Wantete wa Samuele

24 Saulu vava kavutuka muna landa Afelesetia, bansamunuini vo: “Tala, Davidi una muna makanga ma Engedi.”+

2 Saulu obongele 3.000 ma wantu basolwa muna Isaele yawonso, wele vavi Davidi ye wantu andi muna miongo mia nkombo za mfuta. 3 Saulu olweke muna mpaka za mameme za matadi muna nzila, kuna kwakala e nduka, okotele mo kawesa,* o Davidi ye wantu andi bakala muna kati kwa nduka.+ 4 Makesa ma Davidi bamvovese vo: “Ekiaki i lumbu kina Yave kavovele vo: ‘Ngiekwele mbeni aku vana moko maku,+ umvanga konso una ozolele.’” Davidi otelamene, wele yomboki, ozengele nsuk’a yunga kia Saulu kiakondwa moko. 5 I bosi, ntim’a Davidi uyantikidi* kuntumba+ wau kazengele nsuk’a yunga kia Saulu kiakondwa moko. 6 Ovovese wantu andi vo: “Muna vumi wame kwa Yave, kilendi vanga diambu diadi ko kwa mfumu ame wa kuswa kia Yave, kilambula koko kwame muna yandi ko, kadi kuswa kia Yave.”+ 7 Muna mvovo miami, Davidi osimini* wantu andi, kabayambwidi ko bavanga Saulu e mbi. Saulu ovaikidi muna nduka, wele kwandi.

8 I bosi Davidi ovaikidi muna nduka, obokele Saulu, oku vo: “E mfumu ame wa ntinu!”+ Vava Saulu katadidi kunima, Davidi ovumbamene, okundidi. 9 Davidi ovovese Saulu vo: “Ekuma owididi e mvovo mia wantu ana bavovele vo, ‘Davidi mbi kazolele kuvanga?’+ 10 O unu kiaki meso maku mamwene una Yave kayekolwele vana moko mame muna nduka. Vava bampovese vo yavonda,+ ifwididi e nkenda, mpovele vo: ‘Kilambula koko kwame muna mfumu ame ko, kadi yandi i kuswa kia Yave.’+ 11 E tata, tala nsuk’a yunga kiaku va moko mame; kadi vava nzengele nsuk’a yunga kiaku, kivondele ko. Owau, ozeye wo vo kina ye kani dia kuvanga mbi ko yovo kukolamena ngatu kusumukina,+ kanele vo okunkondanga wamponda.+ 12 Yambula Yave kakala mfundisi kwa ngeye yo mono,+ Yave olanda kunda kiame,+ kansi kilambula koko kwame muna ngeye ko.+ 13 Nze una uvovanga kingana kia nkulu: ‘Muna yimpumbulu i muvaikanga umpumbulu,’ kansi, omono kilambula koko kwame muna ngeye ko. 14 O ntinu a Isaele, nani kavaikidi e? Nani okondanga? Mbwa yafwa yovo mbwengene?+ 15 Yambula Yave kakala mfundisi, kazenga nkanu kwa mono yo ngeye, katala, kavovela diambu diame,+ ovanga unsongi yo kumvuluza vana moko maku.”

16 Davidi vava kamene vova mambu mama, Saulu oyuvuidi vo: “E mwan’ame Davidi, nga i ngeye?”+ Saulu oyantikidi dila muna nding’angolo. 17 Ovovese Davidi vo: “Ngeye u nkwa unsongi ke mono ko, kadi mambu mambote umpangidi, kansi mono ivutwidi e mbi.+ 18 Kieleka, o unu umpovese mambu mambote umpangidi wau olembele kumponda kanele vo Yave ungiekwele vana moko maku.+ 19 Kadi nkia muntu olenda solola mbeni andi, kanyambula kenda kwandi lembi kumvanga e mbi? Yave osinga kusenda+ mu kuma kia wete umpangidi o unu. 20 Owau, nzeye wo vo okituka se ntinu,+ e kintinu kia Isaele kisikila vana moko maku. 21 Undila e ndofi muna Yave+ vo kufukisa mbongo ame ko ye kuvunzuna nkumbu ame ko muna nzo a se diame.”+ 22 Davidi odididi Saulu e ndofi, i bosi Saulu ovutukidi kuna nzo andi.+ Kansi, Davidi yo wantu andi, bele kuna tininu.+