpe tusibilanga wantu ana bavangilwa muna “fwaniswa kia Nzambi.”+ 10 Muna nua wau mosi i muvaikang’e nsambu ye sibu.

E mpangi zame, ke diansongi ko vo mambu mama mavangamena mu mpila yayi.+ 11 Nga muna nto imosi, mulenda vaika maza mambote ye mandudi e? 12 E mpangi zame, nga nsanda ulenda yima olive yovo nsing’a vinyu wayima bundu ya nsanda e?+ Muna maza ma mungwa ka mulendi tuka maza mambote ko.

13 Nani i nkwa ngangu ye umbakuzi vovo nuina e? Muna kadilu kiandi kiambote, yambula kasonga mavangu mandi kuna lulembamu lutukanga muna ngangu. 14 Kansi avo nuina ye zinu diandudi+ ye kimpala*+ muna ntima mieno, ke nuyisani ko,+ kadi avo nuvangidi wo vuna nuvunanga. 15 Ezazi ke ngangu zitukanga kuna ntandu ko; za nza kaka,+ za wantu ye za nkuya. 16 Kadi, konso vana vena kimpala ye ntantani,* i vena mpe mavuanga ye mambu mawonso mambi.+

17 Kansi e ngangu za ntandu, entete za velela,+ za luvuvamu,+ za ntim’anleka,+ nzaki zilemvokanga, zizele ye nkenda ye mbongo ambote,+ ke zisianga mpambula ko,+ ke za disu kunsi a lukaya ko.+ 18 Vo i mbongo a unsongi ikuninu muna luvuvamu,+ kw’awana bevanganga luvuvamu.+