Levitiku

16 Yave omokene yo Mose vava kiafwa wana wole amakala a Arone wau bafinama Yave mu mpila yambi.+ 2 Yave ovovese Mose vo: “Vovesa Arone wa mpangi aku vo, kafwete kotanga mpamba-mpamba ko kuna fulu kiavauka,+ kuna nim’a rido,+ vana ntwal’a fukwa kina vana Nkel’a Kimbangi kimana kalembi fwa.+ Kadi muna tuti ikuyisunzulwila+ vana ntandu a fukwa.+

3 “Eyayi i lekwa Arone kenata vava kekota kuna fulu kiavauka: mwan’a ngombe a koko mu kuma kia lukau lwa sumu+ ye meme dia koko mu kuma kia lukau lwa ngioka.+ 4 Kafwete vuata e mvuela yavauka ya lino+ yo makupe*+ ma lino mu fukila nitu andi.* Okanga e mpond’a lino muna luketo+ ye mpu a nlele a lino vana ntu andi.+ E miami mvuatu miavauka.+ Oyowela muna maza+ yo vuata mio.

5 “Kafwete tambula kwa nkangu a Isaele+ wana wole a nkombo a makoko se lukau lwa sumu ye meme dimosi dia koko se lukau lwa ngioka.

6 “I bosi, Arone osunzula ngombe a koko a lukau lwa sumu mu kuma kiandi yo lomba luyambulwilu lwa masumu mandi+ ye ma esi nzo andi.

7 “Obonga nkombo zau zole yo sia zo vana ndose a Yave, vana mwelo a saba kia wananina. 8 Arone otelel’e nkombo zau zole e nkas’a mienze, nkas’a mienze mosi mu kuma kia Yave, e nkas’a mienze yankaka mu kuma kia Azazele.* 9 Arone osunzula e nkombo ibwididi e nkas’a mienze+ ya Yave, otambika yo se lukau lwa sumu. 10 Kansi, e nkombo ibwididi e nkas’a mienze ya Azazele ifwete twaswa yamoyo vana ndose a Yave kimana o luyambulwilu lwa masumu lwavangilwa vana ntandu andi. I bosi, e nkombo ya Azazele isindikwa kuna makanga.+

11 “Arone osunzula ngombe a koko a lukau lwa sumu yo lomba luyambulwilu lwa masumu mandi ye ma esi nzo andi; i bosi, ovonda e ngombe a koko a lukau lwa sumu.+

12 “I bosi, obonga yokelwa kia ndumbu+ kiazala yo makala ma tiya mabongelo vana ziku,+ vana ndose a Yave, obonga mpe moko mole mazala ye mfumfu a ndumbu yansunga,+ otwasa yo kuna nim’a rido.+ 13 Osia e ndumbu vana makala ma tiya vana ndose a Yave,+ o mwisi a ndumbu* ufukila e fukwa+ kia Nkel’a Kimbangi,+ kimana kalembi fwa.

14 “Obonga ndambu a menga ma ngombe a koko+ muna nlembo andi yo sonsesa mo vana ntwal’a fukwa, kuna ndambu a este. Muna nlembo andi i kesonsesela e ndambu a menga nkumbu nsambwadi kuna ntwal’a fukwa.+

15 “I bosi, ovonda e nkombo a lukau mu kuma kia masumu ma nkangu+ yo nata menga mandi kuna nim’a rido;+ muna menga mama,+ ovanga una kavangidi muna menga ma ngombe a koko; osonsesa mo kuna ntwal’a fukwa.

16 “O nganga olomba luyambulwilu lwa masumu ma fulu kiavauka mu kuma kia mavangu ma usafu ma Aneyisaele ye masumu mau,+ i wau wuwu kafwete vanga mu kuma kia saba kia wananina kina vana kati kwau, vana kati kwa mavangu mau ma usafu.

17 “Muna saba kia wananina ke mufwete kala muntu ankaka ko, tuka muna ntangwa o nganga kekota kuna fulu kiavauka mu lomba luyambulwilu lwa masumu yavana kevaika. Olomba luyambulwilu lwa masumu mu kuma kiandi, mu kuma kia esi nzo andi+ ye mu kuma kia nkutakani yawonso ya Isaele.+

18 “I bosi, ovaika yo kwenda vana ziku+ dina vana ndose a Yave, olomba luyambulwilu lwa masumu mu kuma kia ziku; obonga ndambu a menga ma ngombe a koko ye ndambu a menga ma nkombo, osia mo muna mpoka zawonso za ziku. 19 Osonsesa mpe ndambu a menga vana ziku muna nlembo andi nkumbu nsambwadi, kavelelesa dio yo vaula dio muna mavangu ma usafu ma Aneyisaele.

20 “Vava kefokola lomba luyambulwilu lwa masumu+ mu kuma kia fulu kiavauka, saba kia wananina ye ziku,+ osunzula mpe nkombo amoyo.+ 21 Arone otenseka moko mandi vana ntu a nkombo amoyo yo fungunuina vo e mpilakanu zawonso za Aneyisaele ye masumu mau mawonso; osia mo vana ntu a nkombo+ yo sindika yo muna makanga vana moko ma muntu wasolwa mu nata yo.* 22 E nkombo inata e mbi au yawonso+ muna nzanza.+ Oyandi osindika e nkombo muna makanga.+

23 “I bosi, Arone okota muna saba kia wananina, ovula e mvuatu mia lino mina kavuete vava kakotele vana fulu kiavauka yo sisa mio mûna. 24 Kafwete yowela* muna maza+ vana fulu kiavauka yo vuata e mvuatu miandi;+ i bosi ovaika yo tambika lukau lwandi lwa ngioka,+ lukau lwa ngioka lwa nkangu+ yo lomba luyambulwilu lwa masumu mandi ye masumu ma nkangu.+ 25 Ofutumuna mazi ma lukau lwa sumu vana ziku.

26 “O muntu osindikidi e nkombo a Azazele+ kafwete sukula e mvuatu miandi yo yowela muna maza, i bosi kekota muna ndo.

27 “E ngombe a koko ya lukau lwa sumu ye nkombo a lukau lwa sumu, ina o menga mau maneto vana fulu kiavauka mu lomba luyambulwilu lwa masumu, zinatwa kuna mbazi a ndo. E nkanda miau, nsuni miau ye madoti mau mafwete yokwa vana tiya.+ 28 O muntu oyoka e lekwa yayi kafwete sukula e mvuatu miandi yo yowela muna maza, i bosi kekota muna ndo.

29 “Owau ukala se nkanikinu a mvu ke mvu kwa yeno: muna ngonde yansambwadi, muna lumbu kia kumi kia ngonde yayi, nufwete kendalala* mu kuma kia masumu meno, ke nufwete sala konso salu ko,+ kiakala mungutukila yovo nzenza ona ozingilanga vovo nuina. 30 Muna lumbu kiaki, velombwa luyambulwilu lwa masumu+ mu kuma kieno kimana nuayikilwa vo nuavelela. Nukituka nuavelela muna masumu meno mawonso vana ndose a Yave.+ 31 Ekiaki lumbu kia vundu emvimba kwa yeno, nufwete kendalala mu kuma kia masumu meno.+ Owau nkanikinu a mvu ke mvu.

32 “O nganga ona okusilu o mazi+ yo tumbikwa* mu sala se ngang’ambuta+ vana fulu kia se diandi,+ olomba luyambulwilu lwa masumu yo vuata e mvuatu mia lino,+ e mvuatu miavauka.+ 33 Olomba luyambulwilu lwa masumu mu kuma kia fulu kiavauka,+ saba kia wananina+ ye ziku;+ olomba mpe luyambulwilu lwa masumu mu kuma kia anganga ye mu kuma kia nkangu awonso wa Isaele.+ 34 Owau ukala se nkanikinu a mvu ke mvu kwa yeno,+ mu lomba luyambulwilu lwa masumu ma Aneyisaele nkumbu mosi muna mvu,+ mu kuma kia masumu mau mawonso.”

Oyandi ovangidi wauna o Yave kakanikina kwa Mose.