Wantete wa Ntinu

8 Muna ntangwa yayina, Solomo okutakese+ akuluntu a Isaele, ntu miawonso mia makanda ye mfumu za nzo za mase ma Isaele.+ Bezidi kwa Solomo wa Ntinu kuna Yerusaleme kimana banata e nkel’a kangu dia Yave kuna Mbanz’a Davidi,+ i sia vo, Zione.+ 2 Nkangu wawonso a Isaele ukutakene vana vena Solomo wa Ntinu muna kembelela nkinzi,* muna ngonde a Etanime,* i sia vo, ngonde yansambwadi.+ 3 Akuluntu awonso a Isaele bezidi, anganga bazangwidi e Nkela.+ 4 Batombwele Nkel’a Yave, saba kia wananina+ ye salanganu yawonso yavauka yakala muna saba. Anganga yo Anelevi batombokele yau. 5 Solomo wa Ntinu ye nkutakani yawonso a Isaele ina yabokeleswa kimana bawanana yandi, bakedi vana ntwal’a Nkela. Batambikidi yimenga+ yayingi ya mameme ye ngombe zakondwa lutangu.

6 Anganga bakotese nkel’a kangu dia Yave vana fulu kiandi,+ muna suku dia kati, i sia vo, Fulu Kisundidi o Vauka, basidi yo kuna nsi a mave ma akelubi.+

7 E mave ma akelubi mayalumuka vana ntandu a fulu kiakala e Nkela, dianu vo akelubi bafukidi Nkela ye mbindi zandi za natina yo.+ 8 Wau vo e mbindi+ zandi zandá zakala, e nsuka zandi zamonekanga muna Fulu kiavauka, vana ntwal’a suku dia kati, kansi ke zamonekanga kuna mbazi ko. E mbindi zazi zina mûna yamu unu kiaki. 9 Ke mwakala lekwa ko muna Nkela, babu+ yole kaka ina Mose kasia mo+ kuna Korebe vava Yave kakanga e kangu+ yo nkangu a Isaele vava bavaika muna nsi ya Engipito.+

10 Anganga vava bavaikidi muna fulu kiavauka, e nzo a Yave+ izele ye tuti.+ 11 Muna kuma kia tuti, anganga ke balenda mo telama ko kimana basala e salu yau, kadi nkembo a Yave wazala muna nzo a Yave.+ 12 Muna diadi, Solomo ovovele vo: “Yave ovovele vo ozingila muna tombe kia matuti.+ 13 Omono mbanisi kutungila e nzo yambote, fulu kiaku kiasikila mûna ofwete zingila yakwele mvu.”+

14 I bosi, o ntinu ovilukidi, oyantikidi sambula e nkutakani yawonso ya Isaele ekolo nkutakani yawonso ya Isaele yakala yatelama.+ 15 Ovovele vo: “Yambula Yave wa Nzambi a Isaele kakembelwa; muna koko kwandi olungisi nsilu a nu’andi una kasila kwa Davidi wa se diame, oku vo, 16 ‘Tuka muna lumbu kina yavaikisa nkangu ame Isaele muna Engipito, kiasola mbanza ko muna makanda mawonso ma Isaele yatungilwa e nzo ikala e nkumbu ame,+ kansi nsolele Davidi kayala nkangu ame Isaele.’ 17 Davidi wa se diame wakala ye luzolo lwa nsi a ntima lwatunga e nzo mu kuma kia nkumbu a Yave wa Nzambi a Isaele.+ 18 Kansi, Yave ovovese Davidi wa se diame vo: ‘O luzolo luna muna ntim’aku i tunga nzo mu kuma kia nkumbu ame, diambote wau wina ye luzolo lwalu muna ntim’aku. 19 Kansi, ka ngeye ko otunga e nzo, mwan’aku, ona owuta,* yandi otunga e nzo mu kuma kia nkumbu ame.’+ 20 Yave olungisi o nsilu una kasia, kadi mvingidi va fulu kia Davidi wa se diame, mvuende va kunda kia kimfumu kia Isaele, wauna Yave kasia o nsilu. Ntungidi mpe e nzo mu kuma kia nkumbu a Yave wa Nzambi a Isaele,+ 21 nkubikidi mo fulu kia Nkela ina yasiwa e kangu+ dina Yave kakanga yo mase meto vava kabavaikisa muna nsi ya Engipito.”

22 I bosi, Solomo otelamene vana vena ziku dia Yave vana ntwal’a nkutakani yawonso ya Isaele, oyalumwini moko mandi kuna zulu,+ 23 ovovele vo: “E Yave wa Nzambi a Isaele, kavena Nzambi ofwanane yaku ko,+ kuna zulu, kuna ntandu yovo ova ntoto, kuna nsi, olundanga e kangu diaku yo songa walakazi+ kwa selo yaku, ana bekangalelanga vana ndose aku ye ntim’au wawonso.+ 24 Olungisi nsilu aku wasila selo kiaku Davidi wa se diame. Wasia nsilu muna nu’aku, o unu olungisi wo muna koko kwaku.+ 25 E Yave wa Nzambi a Isaele, owau lungisa nsilu una wasila ntaudi aku Davidi wa se diame, vava wavova vo: ‘Avo wan’aku betoma sia e sungididi muna nzila zau yo diatila vana ndose ame, wauna wadiatila vana ndose ame, muna luvila lwaku ke mukondwa muntu ko ovuanda vana kunda kia kimfumu kia Isaele.’+ 26 Owau, e Nzambi a Isaele, dodokolo, yambula o nsilu una wasila selo kiaku Davidi wa se diame walungana.

27 “E Nzambi, nga ozingila kikilu ova ntoto?+ Elo, e zulu, e zulu dia mazulu ke dilendi kufwana ko;+ e nzo yayi ntungidi ozevo nki?+ 28 Owau, tamba o matu muna sambu ye ndodokela za selo kiaku, e Yave wa Nzambi ame, wá e kazu ye sambu kina selo kiaku kalombele kwa ngeye o unu. 29 Yambula meso maku matemoka mwamu nzo yayi, fuku yo mwini, e fulu eki wavova vo: ‘I mûna mukala e nkumbu ame,’+ wá e sambu kina selo kiaku kesambanga va fulu kiaki.+ 30 Wá e ndomba za selo kiaku ye ndomba za nkangu aku Isaele vava besamba tuka va fulu kiaki. Yambula wawá tuka vana fulu kiaku okalanga koko zulu;+ elo, yambula wawá yo loloka.+

31 “Avo muntu osumukini nkwandi, odisisu e ndofi,* vava kekala kuna nsi a ndofi wizidi va ziku diaku mwamu nzo yayi,+ 32 wá kwaku koko zulu, kudingalala ko, fundisa selo yaku muna yelesa e kimpumbulu yo twasa e mbi muna ntu andi, lungisa nkwa unsongi yo kunsendela mun’owu wa unsongi wandi.+

33 “Avo nkangu aku Isaele usundilu kwa mbeni wau bakwamanene kusumukina,+ avo bavilukidi kwa ngeye yo kembelela nkumbu aku+ yo samba yo kudodokela mwamu nzo yayi,+ 34 wá kwaku koko zulu, loloka e sumu dia nkangu aku Isaele, ubavutula mu nsi wavana kwa mase mau.+

35 “Avo zulu dikangamene, lembi noka diaka e mvula+ wau vo bakwamanene kusumukina,+ avo basambidi va fulu kiaki yo kembelela nkumbu aku yo yambula sumu diau vava okubamwesesa e mpasi,*+ 36 wá kwaku koko zulu, loloka masumu ma selo yaku, ma nkangu aku Isaele, kadi okubalonga+ nzila yambote ina bafwete diatila; wanokesa mvula mwamu nsi aku+ eyi wavana kwa nkangu aku se vua.

37 “Avo mvengele ukotele mwamu nsi,+ yovo vuku, mbangazi yangolo, mbumbu,+ buka kia makonko yovo makonko ma mfwasi; yovo mbeni zibazungidi muna mbanza zau,* yovo konso vuku kiankaka yovo mayela,+ 38 konso sambu, konso ndodokela idodokelwa+ kwa muntu yovo kwa nkangu aku wawonso Isaele (kadi konso muntu ozeye mpasi za ntim’andi)+ avo bayalumwini moko mau mwamu nzo yayi, 39 wá kwaku koko zulu, kuna fulu kiaku okalanga,+ yambula waloloka,+ kudingalala ko; senda konso muntu mun’owu wa nzila zandi,+ kadi ozeye ntim’andi (ngeye kaka otomene zaya e ntima mia wantu awonso),+ 40 kimana bavumina e lumbu yawonso bezingila muna nsi ina wavana kwa mase meto.

41 “Muna diambu dia nzenza una vo ke nkangu aku a Isaele ko, ona watuka muna nsi yandá mu kuma kia nkumbu aku,*+ 42 (kadi bewá nsangu za nkumbu aku anene,+ koko kwaku kwankuma ye koko kwaku kwalambuka) vava kekwiza samba mwamu nzo yayi, 43 wá kwaku koko zulu, e fulu kiaku kina okalanga,+ vanga mawonso kekulomba o nzenza kimana nkangu miawonso mia nza bazaya nkumbu aku, bavumina+ wauna uvanganga nkangu aku Isaele, bazaya wo vo e nkumbu aku ivovelwanga mwamu nzo yayi ntungidi.

44 “Avo nkangu aku wele nuanisa mbeni zau muna nzila ina okubatuma+ yo samba+ kwa Yave mwamu mbanza yayi wasola,+ ye nzo yayi ntungidi mu kuma kia nkumbu aku,+ 45 wá kwaku koko zulu e sambu kiau ye ndomba zau, zenga e diambu muna wete diau.

46 “Avo basumukini (kadi ke vena muntu ko olembi sumukanga),+ wabafungila makasi yo kubayekola kwa mbeni zau, babanata se abakami kuna nsi a mbeni, kuna vala yovo lukufi;+ 47 avo bavilukidi o ntima muna nsi ina benatwa se abakami+ yo vutuka kwa ngeye+ yo kudodokela muna nsi y’awana bekubabaka,+ oku vo: ‘Tusumukini, vilwa tuvangidi; diambu diambi kikilu tuvangidi,’+ 48 avo bavutukidi kwa ngeye ye ntima wawonso+ ye moyo* au wawonso muna nsi a mbeni zau, ana bekubanata se abakami, basamba kwa ngeye yo tala e nsi au ina wavana kwa mase mau ye mbanza wasola ye nzo yayi ntungidi mu kuma kia nkumbu aku,+ 49 wá kwaku koko zulu, e fulu kiaku kina okalanga,+ e sambu kiau ye ndodokela zau, zenga diambu muna wete diau, 50 loloka nkangu aku una usumukini, loloka masumu mawonso mana bàsumukini. Vilula e ntima mia abaki au babafwila e nkenda+ 51 (kadi i nkangu aku ye vua diaku,+ dina wavaikisa muna Engipito,+ muna fûlu dia fudila e sengwa).+ 52 Yambula o meso maku matemoka muna ndodokela za ntaudi aku+ ye muna ndodokela za nkangu aku Isaele, ubawila konso ntangwa bekubokela.*+ 53 Kadi wabavambula muna nkangu miawonso mia nza bakala se vua diaku,+ wauna wavova muna selo kiaku Mose vava wavaikisa mase meto muna Engipito, e Mfumu Yave.”

54 Vava Solomo kamana samba e sambu kiaki kwa Yave yo dodokela, otelamene vana ziku dia Yave vana kafukamena yo yalumuna moko kuna zulu.+ 55 Otelamene yo sambula nkutakani yawonso ya Isaele, ovovele muna nding’angolo vo: 56 “Nkembo kwa Yave ona ovene fulu kia vundila kwa nkangu andi Isaele, wauna kasila o nsilu.+ Ke vafungidi kana diambu dimosi ko muna nsilu miandi miawonso miambote mina kasila muna Mose wa selo kiandi.+ 57 Yambula Yave wa Nzambi eto kakala yeto wauna kakadila yo mase meto.+ Katusisi ko ngatu kutuyambula.+ 58 Yambula kalemvola ntima mieto oku kena,+ twadiatila muna nzila zandi, twalunda nkanikinu miandi, mîna miandi, nzengo zandi zina kakanikina kwa mase meto vo balunda. 59 E mambu mama ndodokele kwa Yave, yambula makala vana vena Yave wa Nzambi eto, fuku yo mwini, kazenga diambu dia ntaudi andi ye nkangu andi Isaele mun’owu wa nsatu za lumbu ke lumbu, 60 nkangu miawonso mia nza yambula bazaya wo vo Yave i Nzambi aludi.+ Kavena wankaka ko!+ 61 Yambula ntima mieno miasikila+ muna Yave wa Nzambi eto muna diatila muna mîna miandi yo lunda nkanikinu miandi, nze una nuvanganga o unu.”

62 O ntinu ye Isaele yawonso batambikidi yimenga yayingi vana ndose a Yave.+ 63 Solomo otambikidi yimenga ya ungudi+ kwa Yave: Otambikidi 22.000 ma ngombe ye 120.000 ma mameme. O ntinu ye Aneyisaele awonso basunzwidi e nzo a Yave.+ 64 Muna lumbu kiakina, o ntinu ovawidi e yanzala kia kati kina kuna ntwal’a nzo a Yave, kadi i vana katambikidi yimenga yangioka, tukau twa mbwaza yo mazi ma yimenga ya ungudi, kadi e ziku dia nsongo+ dina diakala vana vena Yave, diakete muna tambikila tukau twangioka, tukau twa mbwaza yo mazi+ ma yimenga ya ungudi. 65 E ntangwa yayina, Solomo ovangisi nkinzi+ kumosi ye Isaele yawonso, nkutakani yanene ya wantu batuka kuna Lebo-kamati* yakuna Ndimb’a Engipito,+ vana ndose a Yave wa Nzambi eto, entete muna lumbu nsambwadi, i bosi muna lumbu nsambwadi yankaka, yawonso lumbu 14. 66 E lumbu kina kialanda,* osindikidi nkangu, basambwidi o ntinu, bavutukidi muna nzo zau ye kiese yo luyangalalu lwa ntima mu kuma kia wete+ una Yave kasongele kwa Davidi wa selo kiandi yo nkangu andi Isaele.