Wanzole wa Tusansu

9 O ntinu ankento a Seba+ vava kawá e nsangu mu kuma kia Solomo, wayiza muna Yerusaleme kantonta muna yuvu yampimpita.* Wayiza ye ndong’ayingi ya wantu, samo zanatanga mazi ma balasamu ye ulolo wa wolo+ ye matadi mantalu. Ukisunzuidi kwa Solomo, umvovese mawonso makala muna ntim’andi.+ 2 Solomo ovene mvutu za yuvu yandi yawonso. Ke vakala diambu diasunda e mpasi* ko kwa Solomo muna kunsasila.

3 Vava ntinu ankento a Seba kamona e ngangu za Solomo+ ye nzo ina katunga,+ 4 ye madia vana meza mandi,+ mpila ina bavuandilanga e ntaudi zandi, salu kia asadi ana basianga madia vana meza, mvuatu miau, atambiki a mbungwa ye mvuatu miau ye yimenga ya ngioka katambikanga ntangwa zawonso muna nzo a Yave,+ kakala diaka y’edi diavova ko.* 5 Ovovele kwa ntinu vo: “E nsangu yawidi kuna nsi ame mu kuma kia mavangu maku* ye ngangu zaku, za ludi. 6 Kansi, kiakwikila zo ko yavana ngizidi kuyimwena omu meso mame.+ Dialudi vo, ke bansamunuina kana nkutu ndambu ko muna ngangu zaku zayingi.+ Osundidi kikilu oma yawidi mu kuma kiaku.+ 7 Kiese kwa wantu aku, kiese kwa selo yaku ana betelamanga ova ndose aku ntangwa zawonso yo wá e ngangu zaku! 8 Yambula Yave wa Nzambi aku kakembelwa, ona uyangalele yo kuvuandisa vana kunda kiandi kia kiamfumu se ntinu mu kuma kia Yave wa Nzambi aku. Kadi Nzambi aku ozolele Isaele,+ ozolele mpe vo nkangu wau wasikila yakwele mvu, utumbikidi se ntinu wasikidisa unsongi ye ziku.”

9 Ovene kwa Solomo wa ntinu 120 ma talanta* za wolo+ ye ulolo wa mazi ma balasamu ye matadi mantalu. Solomo wa Ntinu+ kasidi vewa ulolo wa mazi ma balasamu ko nze mana kavewa kwa ntinu ankento a Seba.

10 E ntaudi za Kirami ye ntaudi za Solomo ana batwasa wolo tuka kuna Ofire,+ batwese mpe ulolo wa mabaya ma alengume ye matadi mantalu.+ 11 Muna mabaya ma alengume, o ntinu ovangidi sikada za nzo a Yave+ ye za nzo a* ntinu,+ nsambi ye masikilu ma ayimbidi.+ E mabaya mama ke mateka moneka ko muna nsi a Yuda.

12 Solomo wa ntinu ovene mpe kwa ntinu ankento a Seba yawonso kazolele ye ina kalombele, lekwa ina kamvene isundidi* ina katwasila ntinu. I bosi, ovaikidi, ovutukidi kuna nsi andi ye ntaudi zandi.+

13 E zitu dia wolo katambulanga o Solomo muna mvu mosi, 666 za talanta za wolo,+ 14 vana ntandu a wolo una akiti batwasanga ye nluta mia ateki y’emi mia ntinu miawonso mia Arabia ye nguvulu za nsi ana batwasanga wolo ye palata kwa Solomo.+

15 Solomo wa ntinu ovangidi 200 za ngubu zanene za wolo wasangwa e mbodi,+ (konso ngubu yakala ye 600 za sekele* za wolo)+ 16 ye 300 za ngubu zakete* za wolo wasangwa e mbodi (mina* tatu mia wolo miakala muna konso ngubu yakete). Ntinu osidi zo muna Nzo ya Mfind’a Lebanone.+

17 Ntinu ovangidi mpe kunda kianene kia kimfumu kia meno ma nzamba, olengele kio wolo walembi sangwa lekwa.+ 18 Vakala ye sikada ya ntombokelo sambanu muna lwaka vana kunda, nsikinu’a tambi kia wolo kialamikwa muna kunda kia kimfumu, kiakala ye moko mole muna ndambu, vana konso ndambu vatelameswa teke kimosi kia nkosi.+ 19 Nkosi 12+ zasiwa vana ntombokelo sambanu, nkosi mosi mosi kuna konso sambu dia ntombokelo. Ke mwakala kintinu ko kiavanga e kunda kia kimfumu nze kiakina. 20 E mbungwa zawonso za Solomo wa Ntinu za wolo, e salanganu yawonso ya Nzo a Mfind’a Lebanone ya wolo walembi sangwa lekwa. Ke mwakala salanganu kia palata ko, kadi muna lumbu ya Solomo+ e palata ke yakala mfunu ko. 21 Kadi nzaza za ntinu zayendanga kuna Tasisi+ ye ntaudi za Kirami.+ Muna mvu tatu e nzaza za Tasisi nkumbu mosi zatwasanga wolo, palata, meno ma nzamba,+ nkewa ye pavone.*

22 Solomo wa ntinu waluta e ntinu miawonso mia nza muna kimvuama ye ngangu.+ 23 Atinu a nza yawonso bavavanga kwenda mokena yo* Solomo mu wá ngangu zina Nzambi aludi kasia muna ntim’andi.+ 24 Bantwasilanga tukau—salanganu ya palata, ya wolo, mvuatu,+ nuaninua, mazi ma balasamu, mvalu ye mula—bavanganga wo mvu ke mvu. 25 Solomo wakala ye 4.000 ma masuku ma lundila mvalu mu kuma kia mvalu miandi ye makalu ma vita, 12.000 ma mvalu,*+ osidi mio muna mbanza za makalu ma vita, lukufi yo ntinu muna Yerusaleme.+ 26 O Solomo wayala ntinu miawonso tuka kuna Nzadi* yakuna nsi ya Afelesetia yakuna mwingilu a Engipito.+ 27 O ntinu owokese palata muna Yerusaleme nga matadi, e mabaya ma nsedele nga nsanda muna Sefela.+ 28 Batwasilanga Solomo mvalu tuka kuna Engipito+ yamuna nsi zawonso.

29 Vo i mambu mankaka ma lusansu lwa Solomo,+ tuka kuna lubantiku yakuna mbaninu, nga ke masonama ko muna nkanda mia Natani+ wa ngunza, muna ungunza wa Akiya+ wa musi Silo ye muna nkanda mia mona-meso ya Ido+ wa moni muna kuma kia Yerobame+ wa mwan’a Nebate? 30 Solomo mvu 40 kayala Isaele yawonso muna Yerusaleme. 31 I bosi, Solomo olele yo mase mandi. Banzikidi muna Mbanz’a Davidi wa se diandi;+ o mwan’andi Rekabame oyantikidi yala vana fulu kiandi.+