Yesaya

39 Muna ntangwa yayina, o ntinu a Babele, Merodake-baladani wa mwan’a Baladani, otwikidi e nkanda yo lukau kwa Kizekeya,+ kadi owidi wo vo yela kayelele, owau osasukidi.+ 2 Kizekeya ubatambwidi ye kiese kiawonso* yo kubasonga e nzo a tusalu twandi+—e palata, wolo, mazi ma balasamu yo mazi mankaka mantalu, e nuaninua yandi yawonso ye lekwa yawonso yakala muna tusalu twandi. Ke mwakala lekwa ko muna nzo andi* ye muna luyalu lwandi lwawonso kina o Kizekeya kalembi kubasonga.

3 I bosi, Yesaya wa ngunza wizidi kwa Kizekeya wa ntinu, unyuvuidi vo: “Nkia diambu bavovele o wantu awaya ye akweyi batukidi?” Kizekeya ovutwidi vo: “Ku nsi yandá batukidi, kuna Babele.”+ 4 I bosi, Yesaya oyuvuidi vo: “Nki bamwene omu nzo aku?”* Kizekeya ovutwidi vo: “Bamwene lekwa yawonso ina omu nzo ame.* Ke muna lekwa ko muna tusalu twame kina ndembele kubasonga.”

5 I bosi, Yesaya ovovese Kizekeya vo: “Wá e diambu dia Yave a vu: 6 ‘Tala! Muna lumbu ikwiza, e lekwa yawonso ina muna nzo aku* ye yawonso yalunda akulu aku yamu unu kiaki, inatwa kuna Babele. Ke musala lekwa ko,’+ u kavovele o Yave.+ 7 ‘Ankaka muna wan’aku ana owuta, natwa benatwa yo kituka se mbanda-mbanda muna lûmbu lwa ntinu a Babele.’”+

8 Muna diadi, Kizekeya ovovese Yesaya vo: “E diambu dia Yave dina ovovele diambote.” I bosi, okudikidi vo: “Diambote wau vo vekala ye luvuvamu yo lutaninu* muna kolo kia zingu kiame.”*+