Luvaiku

21 “Ezazi i nzengo za mfundisa okubazayisa:+

2 “Avo osumbidi ntaudi a Nyibere,+ mvu sambanu kesala se ntaudi, kansi muna mvu wansambwadi, ovaika se mvevoki lembi futa lekwa.+ 3 Avo yandi mosi kayiza, yandi mosi mpe kaka kevaika. Avo nkento kayiza yandi, ozevo okwenda kumosi yo nkaz’andi. 4 O mfumu andi avo nkento kamvana yo kunwutila wan’amakala yo wan’amakento, o nkento yo wana bekituka se vua dia mfumu andi, vo i yakala, yandi mosi kaka kevaika.+ 5 Kansi, avo ntaudi osiandamene yo vova vo: ‘Nzolele mfumu ame, nkaz’ame yo wan’ame; kizolele vaika se mvevoki ko,’+ 6 o mfumu andi kafwete kuntwasa vana ndose a Nzambi aludi. Kamfinamesa vana mwelo yovo vana lunzi dia mwelo, o mfumu andi okuntobola o kutu muna ntumbu, okala se ntaudi andi muna zingu kiandi kiawonso.

7 “Avo muntu otekele mwan’andi ankento se ntaudi, o mwana ndioyo ke vaika se mvevoki ko wauna uvaikilanga ntaudi ayakala. 8 Avo mfumu andi kanyangalele ko, kansolele ko se makangu mandi, kafwete yambula vo kasumbwa* kwa muntu ankaka, kansi kena yo nswa wakunteka kwa nzenza ko, kadi vunginika kamvunginikini. 9 Avo unsolele kakala nkaz’a mwan’andi ayakala, kafwete kumvana nswa nze mwan’andi ankento. 10 Avo obongele nkento ankaka, o madia, mvuatu yo nswa wa nkento+ antete* ke ufwete kululwa ko. 11 Avo kamvene lekwa tatu yayi ko, ozevo o nkento ovaika se mvevoki lembi futa nzimbu.

12 “Konso ona owanda muntu yo kumvonda, oyandi mpe kafwete vondwa.+ 13 Kansi, avo kavangidi wo ku lukanu ko, o Nzambi aludi oyambwidi vo diavangama, omono isonga kwa ngeye e fulu kina kalenda tinina.+ 14 Avo muntu ofungidi nkwandi makasi yo kumvonda kuna lukanu,+ o muntu ndioyu kafwete vondwa, kana nkutu vo wele tinina kuna ziku diame.+ 15 Ndiona owanda se diandi yovo ngudi andi, kafwete vondwa.+

16 “Konso ndiona oyiya muntu+ yo kunteka yovo kawanuka vana moko mandi,+ kafwete vondwa.+

17 “Konso ndiona osiba se diandi yovo ngudi andi, kafwete vondwa.+

18 “I diau diadi difwete vangama avo wantu wole bazonzele, omosi kawanda o nkwandi e tadi yovo nkome,* kafwidi ko, kansi okulukidi vana mfulu andi:* 19 Avo olendele telama yo vaika kuna mbazi muna lusadisu lwa nti, ozevo ndiona unwende ovevoka muna tumbu. Ofuta kaka e mfwilu mia ntangwa ina o mbevo kevidisa muna salu yandi yavana kesasuka e mvimba.

20 “Avo muntu owende nti kwa ntaudi andi ayakala yovo ntaudi andi ankento, kafwila vana koko kwandi, o ntaudi ndioyo kafwete landilwa e kunda.+ 21 Kansi, avo vaviokele lumbu kimosi yovo lumbu yole kafwidi ko, ke landilwa kunda ko, kadi o ntaudi mu nzimbu za mfumu andi kasumbilwa.

22 “Avo wantu benuananga, balumbamene nkento una ye vumu, o mwan’andi kavaika lembi lungila ngonde,*+ kansi ke vabwidi sumbula kia lufwa ko, ndiona owandamene o nkento kafwete futa vana meso ma afundisi konso kina kelombwa kwa yakala divuidi o nkento.+ 23 Kansi avo vabwidi sumbula kia lufwa, kafwete vana moyo mu moyo,+ 24 disu mu disu, dinu mu dinu, koko mu koko, kulu mu kulu,+ 25 via mu via, lwala mu lwala, vimba mu vimba.

26 “Avo muntu owende muna disu dia ntaudi andi ayakala yovo disu dia ntaudi andi ankento yo fwasa dio, oyambula ntaudi kavaika se mvevoki mu kuma kia disu diandi.+ 27 Avo okolele dinu dia ntaudi andi ayakala yovo dia ntaudi andi ankento, oyambula ntaudi kavaika se mvevoki mu kuma kia dinu diandi.

28 “Avo ngombe itudidi yakala yovo nkento kafwa, e ngombe yoyo ifwete tubwa matadi yavana ifwa,+ o nsuni andi ke ufwete diwa ko; kansi o mfumu a ngombe ke vewa tumbu ko. 29 Kansi, avo e ngombe fu kia tula wantu kena kiau, o mfumu andi olukisu, kansi kakangidi yo ko, avo ivondele yakala yovo nkento, e ngombe ifwete tubwa matadi, o mfumu andi mpe kafwete vondwa. 30 Avo olombelo lukûlu, kafwete futa konso kina kelombwa mu sumba o moyo andi. 31 Nzengo zau zimosi zifwete sadilwa mu kuma kia mfumu a ngombe avo e ngombe andi itudidi mwan’a toko yovo mwan’a ndumba. 32 Avo e ngombe itudidi ntaudi ayakala yovo ntaudi ankento, o mfumu a ngombe ofuta sekele* 30 kwa mfumu a ntaudi, vo i ngombe ivondelwa muna matadi.

33 “Avo muntu ofukwidi e wulu yovo otimini wulu yo lembi dio fukila, e ngombe yovo buluku diakoboka mo, 34 ndiona ovuidi e wulu kafwete futa o mfwilu wowo.+ Kafwete futa nzimbu kwa mfumu a bulu, e bulu kifwidi kikituka se kiandi. 35 Avo ngombe a muntu itudidi ngombe a muntu ankaka yo fwa, bafwete teka e ngombe a moyo yo kayana e nzimbu batekele yo; bafwete mpe kayana e bulu kifwidi. 36 Kansi, avo dizayakene vo e ngombe fu kia tula kena kiau, kansi o mfumu andi ke kangidilanga yo ko, ndiona ovuidi yo kafwete futa ngombe mu ngombe, e ngombe yafwa ikala se yandi.