Wantete wa Samuele

26 Esi Zifi+ bezidi kwa Saulu muna Ngibeya,+ bavovele vo: “Davidi oswekamene vana kundubulu kia Kakila kitalane ye Yesimone.”*+ 2 Saulu otelamene yo kulumuka ye 3.000 ma makesa basundidi muna Isaele, kavava Davidi kuna makanga ma Zifi.+ 3 Saulu osikidisi e ndo kuna mongo a Kakila utalanini ye Yesimone muna nzila. Davidi okedi muna makanga, owidi wo vo Saulu wizidi anlandi muna makanga. 4 Davidi otumini alangi benda zaya kana vo Saulu olweke. 5 I bosi, Davidi wele kuna ndo yakala Saulu, Davidi omwene fulu kina Saulu yo Abene+ wa mwan’a Ne, wa mfumu za makesa mandi baleka; Saulu waleka vana ndo, makesa mandi banzungidi. 6 Davidi oyuvuidi Akimeleke wa Nkete+ yo Abisai+ wa mwan’a Seruya+ wa mpangi a Yoabe vo: “Nani okwenda yame kwa Saulu kuna ndo?” Abisai ovutwidi vo: “Mono ikwenda yaku.” 7 Davidi yo Abisai bakotele muna ndo muna mpimpa, bawene Saulu waleka ye dionga diasumikwa vana ntoto vana ndambu a ntu andi; Abene ye makesa banzungidi.

8 Abisai ovovese Davidi vo: “O unu Nzambi oyekwele mbeni aku vana moko maku.+ Owau, dodokolo, yambula yantobola e dionga vana ntoto, nkumbu mosi kaka ikuntobola, kivutukila wo vanga ko.” 9 Davidi ovovese Abisai vo: “Kumvangi mbi ko, kadi nani olenda lambula koko muna kuswa kia Yave+ yo lembi nata nkanu?”+ 10 Davidi ovovele diaka vo: “Ndidi e ndofi muna Yave wa Nzambi amoyo, yandi kibeni Yave okumvonda,+ yovo e lumbu kia lufwa lwandi kisinga lwaka,+ yovo okulumuka kuna vita yo vondwa.+ 11 Mu kuma kia vumi wame muna Yave, kilendi lambula koko muna kuswa kia Yave ko.+ Owau, dodokolo, bonga e dionga ye nkalu a maza ina vana ndambu a ntu andi, twenda kweto.” 12 I dianu vo, Davidi obongele e dionga ye nkalu a maza vana ntu a Saulu, bele kwau. Ke muntu ko ubamwene,+ yovo zaya wo ngatu sikama, kadi yau awonso baleka bakedi, kadi Yave ubalekese tulu twangolo. 13 Davidi osaukidi kuna simu diankaka, babavavukidi yo telama vana ntandu a mongo, tini kiandá kiakala vana kati kwau.

14 Davidi obokele makesa yo Abene+ wa mwan’a Ne, oku vo: “E Abene, kuvana mvutu ko e?” Abene ovutwidi vo: “Ngeye u nani obokelanga o ntinu?” 15 Davidi ovovese Abene: “Nga ku yakala ko e? Nani ofwanane yaku muna Isaele? Ekuma kulangididi mfumu aku wa ntinu ko? Kadi muna ndo mukotele kesa dimosi kavonda o mfumu aku, o ntinu.+ 16 Diambu ovangidi ke diambote ko. I nkal’a Yave kaka, lufwa lunufwanukini, kadi ke nulangididi mfumu eno ko wa kuswa kia Yave.+ Akweyi dina e dionga dia ntinu ye nkalu a maza+ ina ikele kuna ntu andi?”

17 I bosi, Saulu ozayididi nding’a Davidi, ovovele vo: “E mwan’ame Davidi, nga i ngeye?”+ Davidi ovutwidi vo: “I mono, e mfumu ame wa ntinu.” 18 Oyuvuidi vo: “Ekuma e mfumu ame kelakamenanga ntaudi andi?+ Adieyi mpangidi? Nkia nkanu ndete?+ 19 Idodokele, e mfumu ame wa ntinu, wá mvovo mia ntaudi aku: Avo Yave ufididi wantelamena, yambula katambula* lukau lwame lwa mbwaza. Kansi avo wantu bafididi,+ basibwa vana vena Yave, kadi bangingidi o unu yalembi kala entwadi muna vua dia Yave,+ bavovele vo: ‘Wenda sadila nzambi zankaka!’ 20 Owau, kuyambula ko vo menga mame matiamunua vana ntoto, kuna kwandá ye dose a Yave, kadi o ntinu a Isaele ovaikidi, wele vavi mbwengene,+ nze muntu okondanga ngumbe muna miongo.”

21 Saulu ovutwidi vo: “Nsumukini.+ Vutuka, e mwan’ame Davidi, kadi kikuvanga diaka mbi ko, kadi o unu kiaki obadikidi moyo ame vo wantalu.+ Kieleka, dia uzowa mpangidi, sumu diampwena mpangidi.” 22 Davidi ovutwidi vo: “Tala e dionga dia ntinu. Tuma toko dimosi keza dio baka. 23 Yave ovutulwila konso muntu muna unsongi wandi+ ye ziku, kadi o unu, Yave uyekwele vana moko mame, kansi kilambwidi koko kwame muna kuswa kia Yave ko.+ 24 Kadi wauna mbadikidi moyo aku vo wantalu o unu kiaki, yambula moyo ame wakala wantalu vana meso ma Yave, yambula kampevola muna mpasi zame zawonso.”+ 25 Saulu ovovese Davidi vo: “Yambula wasambulwa, e mwan’ame Davidi. Osinga vanga mambu manene yo sikila.”+ Davidi wele kwandi, Saulu ovutukidi kuna fulu kiandi.+