Wantete wa Paulu Kuna kwa Esi Korinto

6 Avo muntu obakanene diambu yo nkwandi vana kati kweno,+ nga okala yo unkabu wakwenda kumfunda kuna mbazi a nkanu kuna kwa asumuki, ke kwa avauki ko e? 2 Nga ke nuzeye wo ko vo avauki yau befundisa e nza?+ Avo yeno nufundisa e nza, nga ke nulenda fundisa mambu meno makete ko e? 3 Nga ke nuzeye wo ko vo ambasi tusinga fundisa?+ Ozevo, ekuma ke nulendi fundisila mambu ma zingu kiaki ko e? 4 Avo mfundu wa mambu ma zingu kiaki nuina wau,+ ekuma nusolelanga awana ke betondwanga ko muna nkutakani kimana bakala se afundisi? 5 Mpovele wo muna kunufusulwisa e nsoni. Nga vana kati kweno kavena nkwa ngangu ko wafwana zenga mambu vana vena mpangi zandi e? 6 Ekuma mpangi kefundilanga mpangi andi kuna mbazi a nkanu, vana vena mindembi-kwikila e?

7 Kieleka, ngielele kikilu nuna yau, wau nufundananga kuna mbazi a nkanu. Ekuma nulembele tambulwila vo banuvanga e mbi?+ Ekuma nulembele tambulwila o mfwilu?* 8 Kansi, oyeno nuvanganga e mbi yo yiya ankaka, ye mpangi zeno nkutu.

9 Nga ke nuzeye wo ko vo awana bevanganga mambu mambi ke bevua Kintinu kia Nzambi ko e?+ Ke nuvunginikwa ko. Awana bekukivananga muna mavangu ma zumba,*+ asambidi a teke,+ minta-zumba,+ akala beyambulanga vo balekwa nze akento,+ akala belekananga ye akwau akala,+ 10 mivi, akwa loko,+ nduvu za malavu,+ akwa luvezo ye mindia-nzimbu zangani ke bevua Kintinu kia Nzambi ko.+ 11 Akaka muna yeno i wau nuakala. Kansi nuasukulwa;+ nuaveleleswa+ yo lungiswa+ muna nkumbu a Mfumu eto Yesu Kristu ye muna mwand’a Nzambi eto.

12 Mambu mawonso mansongi kwa mono, kansi ke mawonso ko metwasanga nluta.+ Mawonso mansongi kwa mono, kansi mono kibeni kiyambula ko vo yabundunua kwa konso lekwa. 13 O madia mena mu kuma kia vumu, e vumu mu kuma kia madia; kansi Nzambi okitula yo se mpavala.+ E nitu ke ina mu kuma kia mavangu ma zumba* ko, kansi mu kuma kia Mfumu kaka,+ o Mfumu mu diambu dia nitu. 14 Kansi Nzambi wafula o Mfumu,+ okutufula mpe muna mafwa+ muna nkum’andi.+

15 Nga ke nuzeye wo ko vo e nitu zeno i yîkwa ya Kristu e?+ Ozevo, nga ndenda bonga yîkwa ya Kristu yayikakesa yo muna nkento a ndumba e? Ke wau ko! 16 Nga ke nuzeye wo ko vo konso yakala ovukana yo nkento a ndumba bekituka se nitu mosi e? Kadi Nzambi ovovele vo: “yau awole bekala se nitu mosi.”+ 17 Kansi konso muntu una entwadi yo Mfumu una yo nyindu mosi yo yandi.+ 18 Nutina mavangu ma zumba.*+ Konso sumu dina o muntu kalenda sumuka, ke dina muna nitu andi ko, kansi konso ndiona okuyivananga muna mavangu ma zumba, nitu andi kesumukinanga.+ 19 Nga ke nuzeye wo ko vo e nitu zeno i tempelo+ a mwand’avelela una nutambwidi kwa Nzambi e?+ Yeno mpe ke nuyivuidi ko,+ 20 kadi mu ntalu nuasumbilwa.+ Dianu vo, nukembelela Nzambi+ muna nitu zeno.+