Kuna Kwa Ayibere

10 O Nsiku i kini*+ kia mambu mambote mekwiza,+ kansi ke fwaniswa kibeni kia mambu ko, muna yimenga yau yimosi yikwamanananga kelwa mvu ke mvu, ke ilendi kitula awana befinamanga Nzambi se wantu alunga ko.+ 2 Kele vo ke wau ko, yimenga nga ke yayambulwa kelwa ko e? Kadi awana besalanga e salu kiavauka, badi veleleswa emvimba, e ntona zau ke zadi kala diaka za masumu ko. 3 Kansi, yimenga yayi masumu isungamesanga mvu ke mvu,+ 4 kadi o menga ma ngombe za makoko ye nkombo ke malendi katula masumu ko.

5 Dianu vo, Kristu vava kayiza ova nza, wavova vo: “‘E yimenga ye tukau ke twau ko ozolele, kansi unkubikidi e nitu. 6 O tukau twangioka ye tukau twa masumu, kwayangalela to ko.’+ 7 I bosi yavova vo: ‘Tala! Ngizidi (muna nkanda diasonama mu kuma kiame) yavanga luzolo lwaku, e Nzambi.”’+ 8 Wau katekele vova vo: “E yimenga ye tukau, tukau twangioka ye tukau twa masumu, ke twau ko ozolele ngatu yangalela”—e yimenga ina ikelwanga mun’owu wa Nsiku⁠— 9 i bosi yavova vo: “Tala! Ngizidi yavanga luzolo lwaku.”+ Okatwidi eyi yantete, kasikidisa eyi yanzole. 10 Muna “luzolo”+ lwalu i tuveleleselwanga muna kimenga kia nitu a Yesu Kristu ina yakelwa nkumbu mosi kaka.+

11 Diaka, konso ngang’a Nzambi okalanga vana fulu kiandi lumbu ke lumbu mu sala e salu kiavauka+ yo kela yimenga yau yimosi nkumbu miayingi,+ ina vo ka ilendi katula emvimba masumu ko.+ 12 Kansi, o Yesu wau katambika e kimenga kimosi kaka yakwele mvu muna diambu dia masumu, wavuanda kuna koko kwalunene kwa Nzambi,+ 13 tuka kolo kiakina, ovingilanga yavana mbeni zandi besiwa se sikinua kia tambi yandi.+ 14 Kadi muna kimenga kimosi katambika, wazikula yakwele mvu awana bevaulwanga.+ 15 Vana ntandu, mwand’avelela mpe ukutusilanga umbangi, kadi utekele vova vo: 16 “‘Ediadi i kangu ikanga yau vava kivioka e lumbu yayina,’ u kavovele o Yave. ‘Isia e nsiku miame muna ntima miau, isoneka mio muna nyindu miau.”’+ 17 I bosi uvovele diaka vo: “O masumu mau yo mavangu mau mambi, kiyindula mo diaka ko.”+ 18 Vana valolokelo mambu mama, ke vena diaka mfunu a kimenga ko muna diambu dia sumu.

19 Dianu vo, ampangi, wau tuna ye vuvu kiakangalela* muna nzila yakotela mu fulu kiavauka+ muna menga ma Yesu, 20 nzil’ampa ye yamoyo ina katuziulwila yaviokela vana rido,+ i sia vo, nitu andi, 21 wau tuna ye ngang’a Nzambi anene muna nzo a Nzambi,+ 22 yambula twafinama Nzambi ye ntim’asikila yo lukwikilu lwazikuka, e ntima mieto miaveleleswa* muna ntona zambi,+ e nitu zeto mpe zasukulwa muna maza mavelela.+ 23 Yambula twakwamanana samuna e vuvu kieto kwa wantu awonso kondwa lukatikisu,+ kadi ndiona wasia o nsilu nkwa kwikizi. 24 Yambula twayinduziananga* kimana twasikamesa* o zola ye mavangu mambote+ kwa muntu yo nkwandi, 25 ke tuyambula kutakana ko,+ nze i fu kia ankaka, kansi tukasakesanga muntu yo nkwandi,+ yo siamanana wo vanga, musungula wau tumwene vo e lumbu mu finama kaka kina.+

26 Kadi avo tusumukina kuna lukanu wau tutambwidi kala zayi wasikila waludi,+ ke vena diaka kimenga ko muna diambu dia masumu,+ 27 kansi tumbu kaka tuvingila yo wonga ye nganzi zibomona atantu nze tiya.+ 28 Ndiona obembwele o Nsiku a Mose fwa kefwa, ke fwilwa nkenda ko, muna kimbangi kia wantu wole yovo ntatu.+ 29 Adieyi nubenze, nkia tumbu kilutidi o nene kafwanukini ndiona odiatakese Mwan’a Nzambi yo badikila menga ma kangu+ dina kavaulwilwa vo mafunzuka yo tianguna o mwand’a nsambu e?+ 30 Kadi tunzeye Ndiona wavova vo: “Diame dia landa e kunda; mono isenda.” Ovovele diaka vo: “Yave* ofundisa nkangu andi.”+ 31 O bwa vana moko ma Nzambi amoyo diambu dia vonza kikilu.

32 Dianu vo, nusungamenanga e lumbu ina yavioka, ina vo, vava banukiesesela,+ nuazizidila e ndwan’a ngolo ye mpasi zayingi. 33 Ezak’e ntangwa, nuasenzekwa vana meso ma ndonga* muna luvezo ye muna mpasi, ezak’e ntangwa nuayikama awana babwilwa mambu mama. 34 Kadi nuasonga ngemba kw’awana bakala muna pelezo, ye kiese kiawonso nuatambulwila vo mavua meno masanzua,+ wau nuzeye wo vo nuvuidi e vua disundidi o wete ye dianzingi.+

35 Dianu vo, ke nubembola unkabu weno* ko, kadi i mûna nutambulwila nsendo anene.+ 36 Luzindalalu nuvuidi o mfunu,+ kimana vava numana vanga luzolo lwa Nzambi, nuatambula dina kasila o nsilu. 37 Kadi “kolo kiakete kaka kisidi,”+ “ndiona okwizanga olwaka, ke zingila ko.”+ 38 “Vo i nsongi ame muna lukwikilu i kekadila o moyo”+ “avo ovutukidi manima, kikunyangalela ko.*+ 39 Vo i yeto, ke tuna nze awana bevutukanga kuna lufwasu ko,+ kansi tu akwa lukwikilu kaka muna vuluza mioyo mieto.