Wantete wa Yoane

5 Konso muntu okwikilanga vo Yesu i Kristu, o muntu ndioyo mwan’a Nzambi,+ konso ona ozolanga Nzambi, ozolanga mpe wan’a Nzambi. 2 I wau wuwu tuzayidi wo vo wan’a Nzambi tuzolanga,+ vava tuzolanga Nzambi yo lemvokela e nkanikinu miandi. 3 Kadi e nsas’a zola Nzambi i yau yayi: twalemvokelanga nkanikinu miandi;+ e nkanikinu miandi ke miampasi ko,+ 4 kadi konso ona wawutwa* kwa Nzambi osundanga e nza.+ E nsunda eyi isundanga e nza i yau yayi: o lukwikilu lweto.+

5 Nani olenda sunda e nza?+ Nga ke ndiona ko okwikilanga vo Yesu i Mwan’a Nzambi e?+ 6 I yandi ndioyo wayizila muna maza yo menga, Yesu Kristu, ke muna maza kaka ko,+ kansi muna maza yo menga.+ Mwanda usianga kimbangi,+ kadi o mwanda i ludi. 7 Kadi lekwa tatu isianga kimbangi: 8 mwanda,+ maza+ yo menga;+ yau tatu ngwizani ina.

9 Avo tutambulwidi kimbangi kia wantu, e kimbangi kia Nzambi kisundidi. Kadi i kiau kiaki e kimbangi kasia o Nzambi, kimbangi mu kuma kia Mwan’andi. 10 Ndiona okwikilanga muna Mwan’a Nzambi, una ye kimbangi muna yandi kibeni. Ndiona ke kwikilanga muna Nzambi ko, unkitwidi se nkwa luvunu,+ kadi kakwikidi ko muna kimbangi kasia o Nzambi mu kuma kia Mwan’andi. 11 I kiau kiaki e kimbangi, Nzambi watuvana moyo a mvu ya mvu,+ o moyo wau muna Mwan’andi una.+ 12 Ndiona una yo Mwana, una yo moyo wau; ndiona kena yo Mwan’a Nzambi ko, kena yo moyo wau ko.+

13 Inusonekène mambu mama kimana nuazaya wo vo moyo a mvu ya mvu luna wau,+ oyeno lukwikilanga muna nkumbu a Mwan’a Nzambi.+ 14 Ekiaki i ziku* tuna kiau kwa yandi,+ konso diambu tulomba mun’owu wa luzolo lwandi, wá ke kutuwá.+ 15 Wau tuzeye wo vo wá kekutuwa muna konso diambu tulombanga, tuzeye wo mpe vo tutambula mana tulombele, wau vo kwa yandi tulombele mo.+

16 Avo muntu omwene mpangi andi osumukini sumu dina vo ke difilanga ku lufwa ko, olomba kwa Nzambi, oyandi okumvana o moyo.+ E ndomba yayi y’awana kaka besumukanga e sumu dina vo ke difilanga ku lufwa ko.+ Vena ye sumu dia lufwa. Mu kuma kia sumu diadi, kimvovese ko vo kalomba. 17 O vilwa wawonso i sumu,+ kansi vena ye sumu dina vo ke difilanga ku lufwa ko.

18 Tuzeye wo vo konso ona wawutwa kwa Nzambi ke kuyivananga mu sumu ko, kadi ndiona* wawutwa kwa Nzambi okunlunga-lunganga, ndiona wambi kalendi kumvanga mbi ko.*+ 19 Tuzeye wo vo kwa Nzambi tuvuilu, kansi e nza yawonso ina muna wisa kia ndiona wambi.+ 20 Tuzeye wo mpe vo Mwan’a Nzambi wayiza,+ watuvana ngangu kimana twavua zayi wa ndiona wa ludi. Muna Mwan’andi Yesu Kristu twinina entwadi ye ndiona wa ludi.+ Ndioyo i Nzambi aludi ye tuku dia moyo a mvu ya mvu.+ 21 E wan’ame anzolwa, nuyikeba muna teke.+