Daniele

4 “Wa Nebukandesa wa ntinu, kuna kwa nkangu miawonso ye zula ye ndinga zikalanga ova nza yawonso: Yambula luvuvamu lweno lwawokela! 2 Ngina ye kiese kiasamuna e sinsu ye masivi ma Nzambi wa Mpungu-nene oma kampangidi. 3 Ekwe o nene wa sinsu yandi yo nkum’a masivi mandi! E kintinu kiandi kia mvu ya mvu, o luyalu lwandi lwa mbandu ke mbandu.+

4 “Omono Nebukandesa, yavuvama yakala muna nzo ame, mambu mawonso mambote makala muna lûmbu lwame. 5 Yalota ndozi yambwesesa wonga. Ekolo yakala vana mfulu ame, e fwaniswa ye mona-meso yamona yambwesesa wonga.+ 6 I dianu vo, yakanikina vo batwasa ova ndose ame akwa ngangu awonso a Babele kimana bansasila e ndozi.+

7 “I bosi e nganga za mpandu, nganga za ngombo, Akaladi* ye afimpi a ntetembwa+ bezidi. Vava yabazayisa e ndozi ina yalota, ke balendele yo kunsasila ko.+ 8 I bosi, Daniele ona wavewa e nkumbu a Beletesasa+ (mun’owu wa nkumbu a nzambi ame)+ wayiza ova ndose ame, muna yandi mwakala mwand’a nzambi zavauka,+ yanzayisa e ndozi:

9 “‘E Beletesasa wa mfumu a nganga za mpandu,+ ntomene wo zaya vo e mwand’a nzambi zavauka una yaku,+ kavena mbumba ko ilutidi mpasi kuna kwa ngeye.+ I dianu vo, unzayisa e mona-meso ina mbwene muna ndozi ye nsas’andi.

10 “‘Muna mona-meso yamona vava yakala vana mfulu, yamona nti+ vana kati kwa nza, wandandalanda.+ 11 E nti waleva yo kumama, e nsuk’andi yalwaka kuna zulu, wamonekanga yakuna nsuk’a nza yawonso. 12 E makaya mandi mantoko, wakala ye bundu yayingi, mwakala ye madia ma vangwa yawonsono. E bulu ya mfuta yavavilanga e viozi kuna nsi, e nuni za zulu zazingilanga muna tayi yandi, e vangwa yawonso yamoyo* yadilanga mo.

13 “‘Muna mona-meso yamona vana mfulu ame, yamona nyingidi, mvauki, wakulumukanga kuna zulu.+ 14 Ovovele muna nding’angolo vo: “Nukesa nti,+ nuzenga tayi yandi, nukukumuna makaya yo mwanganesa e bundu yandi! Yambula bulu yatina kuna nsi; e nuni zatina muna tayi yandi. 15 Kansi, nusisa e sinza kiandi ye mianzi muna ntoto, nukanga kio kasu kia sengwa ye nsongo vana kati kwa titi ya mfuta. Nuyambula kiayondelekwa muna lowa dia zulu, e kunku kiandi kiakala ye bulu muna titi ya ntoto.+ 16 Yambula ntim’andi a kimuntu wasobwa, kavewa ntim’a bulu, yambula vamvioka+ kolo nsambwadi.+ 17 Owau i nkanikinu wa ayingidi+ ye ndomba y’aveledi, kimana awana bena moyo bazaya wo vo o Mpungu-nene i Nyadi muna kintinu kia wantu,+ ovananga kio kwa konso ona kazolele, kana nkutu kwa ndiona osundidi sakalala muna wantu.”

18 “‘Eyayi i ndozi ndotele, mono Nebukandesa wa Ntinu; owau ngeye, Beletesasa unzayisa e nsas’andi, kadi akwa ngangu akaka awonso muna kintinu kiame ke balendele yo kunsasila ko.+ Kansi ongeye olenda kwaku, kadi e mwand’a zinzambi wina yaku.’

19 “Vana vau, Daniele ona wavewa nkumbu a Beletesasa,+ oyangamene ntima mu fikolo, e ngindu zandi ziyantikidi kumwesesa wonga.

“O ntinu ovovele vo: ‘E Beletesasa, kuyambula ko vo e ndozi ye nsas’andi yamwesesa wonga.’

“Beletesasa ovutwidi vo: ‘E mfumu ame, yambula e ndozi yasadilwa kw’awana bekumenganga, e nsas’andi kwa mbeni zaku.

20 “‘O nti una wamona, waleva yo kumama, lá wandi walwaka kuna zulu, wamonekanga yamuna nsuk’a nza yawonso,+ 21 makaya mandi mantoko, wakala ye bundu yayingi, mwakala ye madia ma vangwa yawonsono. E bulu ya mfuta yavavilanga e viozi kuna nsi, e nuni za zulu zazingilanga muna tayi yandi,+ 22 o nti wau i ngeye, e ntinu, kadi okolele yo kumama, o nene waku uwokele yo lwaka kuna zulu,+ o luyalu lwaku yakuna nsuka za nza.+

23 “‘O ntinu wamona nyingidi, mvauki+ ona wakulumuka kuna zulu, ona wavovanga vo: “Nukesa nti yo fwasakesa wo, kansi nusisa e sinza kiandi ye mianzi muna ntoto, nukanga kio kasu kia sengwa ye nsongo vana kati kwa titi ya mfuta. Nuyambula kiayondelekwa muna lowa dia zulu, e kunku kiandi kiakala ye bulu muna titi ya ntoto yavana kivioka kolo nsambwadi.”+ 24 Eyayi i nsasa, e ntinu; i nzengo za Mpungu-nene zilwakila mfumu ame wa ntinu. 25 Yingwa oyingwa vana vena wantu, ozingila vana vena bulu ya mfuta, odiswa titi nze ngombe; oyondalala ye lowa dia zulu,+ kolo nsambwadi+ ikuvioka,+ yavana ozaya wo vo Mpungu-nene i Nyadi muna kintinu kia wantu, ovana kio kwa konso ndiona kazolele.+

26 “‘Kansi, wau bavovele vo basisa e sinza kia nti ye mianzi miandi,+ e kintinu kiaku kivutuka diaka kwa ngeye vava ozaya wo vo zulu diyalanga. 27 Dianu vo, e ntinu, tambulwila luludiku lwame. Yambula masumu maku yo bi waku, vanga oma mansongi, wasonga nkenda kwa asukami. Muna mpila yayi, ovuatumuka yo zingila mu luvuvamu.’”+

28 Mawonso mama i mambu mabwila Nebukandesa wa Ntinu.

29 Vava kiavioka ngonde kumi ye zole, o ntinu wakangalanga vana nludi a lûmbu lwa kintinu kuna Babele. 30 O ntinu ovovele vo: “Nga ke yau yayi ko e Babele Yanene, eyi yatungila e nzo a kintinu muna ngolo ye nkum’ame, muna nkembo wa zitu wame?”

31 Ekolo diambu diakala muna nu’a ntinu, e ndinga itukidi kuna zulu vo: “Wau i nsamu kwa ngeye, e Nebukandesa wa Ntinu, ‘E kintinu kikatukidi muna ngeye,+ 32 oyingwa vana vena wantu. E fulu kiaku kiazingila kikala vana vena bulu ya mfuta, odiswa titi nze ngombe; kolo nsambwadi ikuvioka yavana ozaya wo vo Mpungu-nene i Nyadi muna kintinu kia wantu, ovana kio kwa konso ona kazolele.’”+

33 Vana vau, e diambu dilungane muna Nebukandesa. Oyingilu vana vena wantu, oyantikidi dia titi nze ngombe, e nitu andi iyondalele ye lowa dia zulu, yavana nsuki zandi zakituka zandá nze nsala za ngo-zulu, e nzala zandi nze nzala za nuni.+

34 “Kuna mfoko a kolo kiakina,+ mono Nebukandesa, yatala kuna zulu, o zayi wame wamvutukila; yakembelela Mpungu-nene. Yavana nkembo kwa ndiona okalanga yamu mvu ya mvu; kadi e kimfumu kiandi i kimfumu kiakwele mvu, e kintinu kiandi kia mbandu ke mbandu.+ 35 Wantu a nza yawonso babadikilu nze mwaya vana kena, ovangilanga mambu mun’owu wa luzolo lwandi kuna kwa vu kia zulu yo wantu a nza. Ke vena muntu ko olenda kunkakidila+ ngatu kumvovesa vo: ‘Adieyi ovangidi?’+

36 “Muna ntangwa yayina, o umbakuzi wame wamvutukila, o nkembo a kintinu kiame, zitu wame yo wete wame wamvutukila.+ E mbanda-mbanda zame ye azitu bampavidi ye sungididi kiawonso; mvutukidi vana kunda kia kimfumu kiame, nkudikilu e tunda dianene.

37 “Owau, mono Nebukandesa nsanisini yo kembela yo tundidika Ntinu a zulu,+ kadi mavangu mandi mawonso makieleka e nzila zandi zansongi,+ wau vo olenda kulula awana bekangadilanga kuna lulendo.”+