Yeremiya

33 E diambu dia Yave diayiza kwa Yeremiya e ngiza yazole, ekolo kakala wakangama vana Yanzala kia Nyingidi,+ oku vo: 2 “I wau wuwu kavovele o Yave wa Mvangi a ntoto, Yave wavanga wo yo toma wo sikidisa; Yave i nkumbu andi, 3 ‘Umbokela, ikutambulwila yo kuzayisa mambu manene, mampimpita mana kuzeye ko.’”+

4 “Kadi i wau wuwu kavovele o Yave wa Nzambi a Isaele muna kuma kia nzo za mbanza yayi ye nzo za ntinu mia Yuda zina zabangulwa kimana zakakidila kundubulu ye nsololo,+ 5 muna diambu dia awana bezidi nuanisa Akaladi, bazadisi e fulu kiaki ye mavimbu m’awana yavondela muna makasi ye nsita zame, ana bena vo o bi wau wamfila yaswekela mbanza yayi e ndose ame: 6 ‘Vutulwisa ivutulwisa mo vimpi ye nsasuka,+ ikubawuka yo kubavana ulolo wa luvuvamu yo lutaninu.*+ 7 Ivutulwisa nkangu ame una wabakama, Yuda ye Isaele,+ ikubakumika nze una yavanga kuna lubantiku.+ 8 Ikubavelelesa muna bi wau wawonso una bansumukina,+ iloloka masumu mau mawonso ye makuzuka mau bansumukina.+ 9 E mbanza yayi ikala kwa mono se nkumbu a kiese, ya nkembo yo vienga vana ndose a zula yawonso ya nza ana bewa mawete mawonso mana ibavangidi.+ E zula imona wonga yo zakama+ mu kuma kia mawete mawonso ye luvuvamu ivana mwamu mbanza yayi.’”+

10 “I wau wuwu kavovele o Yave: ‘Muna fulu kiaki kina nuyikila vo kia mfuta, kiakondwa wantu ye bulu, muna mbanza za Yuda ye muna nzila za Yerusaleme zina zasala e nkatu, zakondwa wantu yovo nkangu ngatu twelezi, muwakana diaka 11 e ndinga za kiese yo luyangalalu,+ nding’a toko diansompi ye nding’a ndumb’ansompi, ndinga z’awana bevova vo: “Nuvana matondo kwa Yave a vu, kadi Yave wambote;+ o walakazi wandi wakwele mvu!”’+

“‘Betwasa tukau twa matondo muna nzo a Yave,+ kadi ivutulwisa abakami a nsi, nze kuna lubantiku,’ u kavovele o Yave.”

12 “I wau wuwu kavovele o Yave a vu: ‘Muna fulu kiaki kia mfuta, kiakondwa wantu ye bulu ye mbanza zandi zawonso, mukala diaka yo madilu muna avungudi bevundisila makambi mau.’+

13 “‘Muna mbanza za zunga ya miongo, muna mbanza za ndimba, muna mbanza za sude, muna nsi ya Benyamini, muna zunga ya Yerusaleme,+ muna mbanza za Yuda,+ avungudi betanga diaka mameme ekolo meviokela kuna nsi a moko mau,’ u kavovele o Yave.”

14 “‘Tala! E lumbu ikwiza,’ u kavovele o Yave, ‘ina ilungisa nsilu ambote una yasia mu kuma kia nzo a Isaele ye nzo a Yuda.+ 15 Muna lumbu yayina ye ntangwa yayina, imenesena Davidi tayi kia unsongi,*+ yandi otatidila unsongi ye ziku muna nsi.+ 16 Muna lumbu yayina Yuda ivuluzwa,+ Yerusaleme mu luvuvamu ikala.+ I wau wuwu keyikilwa: Yave i Unsongi Weto.’”+

17 “Kadi i wau wuwu kavovele o Yave: ‘Muna luvila lwa Davidi ke mukondwa muntu ko ovuanda vana kunda kia kimfumu kia nzo a Isaele,+ 18 yovo anganga Anelevi bakondwa muntu vana ndose ame ona oyoka yimenga, yoka tukau twa mbwaza yo kela yimenga.’”

19 E diambu dia Yave dizidi diaka kwa Yeremiya, oku vo: 20 “I wau wuwu kavovele o Yave, ‘Avo nukulula kangu diame dia mwini ye kangu diame dia fuku, muna kakidila mwini ye fuku walembi lwaka muna ntangw’andi,+ 21 ozevo e kangu diame yo Davidi wa selo kiame dikutuluka,+ i dianu vo ke kala yo mwana ko oyala se ntinu vana kunda kia kimfumu kiandi,+ ye kangu diame mpe dia nganga za Anelevi, bena vo selo yame.+ 22 Wauna e vu ya zulu ke ilendi tangilwa ko ye senge dia kalunga ke dilendi tezelwa ko, i una iwokesela wan’a* Davidi wa selo kiame ye Anelevi ana bekunsadilanga.’”

23 E diambu dia Yave dizidi diaka kwa Yeremiya, oku vo: 24 “Nga kuwidi ko dina divovanga nkangu wau, ‘Yave obembola makanda mau mole mana kasola’? Ke bezitisanga nkangu ame ko, ke bekubabadikilanga diaka ko se zula.

25 “I wau wuwu kavovele o Yave: ‘Wauna yasikidisila e kangu diame dia mwini ye fuku,+ nsiku* mia zulu ye ntoto,+ 26 kilendi bembola mbongo a Yakobo ko ye Davidi wa selo kiame, muna lembi sola ayadi muna mbongo andi kimana bayala mbongo ya Abarayama, Isaki yo Yakobo. Kadi ivutulwisa diaka abakami au+ yo kubafwila e nkenda.’”+