Kimpovi

9 Muna diadi, mfimpidi mawonso mama yo bakula vo o nsongi yo nkwa ngangu kumosi ye salu yau, vana moko ma Nzambi aludi bena.+ O wantu ke bazeye ko o zola ye kitantu kiateka kala vitila oyau bawutuka. 2 Yau awonso mfoko mosi bena yau,+ o muntu ansongi yo muntu ambi,+ o muntu ambote yo muntu avelela yo muntu afunzuka, awana bekelanga yimenga ye awana ke bekelanga yimenga ko. O muntu ambote mpila mosi yo nsumuki; o muntu odianga e ndofi mpila mosi yo muntu oteka yindulanga vitila kadia e ndofi. 3 Ediadi diambu diampasi divangamanga oku nsi a ntangwa: Kadi yau awonso mfoko mosi bena yau,+ o ntim’a wantu mpe uzadidi ye mambu mambi; o ulau ukedi muna ntim’au muna zingu kiau kiawonso, i bosi befwanga!*

4 Vena ye vuvu kwa ndiona una vana kati kwa awana bena o moyo, kadi e mbwa amoyo isundidi e nkosi afwa.+ 5 Kadi awana bena o moyo bazeye wo* vo fwa befwa,+ kansi awana bafwa ke bazeye konso diambu ko,+ ke bena mpe diaka yo nsendo* ko, kadi mawonso malenda sungamenua mu kuma kiau mavilakeno.+ 6 Ye mpe, o zola kwau ye kitantu kiau ye kimpala kiau kivuidi vila, ke bena diaka y’edi bavanga ko muna mambu mevangamanga oku nsi a ntangwa.+

7 Wenda, dia madia maku ye kiese, nua e vinyu aku yo luyangalalu lwa ntima,+ kadi o Nzambi aludi oyangalele kala e salu yaku.+ 8 Yambula e mvuatu miaku miakala kaka miampembe,* kuyambula sia mazi vana ntu aku ko.+ 9 Yangalela e zingu yo nkento aku anzolwa+ e lumbu yawonso ya zingu kiaku kiankufi,* kina Nzambi kavene oku nsi a ntangwa, elo, e lumbu yaku yawonso yankufi,* kadi ekiaki i kunku kiaku muna zingu ye salu kiaku kiangolo kina ofuntukinanga oku nsi a ntangwa.+ 10 Konso salu olenda sala, sala kio yo nkum’aku wawonso, kadi ke muna salu ko yovo nkubika yovo zayi ngatu ngangu muna Ziami,*+ muna okwenda.

11 Mbwene diaka diambu diankaka oku nsi a ntangwa: ke ntangwa zawonso ko akwa ntinu zayingi besundanga o nkula yovo akwa ngolo besundanga e nkindu+ yovo akwa ngangu bekalanga ye madia yovo akwa umbakuzi bekalanga ye mavua,+ ke ntangwa zawonso ko mpe akwa zayi bekalanga ye tunda,+ kadi e ntangw’ampasi yo mambu makinsalukisa mebwilanga yau awonso. 12 Kadi o muntu kazeye ntangwa andi ko.+ Wauna e mbizi za maza zibakamenanga muna konde dia mpondi ye wauna e nuni zibakamenanga muna ntambu, i una o wan’a wantu bebakamenanga muna ntambu muna ntangw’a mpasi,* vava ikubalwakilanga kuna kinsalukisa.

13 Edi mpe yamona mu kuma kia ngangu oku nsi a ntangwa—ediadi diansivikisa: 14 Vakala ye mbanza yakete ina ke yakala yo wantu ayingi ko; ntinu mosi angolo wizidi nuanisa e mbanza yo zunga yo, otungidi yaka yampwena muna kinzieta. 15 Muna mbanza mukedi yakala dimosi dia nsukami kansi nkwa ngangu, otanini e mbanza muna ngangu zandi. Kansi, ke vakedi muntu ko osungamene o nsukami ndioyo.+ 16 Mpovele vo: ‘E ngangu zisundidi o wete ke mu ngolo ko;+ kana una vo i wau, e ngangu za nsukami zivezwanga, e mvovo miandi ke mitambulwilwanga ko.’+

17 Diambote mu wá mvovo mialembama mia nkwa ngangu ke mu wá nkololo za nyadi a mazowa ko.

18 E ngangu zisundidi o wete ke mu nuaninua ya vita ko, kansi o nsumuki mosi olenda fwasa lekwa yayingi yambote.+