Mavangu ma Zintumwa

27 Vava disikidisu vo twabaka e nzaza twenda kuna Italia,+ bayekekele Paulu ye abakami ankaka vana moko ma mfidi a makesa, nkumbu andi Yulio, mosi muna buka kia makesa ma Auguseto. 2 Tukotele muna nzaza ya esi Adamutione, eyi se ikwenda muna fulu yaningamenanga e nzaza muna mvivu a Asia, twele, o Aresetako+ nkwa Makedonia wa musi Tesalonika wakala yeto. 3 Muna lumbu kialanda twalwaka kuna Sidone, o Yulio wasonga Paulu e ngemba, wamvana o nswa kenda kw’akundi andi kimana bansadisa.

4 Vava tukatukidi ko, tuviokele lukufi ye sanga kia Kupero muna tina e tembwa, kadi e tembwa kiatukanga kuna twayendanga. 5 I bosi, tuviokele vana kati kwa mbu muna nlambu a Kilikia ye Pamfulia yo lwaka vana kumu dia Mira muna Lukia. 6 Kwakuna o mfidi a makesa osoluele nzaza ya esi Alesanderia, ina se ikwenda kuna Italia, utukotese mo. 7 I bosi, twakangala malembe-malembe mu lumbu yayingi yo lwaka kuna Kenido mu mpasi zayingi; kadi e tembwa ke kituyambwidi ko, muna tina e tembwa tuviokele lukufi ye sanga kia Kerete kuna Salemone. 8 Twendele kuna mpasi muna nlambu a mbu, tulweke va fulu kiyikilwanga vo Masau Mambote, lukufi ye mbanz’a Lasaya.

9 Wau vo kolo kiayingi kiavioka ye dia vonza mpe diakala mu kwendela muna mbu, e mfionkonona* mpe ya Lumbu kia Luyambulwilu lwa Masumu+ ivuidi vioka, Paulu ubalukisi, 10 oku vo: “Akundi, mbwene wo vo nkangalu wau vonza ye mfwilu miayingi utwasa, ke mu salanganu ye nzaza kaka ko, kansi ye mioyo mieto mpe.” 11 Kansi, o mfidi a makesa vana fulu kia wila Paulu, owididi nsau ye mfumu a nzaza. 12 Wau vo e fulu kianingamenanga e nzaza ke kiambote ko mu viokesela nsungi a kiozi, ndonga yavova vo bakatuka vo, avo dilendakana benda viokesela nsungi a kiozi kuna Feniki, fulu kianingamenanga e nzaza kuna Kerete, kina ye nkotelo kuna note-lunene ye sude-lunene.

13 E tembwa kia sude vava kiavuvama, bayindula vo e kani diau dilungane, bazangwidi mbwa a nzaza,* baviokele muna nlambu a mbu a Kerete. 14 Kansi, ke vavioka kolo ko, tembwa kiangolo kiyikilwanga vo Yurakulo,* kinikukini. 15 Ekolo tembwa kiawandamanga muna nzaza, ke twalenda diaka singika ntu a nzaza ko, twayoya yo kukumunua kwa tembwa. 16 I bosi, tuviokele kuna nim’a sanga kiakete kiayikilwanga vo Koda kiatutanina muna tembwa, kansi mu mpasi twalenda lundila nlungu wakala kuna nim’a nzaza. 17 Kansi, vava bakotese wo muna nzaza, bayantikidi kang’e nzaza ye nsinga, bamwene wonga wa kakama vana senge dia Surti,* bakulumwini salanganu idiatisilwanga e nzaza, i bosi e nzaza ikukumwinu kwa tembwa. 18 Wau vo twatunganiswanga kikilu kwa tembwa, muna vevola e nzaza, muna lumbu kialanda bayantikidi tuba e lekwa muna mbu. 19 E lumbu kina kiatatu, bavetele e salanganu ya nzaza.

20 Wau vo ke twamonanga ntangwa ko ngatu ntetembwa mu lumbu yayingi yo tungianiswa kwa tembwa kiangolo, e vuvu kiawonso kia sia vo tuvuluka, kiadimbuka. 21 Vava baviokesa kolo kiayingi lembi dia, Paulu otelamene vana bakala, ovovele vo: “Akundi, kala vo nuangwila vava yanulukisa, ke nuadi katuka kuna Kerete ko ngatu mona e mpasi zazi yo baka e mfwilu.+ 22 Kansi, owau inuwondelele nuakala yo unkabu, kadi ke vevila muntu* ko vovo lwina, nzaza kaka. 23 O fuku wau o mbasi+ a Nzambi ona umvuidi, ona mpe isadilanga e salu kiavauka, otelamene ova ngina, 24 ovovele vo: ‘Kumoni wonga ko, e Paulu. Ofwete telama vana ndose a Kaisa,+ Nzambi ovuluza awonso bekwendanga yaku.’ 25 Dianu vo, akundi, nukala yo unkabu, kadi nkwikidi muna Nzambi vo mawonso yavoveso kwa mbasi, lungana melungana. 26 Kansi, kakama tukakama va sanga kimosi.”+

27 Muna fuku una wa 14, twayantika kukulwiswa muna Mbu a Aderia, muna dingi-dingi ansau babenze vo bafinamene nsi mosi. 28 Batezele e sina kwa mbu, bamwene vo mavuata 20,* vava bele diaka tini kiakete, batezele diaka sina kwa mbu, bamwene vo mavuata 15.* 29 Wau bamwene wonga wa wandama muna matadi, bakulumwini mbwa yá za nzaza* kuna nima yo zola vo kuma kwakiá. 30 Kansi, ansau una bavavidi vaika muna nzaza, bazolele kulumuna nlungu muna mbu, bavunini vo mbwa nzaza* zina kuna ntwala bekulumuna, 31 Paulu ovovese mfidi a makesa yo makesa vo: “Wantu awaya, avo bakatukidi mu nzaza, oyeno ke nulendi vuluka ko.”+ 32 I bosi, makesa bazengele nsinga mia nlungu, basotwele wo.

33 O kuma vava kwafinama o kiá, Paulu okasakese awonso kimana badia, ovovele vo: “O unu i lumbu kia 14 nuvingilanga ye tima diawonso, yeno ke nudie. 34 Dianu vo, inukasakese nuadia; ediadi mfunu dina muna vimpi weno, kana nkutu lusuki lwa muntu mosi vovo lwina ke luvila ko.” 35 Vava kavovele ediadi, obongele mbolo, otondele Nzambi vana ndose a wantu awonso, obukwini yo, oyantikidi dia. 36 Yau awonso bakabukidi, bayantikidi o dia. 37 Yeto awonso twakala muna nzaza wantu 276. 38 Una badidi yo yukuta, batubidi masa muna kalunga+ muna vevola e nzaza.

39 I bosi, vava kuma kwakiá, ke bazaya ko e nsi ina bakala,+ kansi bamwene nsuku wina ye kumu, babakidi e nzengo za lwakisa e nzaza kûna, avo dilendakana. 40 Bakutulwidi mbwa za nzaza,* basisidi zo muna mbu, vana vau bazezese nsinga mia nkafi; basidi mvuel’a ntu a nzaza kuna tembwa, batadisi kuna kumu. 41 Vava balweke vana senge, bakakamese e nzaza, o ntu a nzaza ukakamene vana senge, wau ke unikuki, kansi kuna nima kuyantikidi banguka mu kuma kia mavuku mangolo.+ 42 Muna kuma kiaki, o makesa babakidi e nzengo za vonda abakami, kimana balembi siensia yo tina. 43 Kansi, o mfidi a makesa wau kazolele vuluza Paulu, ovunzakese e kani diau. Ovovese awana bazeye o siensia bayituba muna mbu, benda viti kuna kumu, 44 ankaka benda landi muna mabaya, ankaka muna lekwa yankaka ya nzaza. Yau awonso balweke o moyo kuna kumu.+