Lusengomono kwa Yoane

4 I bosi, mbwene kielo kiaziuka kuna zulu, ngwidi ndinga antete ina nze mpungi, ivovane yame, oku vo: “Tomboka oku, ikusonga mambu mana mafwete vangama.” 2 Vana vau o mwand’a Nzambi ukulumukini omu mono, mbwene kunda kuna zulu ye ndiona ovuende vana kunda.+ 3 Ndiona ovuende vana kunda okezimanga nze tadi dia yasepi+ ye tadi dia sadio,* e nkongolo ina izietele e kunda, ikezimanga nze tadi dia emeraude.+

4 Muna nzunguluk’a kunda mukedi kunda 24, mbwene akuluntu 24 bavuende vana kunda yayi,+ bavuete mvuatu miampembe ye kolowa za wolo vana ntu miau. 5 Vana kunda vavaikidi nsemo,+ ndinga ye miandazi;+ vakedi minda nsambwadi miakwama vana ndose a kunda, e minda miami, mianda nsambwadi mia Nzambi misunzulanga.+ 6 Vana ndose a kunda vakedi ye lekwa nze mbu wa pelo+ ye tadi dia kristale.

Vana kati kwa kunda ye muna nzunguluk’a kunda mukedi ye vangwa yá yamoyo+ yazala yo meso ku ntwala ye ku nima. 7 E vangwa kiantete kiamoyo kikedi nze nkosi,+ e vangwa kianzole kiamoyo kikedi nze mwan’a ngombe,+ e vangwa kiatatu kiamoyo+ kikedi ye ndose nze ya muntu, e vangwa kia yá kiamoyo+ kikedi nze ngo-zulu itilumukanga.+ 8 Konso vangwa muna vangwa yayi yau yá yamoyo, kikedi yo mave masambanu; mave mau mawonso mazala yo meso kuna nsi yo kuna ntandu.+ Ivovanga fuku yo mwini vo: “Wavauka, wavauka, wavauka o Yave*+ wa Nzambi a Mpungu-ngolo, ndiona wakala, ndiona una ye ndiona okwiza.”+

9 Konso ntangwa e vangwa yamoyo ivananga nkembo yo zitu yo matondo kwa Ndiona ovuende vana kunda, Ndiona ozinganga yamu mvu ya mvu,+ 10 akuluntu 24+ befukamanga vana ndose a Ndiona ovuende vana kunda yo sambila Ndiona ozinganga yamu mvu ya mvu yo tuba e kolowa yau vana ndose a kunda, yo vova vo: 11 “E Yave* wa Nzambi eto, ngeye ofwene tambula nkembo+ yo zitu+ ye ngolo,+ e kuma kadi ngeye wasema lekwa yawonso,+ muna luzolo lwaku inina yo semwa.”