Levitiku

25 Yave ovovese diaka Mose vana Mongo a Sinai vo: 2 “Vovesa Aneyisaele vo: ‘Vava nukota muna nsi ina ikunuvana,+ nufwete lemvokela nsiku a Yave mu kuma kia vundu, ke nuvati ntoto ko.+ 3 Mvu sambanu okuna e mbongo muna mpatu aku, mvu sambanu ovangila mpatu aku a vinyu yo kutika e mbongo a ntoto.+ 4 Kansi muna mvu una wansambwadi, i mvu wa vundu emvimba mu kuma kia ntoto, i mvu wa vundu kuna kwa Yave. Kufwete kuna mbongo ko muna mpatu aku ngatu vangila e mpatu aku a vinyu. 5 Kufwete kutika makunda ko ma mbwaza zasotoka muna nkutik’ansuka, kuvedi uva za nsing’aku a vinyu ko walembi vangilwa. Mukala mvu amvimba wa vundu mu kuma kia ntoto. 6 Kansi, nulenda kweno dia madia ma mbongo imenene muna ntoto muna kolo kia vundu kiandi; ngeye, ntaudi aku ayakala yo ntaudi aku ankento, nsadi aku ona ofutwanga ye anzenza ana bezinganga yeno balenda mo dia, 7 e bulu ya vata ye bulu ya mfuta ina mu nsi eno ilenda mpe dia madia momo. Nulenda dia yawonso imena muna ntoto.

8 “‘Otanga mvu nsambwadi mia vundu, tanga mvu nsambwadi nkumbu nsambwadi, e lumbu ya mvu nsambwadi mia vundu ikala se 49 dia mvu. 9 I bosi, muna ngonde yansambwadi, muna lumbu kiakumi kia ngonde, nusika mpungi mu zú diangolo; muna Lumbu kia Luyambulwilu lwa Masumu,+ nusika e mpungi yavana e zú diandi diwakana mu nsi eno yawonso. 10 Nufwete vaula o mvu una wa 50 yo boka nkoki a luvevoko muna nsi, kwa awonso bezingilanga mo.+ O mvu wau ukala se Mvu wa Luvevoko kwa yeno, konso muntu mu yeno ovutuka kuna vua diandi, konso muntu mu yeno ovutuka kwa yitu yandi.+ 11 O mvu una wa 50 ukala se mvu wa luvevoko kwa yeno. Ke nukuna mbongo ko, ke nukutika makunda ko ma mbwaza zasotoka, ke nuvela uva za nsing’a mia vinyu ko mialembi vangilwa.+ 12 Kadi owau i Mvu wa Luvevoko. Ukala wavauka kwa yeno. Nufwete dia kaka ina o ntoto uyimanga wau kibeni.+

13 “‘Muna mvu wowo wa luvevoko, konso muntu mu yeno kafwete vutuka kuna vua diandi.+ 14 Avo otekele konso lekwa kwa nkwaku yovo sumba lekwa kwa nkwaku, ke nuyiyaziana ko.*+ 15 Vava osumba o ntoto kwa nkwaku, ofwete tanga e mvu miviokele kala tuka Mvu wa Luvevoko; oyandi osikidisa e ntalu mun’owu wa lutangu lwa mvu mia nkutik’a mbongo misidi.+ 16 Avo mvu miayingi misidi, oyandi olenda kwandi kudikila e ntalu, kansi avo mvu miakete misidi, oyandi kafwete kulula e ntalu, kadi lutangu lwa mbongo ikutikwa kekutekelanga. 17 Ke mosi ko muna yeno ofwete yiya o nkwandi;*+ nufwete kala yo vumi wa Nzambi eno,+ kadi mono i Yave wa Nzambi eno.+ 18 Muna lemvokela e nkanikinu miame yo lunda e nzengo zame za mfundisa, i nuzingila mu luvuvamu muna nsi.+ 19 O ntoto uyima e mbongo andi,+ nudia yo yukuta, i mûna nuzingila mu luvuvamu.+

20 “‘Kansi, nulenda kukiyuvula vo: “Nki tudia muna mvu una wansambwadi wau vo ke tufwete kuna mbongo ko ngatu kutika e mbongo eto?”+ 21 Itwika e nsambu zame kwa yeno muna mvu una wasambanu, o ntoto uyima mbongo yafwana mu kuma kia mvu ntatu.+ 22 I bosi, muna mvu una wanana nukuna e mbongo, oyeno mbongo ankulu nudia yamuna mvu una wavua. Mbongo ankulu nudia yavana e mbongo ampa ikola.

23 “‘O ntoto ke ufwete tekwa mvimba ko,+ kadi o ntoto wame.+ Kuna kwa mono, oyeno nu minduti a nzila ye nzenza.+ 24 Muna nsi eno yawonso yakivuila, o nteki okala yo nswa wa sumbulula o ntoto andi.

25 “‘Avo mpangi aku osukamene yo teka e ndambu a vua kwandi, o nkûdi ona wina vo yitu kiandi kia menga kafwete kwiza yo sumbulula o vua kuna mpangi andi katekele.+ 26 Avo muntu kena yo nkûdi ko, kansi okitukidi se mvuama yo lenda e nzimbu za kûdila o vua kwaku, 27 kafwete tanga e ntalu mun’owu wa mvu miviokele kala tuka katekela ko, ovutula eki kisuva kwa muntu katekela o vua. I bosi, olenda kwandi vutuka kuna vua diandi.+

28 “‘Kansi, avo kena ye nzimbu za kûdila vua kwandi ko, kina kateka kikwamanana kwa muntu wasumba kio yamuna Mvu wa Luvevoko;+ kikumvutulwilwa muna Mvu wa Luvevoko ye ovutuka kuna vua diandi.+

29 “‘Avo muntu otekele nzo ina mu mbanza yazungwa e yaka, o nsw’andi wa kûla e nzo ukwamanana yakuna mfoko a mvu tuka muna ntangwa kateka yo; o nsw’andi wa kûla+ ukwamanana mu mvu amvimba. 30 Kansi, avo ke ikûdilu ko yakuna mfoko a mvu amvimba, e nzo ina muna mbanza yazungwa e yaka ikituka se vua dia muntu wasumba yo, muna mbandu zandi zawonso. Ke ivutulwa ko muna Mvu wa Luvevoko. 31 Kansi, e nzo za mavata ke mazungwa yaka ko, zifwete badikilwa nze tini kia ntoto a mpatu a nsi. O nswa wa kûla e nzo yoyo ufwete kwamanana, e nzo ifwete vutulwa muna Mvu wa Luvevoko.

32 “‘Vo i nzo za Anelevi zina muna mbanza zau,+ Anelevi bekwamanana kala yo nswa wa kûla zo. 33 Avo Nlevi kakûdidi nzo andi ko ina kateka, e nzo ina kateka muna mbanz’au ikumvutulwilwa mpe muna Mvu wa Luvevoko,+ kadi e nzo za mbanza za Anelevi i vua kwau vana vena Aneyisaele.+ 34 Kuna diak’e sambu, e nzanza mia madilu ma bulu+ mina muna kinzieta kia mbanza zau ke mifwete tekwa ko, kadi i vua kwau kwa mvu ke mvu.

35 “‘Avo mpangi aku ozingilanga ova kati kweno okitukidi nsukami, ke lenda diaka kuyilunga-lunga ko, ofwete kunsadisa+ wauna wadi sadisila o munduti a nzila yo nzenza,+ kimana kakwamanana kala moyo vovo nuina. 36 Kulombi nzuka ko ngatu tambula nluta muna yandi.+ Ofwete kala yo vumi wa Nzambi aku,+ o mpangi aku okwamanana kala moyo vovo nuina. 37 Kufwete kundevesa nzimbu zaku ko mu tambula nzuka+ yovo kumvana madia maku mu tambula nluta. 38 Mono i Yave wa Nzambi eno, ona wanuvaikisa muna nsi ya Engipito+ yanuvana e nsi ya Kenani, yakala se Nzambi eno.+

39 “‘Avo mpangi aku ozingilanga ova kati kweno okitukidi nsukami, kayiteka kwa ngeye,+ kunkomekena ko kasala nze mbundu.+ 40 Kafwete badikilwa nze nsadi ona ofutwanga,+ nze nzenza. Kafwete kusadila yamuna Mvu wa Luvevoko. 41 I bosi, oyandi okusisa, oyandi yo wan’andi bevutuka kwa kanda diandi. Kafwete vutuka kuna vua dia mase mandi.+ 42 Kadi oyau i ntaudi zame zina yavaikisa muna nsi ya Engipito.+ Ke bafwete kuyiteka ko wauna utekelwanga o ngamba. 43 Kufwete kumbangika ko,+ ofwete kala yo vumi wa Nzambi aku.+ 44 E ntaudi zaku zamakala ye zamakento bafwete tuka muna zula inuzungidi. Muna zula yoyo i nusumbila ntaudi ayakala yovo ankento. 45 Nulenda mpe sumbila e ntaudi muna wan’anzenza ana bezinganga yeno,+ muna yau ye muna wan’au ana bawutila mu nsi eno, oyau bekituka se vua kweno. 46 Nulenda kubasisa se vua kwa wan’eno kimana bakala se vua kwau kwakwele mvu. Nulenda kubasadila se ntaudi zeno, kansi o mpangi aku wa Nyisaele kufwete kumbangika ko.+

47 “‘Kansi, avo munduti a nzila yovo nzenza ozingilanga ova kati kweno okitukidi se mvuama, o mpangi aku wina ova kati kweno kakituka se nsukami, kayiteka kwa munduti a nzila yovo kwa nzenza ozingilanga vovo nuina yovo kwa yitu kia munduti a nzila, 48 oyandi okwamanana kala yo nswa wa kûlwa. Mosi muna mpangi zandi olenda kunkûla,+ 49 yovo ngudi andi ankazi yovo mwan’a ngudi andi ankazi olenda kunkûla, yovo konso yitu kiandi kia menga, i sia vo, mosi muna kanda diandi, olenda kunkûla.

“‘Yovo, avo yandi kibeni okitukidi se mvuama, olenda mpe kwandi kuyikûla.+ 50 Oyandi yo muntu wansumba betanga lutangu lwa mvu tuka muna mvu kayitekela kwa yandi yamuna Mvu wa Luvevoko,+ e ntalu kayitekela ikala mun’owu wa lutangu lwa mvu miomio.+ E ntalu mu kuma kia lumbu yandi ya salu muna kolo kiokio itangilwa mun’owu wa mfutu a nsadi ona ofutwanga.+ 51 Avo mvu miayingi misidi, kafwete futa e ntalu a lukûlu lwandi mun’owu wa mvu misidi. 52 Kansi, avo mvu miakete misidi mu lwaka muna Mvu wa Luvevoko, kafwete kuyitangila e mvu miomio yo futa e ntalu a lukûlu lwandi mun’owu wa mvu misidi. 53 Kafwete kwamanana sadila ndiona wansumba mvu ke mvu se nsadi ona ofutwanga; oyeno ke nufwete yambula ko vo ona wansumba kambangika.+ 54 Kansi, avo kalendele kuyikûla ko muna mpila yayi, muna Mvu wa Luvevoko kaka kevevoka,+ oyandi kumosi yo wan’andi.

55 “‘Kadi Aneyisaele ntaudi zame. Oyau ntaudi zame zina yavaikisa muna nsi ya Engipito.+ Mono i Yave wa Nzambi eno.