Wantete wa Ntinu

22 Ke vakala vita ko vana vena Suria ye Isaele mu mvu ntatu. 2 Muna mvu una watatu, Yosafate+ wa Ntinu a Yuda, okulumukini kwa ntinu a Isaele.+ 3 O ntinu a Isaele ovovese ntaudi zandi vo: “Nga ke nuzeye wo ko vo Ramote-ngiladi+ i yeto e? Kansi, twakinu yo lukatikisu lwa kutumuna yo vana moko ma ntinu a Suria.” 4 I bosi, ovovese Yosafate vo: “Nga okwenda yame muna nuanisa Ramote-ngiladi?” Yosafate ovutwidi kwa ntinu a Isaele vo: “Ikwenda yaku. O nkangu ame ukala yo nkangu aku. E mvalu miame mikala ye mvalu miaku.”+

5 Kansi, Yosafate ovovese ntinu a Isaele vo: “Dodokolo, teka yuvula+ diambu dia Yave.”+ 6 Ozevo, o ntinu a Isaele okutakese ngunza, tezo kia 400, ubavovese vo: “Nga ngienda nuanisa Ramote-ngiladi yovo kiendi ko e?” Bamvutwidi vo: “Tomboka, kadi Yave oyekola yo vana moko ma ntinu.”

7 Yosafate ovovele vo: “Nga va fulu kiaki ke vena ngunz’a Yave ko? Yambula twayuvula Nzambi muna yandi.”+ 8 Muna diadi, ntinu a Isaele ovovese Yosafate vo: “Vena ye muntu mosi ona tulenda yuvulwila Yave;+ kansi kikunzolanga ko,+ kadi ke sakulanga mambu mambote ko mu kuma kiame, mambu mambi kaka.+ I Mikaya wa mwan’a Yimela.” Yosafate ovovele vo: “E ntinu, kuvovi wowo ko.”

9 Muna kuma kiaki, ntinu a Isaele obokele mbanda-mbanda mosi, umvovese vo: “Untwasila Mikaya wa mwan’a Yimela mu nzaki.”+ 10 O ntinu a Isaele yo Yosafate wa ntinu a Yuda bafongele konso muntu vana kunda kiandi kia kimfumu, bavuete mvuatu mia kintinu, vana bundilu diakala vana ndambu a vitu dia Samaria, ngunza zawonso zisakwidi vana bena.+ 11 Sedekiya wa mwan’a Kenana ukivangidi mpoka za sengwa, ovovele vo: “I wau wuwu kavovele o Yave, ‘Muna mpoka zazi obukumuna Asuria yavana okubafukisa.’” 12 E ngunza zawonso zisakwidi diambu diau dimosi, oku vo: “Tomboka kuna Ramote-ngiladi, okubasunda; Yave oyekola yo vana moko ma ntinu.”

13 Muntu ona wayenda bokela Mikaya umvovese vo: “Tala, ngunza zawonso basakwidi diambu diambote kwa ntinu. Dodokolo, yambula mvovo miaku miakala mpe miambote nze mvovo miau.”+ 14 Kansi, Mikaya ovovele vo: “Ndidi e ndofi muna Yave wa Nzambi amoyo, konso diambu kekumpovesa o Yave i diau ivova.” 15 I bosi, ukisunzwidi kwa ntinu, o ntinu unyuvuidi vo: “E Mikaya, nga twenda nuanisa Ramote-ngiladi yovo katwendi ko?” Vana vau, ovutwidi vo: “Tomboka, sunda osunda; Yave oyekola yo vana moko ma ntinu.” 16 O ntinu umvovese vo: “Nkumbu nkwa ikudisa e ndofi vo kumpovesa diambu diankaka ko, kansi umpovesa kaka e ludi muna nkumbu a Yave?” 17 Muna diadi, Mikaya umvutwidi vo: “Mbwene Aneyisaele awonso bamwanganene muna miongo+ nze mameme makondwa mvungudi. Yave ovovele vo: ‘Awaya ke bena ye mfumu ko. Yambula konso muntu kavutuka kuna nzo andi kuna luvuvamu.’”

18 O ntinu a Isaele ovovese Yosafate vo: “Kivovese wo ko vo, ‘Ke sakula mambu mambote ko mu kuma kiame, kansi mambu mambi kaka’?”+

19 Mikaya ovovele vo: “Nuwá e diambu dia Yave: Mbwene Yave ovuende vana kunda kiandi kia kimfumu,+ e vu kiawonso kia zulu kitelamene vana kena, kuna lunene ye kuna lumonso.+ 20 Yave ovovele vo: ‘Nani ovuna Akabi kimana katomboka yo bwila kuna Ramote-ngiladi?’ Mosi ovovele edi, mosi ovovele diankaka. 21 Vezidi mwanda umosi,*+ otelamene vana vena Yave, ovovele vo: ‘Mono ikumvuna.’ Yave unyuvuidi vo: ‘Aweyi okumvunina?’ 22 Ovutwidi vo: ‘Ivaika yo kituka se mwand’a luvunu muna nua mia ngunza zandi zawonso.’+ Ovovele vo: ‘Vuna okumvuna yo kunsunda. Wenda wo vanga.’ 23 Yave osidi mwand’a luvunu muna nua mia ngunza zaku zawonso,+ kansi Yave ovovele vo mpasi omona.”+

24 Sedekiya wa mwan’a Kenana ofinamene, owende Mikaya e mbata vana bundi, ovovele vo: “Mu nkia nzila o mwand’a Yave umpiokele muna vovana yaku?”+ 25 Mikaya umvutwidi vo: “Ozaya nzila yayi muna lumbu kina okota mu suku dia kati yo swekama.” 26 I bosi, o ntinu a Isaele ovovele vo: “Nubonga Mikaya nuamvutula kwa Amone wa mfumu a mbanza ye kwa Yoase wa mwan’a ntinu. 27 Ubavovesa vo: ‘I wau wuwu kavovele o ntinu: “Nusia muntu ndioyu muna pelezo,+ nundikila muna fimbolo yo maza yavana ivutuka kuna luvuvamu.”’” 28 Kansi, Mikaya ovovele vo: “Avo ovutukidi kuna luvuvamu, ozevo Yave kavovane yame ko.”+ Okudikidi vo: “Nuwá, yeno nkangu wawonso.”

29 Kansi, o ntinu a Isaele yo Yosafate wa ntinu a Yuda batombokele kuna Ramote-ngiladi.+ 30 Ntinu a Isaele ovovese Yosafate vo: “Ivuata mvuatu miankaka, ngienda kuna vita, kansi ngeye, vuata mvuatu miaku mia kintinu.” Ozevo, o ntinu a Isaele ovuete mvuatu miankaka+ yo kota muna vita. 31 O ntinu a Suria okanikini afidi 32 a makalu mandi ma vita vo:+ “Ke lunuanisa muntu ankaka ko, kakala nleke yovo mbuta, ntinu a Isaele kaka.” 32 Vava afidi a makalu ma vita bamona Yosafate, bavovele vo: “Ndioyu i ntinu a Isaele.” Ozevo, banlende banuanisa; Yosafate oyantikidi kaza yo lomba lusadisu. 33 Vava afidi a makalu ma vita bamona vo ke ntinu a Isaele ko, bayambwidi kunlanda.

34 Kansi, muntu mosi lembi wo kana otelese ntinu a Isaele nzanza muna mayikilu ma kinkutu kiandi kia sengwa.* Ntinu ovovese nati a kalu diandi dia vita vo: “Viluka, umpaikisa muna vita kadi ndwele.”+ 35 E vita ikedi kikilu yangolo e lumbu kiakina, o ntinu otelameso kaka muna kalu, okedi mantalani ye Asuria, otelamene muna kalu diandi dia vita. Menga mandi makukwidi muna kalu dia vita, ofwidi muna masika.+ 36 Muna ndimuk’a ntangwa, mboka yawakana vana vena makesa, oku vo: “Konso muntu muna mbanz’andi! Konso muntu muna nsi andi!”+ 37 Muna diadi, ntinu ofwidi, banete kuna Samaria; bazikidi ntinu kuna Samaria. 38 Vava basukwidi e kalu dia vita vana sima kia Samaria, e mbwa zivendele menga mandi, akembi bayolele vâna,* nze una Yave kavova.+

39 Vo i mambu mankaka ma lusansu lwa Akabi ye mawonso kavanga ye nzo* katungila muna meno ma nzamba+ ye mbanza zawonso katunga, nga ke masonama ko muna nkand’a lusansu lwa ntinu mia Isaele? 40 Akabi olele yo mase mandi;+ Akaziya+ wa mwan’andi oyantikidi yala vana fulu kiandi.

41 Yosafate+ wa mwan’a Asa wakituka se ntinu a Yuda muna mvu wa yá wa luyalu lwa Akabi wa ntinu a Isaele. 42 Yosafate mvu 35 kakala miau vava kayantika yala, mvu 25 kayala muna Yerusaleme. E nkumbu a ngudi andi, Azuba wa mwan’a Sileki. 43 Wadiatila muna nzila zawonso za Asa+ wa se diandi. Kavengomoka mo ko, wavanga mambu mansongi vana meso ma Yave.+ Kansi, mabata ke makatulwa ko, kadi o nkangu wakelanga kaka yimenga yo yoka ndumbu muna mabata.+ 44 Yosafate okedi kuna luvuvamu yo ntinu a Isaele.+ 45 Vo i mambu mankaka ma lusansu lwa Yosafate, mavangu mandi ye vita kanuana, nga ke masonama ko muna nkand’a lusansu lwa ntinu mia Yuda? 46 Wayinga mpe akembi amakala a tempelo,+ ana basala muna nsi muna lumbu ya Asa wa se diandi.+

47 Muna lumbu yayina ke mwakala ntinu ko muna Edome;+ nguvulu mosi wayalanga se ntinu.+

48 Yosafate ovangidi mpe nzaza za Tasisi zenda baka wolo+ kuna Ofire, kansi e nzaza ke zalwaka ko kadi zadimuka kuna Esio-ngebe.+ 49 Akaziya wa mwan’a Akabi ovovese Yosafate vo: “Yambula ntaudi zame benda kumosi ye ntaudi zaku muna nzaza,” kansi Yosafate katambulwidi ko.

50 Yosafate olele yo mase mandi,+ ozikilu yo mase mandi muna Mbanz’a Davidi wa nkulu andi; Yorame+ wa mwan’andi oyantikidi yala vana fulu kiandi.

51 Akaziya+ wa mwan’a Akabi okitukidi se ntinu a Isaele muna Samaria muna mvu wa 17 wa luyalu lwa Yosafate wa Ntinu a Yuda, mvu miole kayala muna Isaele. 52 Wavanganga mambu mambi vana meso ma Yave, wadiatila muna nzil’a se diandi+ ye ngudi andi+ ye muna nzil’a Yerobame wa mwan’a Nebate, ona wasumukisa Isaele.+ 53 Wakwamanana sadila Bale+ yo kunkunda yo kendeleka kikilu Yave wa Nzambi a Isaele,+ wauna se diandi kavanga.