Yezekele

14 Akaka muna akuluntu a Isaele bezidi kwa mono, bafongele ova ntadisi ame.+ 2 I bosi, e diambu dia Yave dizidi kwa mono, oku vo: 3 “E mwan’a muntu, o wantu awaya babakidi e nzengo za landa e teke yau yangemi,* basidi e sakuba vana ntwal’a nkangu mu kubafila basumuka. Nga mfwete yambula vo wantu awaya bangiuvula e?+ 4 Owau ubavovesa vo: ‘I wau wuwu kavovele o Mfumu Yave: “Avo musi Isaele obakidi e nzengo za landa e teke yandi yangemi yo sia sakuba vana ntwal’a nkangu mu kubafila basumuka, i bosi o muntu ndioyo keza yuvula kwa ngunza, omono Yave ikumvana e mvutu mun’owu wa ulolo wa teke yandi yangemi. 5 Kadi izakamesa o ntim’a nzo a Isaele* wau vo yau awonso bampavukidi, balend’e teke yau yangemi.”’+

6 “Dianu vo, vovesa e nzo a Isaele vo: ‘I wau wuwu kavovele o Mfumu Yave: “Nuvutuka, nubembola e teke yeno yangemi yo vengomona meso meno muna mavangu mawonso mangemi.+ 7 Kadi konso musi Isaele yovo nzenza ozingilanga muna Isaele okuyivambula yo mono yo bak’e nzengo za landa e teke yandi yangemi yo sia sakuba vana ntwal’a nkangu mu kubafila basumuka, i bosi keza yuvula kwa ngunza ame,+ mono kibeni Yave inkumvana e mvutu. 8 Telamena itelamena o muntu ndioyo, ikunkitula se sinsu kia lulukisu ye kingana, ikumfukisa vana vena o nkangu ame,+ nuzaya wo vo mono i Yave.”’

9 “‘Kansi, o ngunza avo ovunginikinu yo vana e mvutu, disongele vo, mono Yave imvunginikini.+ Nlambula o koko kwame muna yandi yo kumvonda vana vena o nkangu ame Isaele. 10 Oyau bebaka e mfwilu mia bi wau; o bi wa ngunza ufwanana ye wa ndiona wele yuvula kwa ngunza, 11 kimana e nzo a Isaele yayambula kumpengomoka yo yambula kuyifunzula muna mavangu mau mawonso mambi. Oyau bekala se nkangu ame, omono ikala se Nzambi au,’+ u kavovele o Mfumu Yave.”

12 E diambu dia Yave dizidi diaka kwa mono, oku vo: 13 “E mwan’a muntu, avo e nsi insumukini muna vanga mambu ma kondwa e kwikizi, ilambula o koko kwame muna nsi yoyo, yo fwasa madia mandi mawonso,*+ itwika mvengele muna nsi+ yo vonda wantu ye bulu ina mo.”+ 14 “‘Kana nkutu vo wantu tatu awaya—Noa,+ Daniele+ yo Yobi+—bakedi mo, muna unsongi wau, mioyo miau kaka badi vuluza,’+ u kavovele o Mfumu Yave.”

15 “‘Yovo, avo ntwikidi bulu yansisi muna nsi, e bulu yasisa e nsi e nkatu* yo kitula yo se makanga, mwalembi viokela diaka muntu mu kuma kia bulu yansisi,+ 16 e nkal’ame kaka,’ u kavovele o Mfumu Yave, ‘kana nkutu vo wantu tatu awaya bakedi mo, ke badi lenda vuluza kana wan’au amakala ko ngatu wan’au amakento; mioyo miau kaka badi vuluza, vo i nsi yadi kituka se makanga.’”

17 “‘Yovo, avo ntwese o nsosolo muna nsi yoyo+ yo vova vo: “Yambula o nsosolo waviokela muna nsi,” yo vonda wantu ye bulu ina mo,+ 18 e nkal’ame kaka,’ u kavovele o Mfumu Yave, ‘kana nkutu vo wantu tatu awaya bakedi mo, ke badi lenda vuluza kana wan’au amakala ko ngatu wan’au amakento; mioyo miau kaka badi vuluza.’”

19 “‘Yovo, avo ntwese vuku muna nsi yoyo+ yo yitila mo makasi mame muna mbungul’a menga mu vonda wantu ye bulu ina mo, 20 e nkal’ame kaka,’ u kavovele o Mfumu Yave, ‘kana nkutu vo Noa,+ Daniele+ yo Yobi+ bakedi mo, muna unsongi wau ke badi lenda vuluza kana wan’au amakala ko ngatu wan’au amakento; mioyo miau kaka badi vuluza.’”+

21 “Kadi i wau wuwu kavovele o Mfumu Yave: ‘I wau uvangama vava itwasa e tumbu yame* yá muna Yerusaleme+—nsosolo, mvengele,+ bulu yansisi ye vuku—mu vonda wantu ye bulu ina mo.+ 22 Kansi, akaka muna awana besala mo, bevuluka yo vaikiswa,+ kiakala wan’amakala yovo wan’amakento. Kwa yeno bekwizanga; vava numona e ngienda zau ye mavangu mau, nufiaulwiswa muna mpasi zina ntwese muna Yerusaleme, muna mambu mawonso mvangidi mo.’”

23 “‘Oyau bekunufiaulwisa vava numona e ngienda yo mavangu mau, nuzaya wo vo mana mvangidi kwa Yerusaleme kivangidi mo kondwa kuma ko,’+ u kavovele o Mfumu Yave.”