Ntalu

14 O nkangu awonso vava uwidi mana mavovele amfumu, bazangwidi e ndinga yo kwamanana dila muna fuku wauna wawonso.+ 2 Aneyisaele awonso bayantikidi yidimina Mose yo Arone,+ o nkangu awonso uvovel’e mbi mu kuma kiau, oku vo: “Ekwe, kele nkutu twafwila kweto muna nsi ya Engipito yovo kele nkutu twafwila kweto mu makanga mama! 3 Ekuma Yave katutwasidi omu nsi yayi twafwila muna nsosolo?+ Akento eto yo wan’eto benatwa se sanzu.+ Nga ke diambote ko twavutuka kuna Engipito?”+ 4 Bavovazianini vo: “Tuyisolela mfidi, twavutuka kuna Engipito!”+

5 Muna kuma kiaki, Mose yo Arone bavumbamene ye ndose zau vana ntoto vana vena e nkutakani yawonso ya Aneyisaele. 6 Yosua+ wa mwan’a Nuni yo Kalebe+ wa mwan’a Yefune, ana bakala muna buka ki’awana bayenda langa e nsi, batiazwini e mvuatu miau, 7 bavovese nkangu awonso a Isaele vo: “E nsi ina twayele langa yambote, nsi yambote kikilu.+ 8 Avo Yave utuyangalele, kalukatikisu ko okutukotesa muna nsi yoyo ye okutuvana yo, e nsi ina ifwamfumukanga kimvumina yo wiki.+ 9 Kansi, ke nukolamena Yave ko, ke numoni wonga wa nkangu a nsi+ yoyo ko, kadi sunda tukubasunda.* O lutaninu lwau lubakatwilu, oyeto+ tuna yo Yave. Ke nubamoni wonga ko.”

10 Kansi, o nkangu awonso uvovele vo babatuba matadi.+ Kansi, o nkembo a Yave umonekene kwa nkangu awonso a Isaele+ vana saba kia wananina.

11 I bosi, Yave ovovese Mose vo: “Yamu nkia kolo o nkangu wau ukunkondwa o luzitu?+ Yamu nkia kolo balembi kunkwikila, kanele vo mpangidi masivi mayingi vana kati kwau?+ 12 Yambula yabafwasila muna vuku yo kubafukisa, vo i ngeye yakitula se zula kikubasunda+ o nene ye ngolo.”

13 Kansi, Mose ovovese Yave vo: “Ongeye wavaikisa o nkangu aku muna Engipito muna nkum’aku. Ozevo, avo ovangidi wo, esi Engipito bewá wo,+ 14 bezayisa wo kwa awana bezingilanga mu nsi yayi. Oyau mpe bawá kala vo ongeye Yave, una ova kati kwa nkangu wau+ ye omonekanga mantalani+ kwa yau. Ongeye i Yave, e tuti diaku ditelamanga vana ntandu au, okwendanga kuna ntwal’au muna lunzi dia tuti muna mwini ye muna lunzi dia tiya muna fuku.+ 15 Avo ovondele nkangu wau mu nkumbu mosi,* e zula ina yawá e nsangu za tunda diaku ivova vo: 16 ‘Yave kalendele nata nkangu wau ko muna nsi ina kadila e ndofi vo okubavana yo, i dianu kabavondele muna makanga.’+ 17 Owau e Yave, dodokolo, yambula o nene wa nkum’aku wazayakana, wauna wasia o nsilu vava wavova vo: 18 ‘O Yave, ke funganga makasi mu nzaki ko ye wazala yo walakazi,*+ ololokanga o bi yo makuzuka, kansi ke yambula tumba nkwa kuma ko, oyambula vo wana ye mbandu ina yantatu ye mbandu ina ya nyá,+ bamona e mpasi mu kuma kia bi wa mase mau.’ 19 Dodokolo, loloka o bi wa nkangu wau mun’owu wa walakazi waku wayingi, wauna ololokelanga nkangu wau tuka kuna Engipito yamu wau.”+

20 I bosi Yave ovovele vo: “Ibalolokele mun’owu wa mvovo aku.+ 21 Kansi, e nkal’ame kaka, e nza yawonso izala yo nkembo a Yave.+ 22 Vo i awana bamwene o nkembo ye sinsu+ mpangidi muna Engipito ye muna makanga, kansi bakwamanene kuntonta+ mu nkumbu kumi zazi yo lembi wila e ndinga ame,+ ke mosi ko 23 omona e nsi ina yadila e ndofi kwa mase mau. Ve, ke mosi ko muna awana balembi kunzitisanga omona yo.+ 24 Kansi, wau vo Kalebe+ wa selo kiame mwanda waswaswana kena wau ye okwamanananga kundanda yo ntima wawonso, ikunkotesa kieleka muna nsi ina kayele, e mbongo andi ivua e nsi.+ 25 Wau vo Aneyamaleke ye Anekenani+ muna ndimba bezingilanga, o mbazi nufwete vutuka yo kwenda kuna makanga muna nzil’a Mbu Ambwaki.”+

26 I bosi, Yave ovovese Mose yo Arone vo: 27 “Yamu nkia kolo o nkangu wau wambi ukwamanana kungidimina?+ Ngwidi mana Aneyisaele beyidiminanga mu kuma kiame.+ 28 Ubavovesa vo: ‘“E nkal’ame kaka,” u kavovele o Yave, “Wauna ngwidi nuvovele,+ i wau ikunuvanga! 29 Muna makanga mama i mu bwila mavimbu meno,+ elo, awonso bena ye kimbuta kia mvu 20 yovo vioka ana basonekwa, yeno awonso nuyidimini mu kuma kiame.+ 30 Ke mosi ko muna yeno okota muna nsi ina yadila e ndofi* vo ikunuvana yo,+ Kalebe kaka wa mwan’a Yefune yo Yosua wa mwan’a Nuni.+

31 “‘“Vo i wan’eno ana nuvovele vo bekituka se sanzu,+ yau bezaya e nsi ina nubembwele.+ 32 Kansi, o mavimbu meno mu makanga mama mebwila. 33 O wan’eno bekituka se avungudi muna makanga mu mvu 40,+ betumbwa mu kuma kia mavangu meno makondwa kwa kwikizi,* yavana e vimbu dieno diansuka dibwa muna makanga.+ 34 Nutumbwa mu mvu 40+ mu kuma kia bi weno, mun’owu wa lutangu lwa lumbu ina nulangidi e nsi, lumbu 40,+ konso lumbu mvu mosi, konso lumbu mvu mosi, muna mpila yayi i nuzayila e mfwilu mia kunkolamena.*

35 “‘“Omono Yave, mpovele wo. I wau wuwu ivanga kwa nkangu wau wawonso wambi, awana bavangidi e mfulu mu kuma kiame: Mu makanga mama befokokela, i mwamu befwila.+ 36 O wantu ana Mose katuma mu kwenda langa e nsi, ana bafila o nkangu awonso mu yidimina Mose vava bavutuka ye nsangu zambi mu kuma kia nsi,+ 37 elo, o wantu ana batwes’e nsangu zambi mu kuma kia nsi, betumbwa yo fwila vana ndose a Yave.+ 38 Kansi, o Yosua wa mwan’a Nuni yo Kalebe wa mwan’a Yefune, ana bakala muna buka kia awana bayenda langa e nsi, bekwamanana kieleka zinga.”’”+

39 Vava Mose kazayisa e mvovo miami kwa Aneyisaele awonso, o nkangu ukendalele kwayingi. 40 Basikamene muna mene-mene yo vava tomboka kuna ntandu a mongo, bavovele vo: “Twakubama twina mu tomboka kuna fulu kina Yave kavova, kadi tusumukini.”+ 41 Kansi Mose ovovele vo: “Ekuma nukolamenanga o nkanikinu a Yave? Ediadi ke disikila ko. 42 Ke nutomboki ko, kadi o Yave kena yeno ko; wana fwaswa nufwaswa kwa mbeni zeno.+ 43 Kadi, Aneyamaleke ye Anekenani bena kûna mu kununuanisa,+ bwa nubwa muna nsosolo. Wau vo nuyambwidi landa Yave, o Yave kekala yeno ko.”+

44 Kansi, muna lulendo lwawonso bele kuna ntandu a mongo,+ vo i nkel’a kangu dia Yave yo Mose ke bakatukidi vana kati kwa ndo ko.+ 45 I bosi, Aneyamaleke ye Anekenani ana bazingilanga kuna ntandu a mongo wowo, bakulumukini yo kubatufakesa, babamwanganese yakuna Korema.+