Nsiku

5 I bosi, Mose obokele Isaele yawonso yo kubavovesa vo: “E Isaele, nuwá e nsiku ye nzengo za mfundisa zina ikunuzayisa o unu, nufwete zo longoka yo lemvokela zo una ufwene. 2 Yave wa Nzambi eto wakanga yeto e kangu kuna Korebe.+ 3 O Yave kakanga kangu diadi ye akulu eto ko, kansi yo yeto, yeto awonso tuna o moyo ovava o unu. 4 Yave wamokena yeno mantalani vana mongo, tuka vana tiya.+ 5 Muna ntangwa yayina,+ yatelama vana vena Yave yo yeno mu kunusamunuina e diambu dia Yave, kadi wonga nuakala wau mu kuma kia tiya, ke nuatomboka kuna mongo ko.+ Oyandi wavova vo:

6 “‘Mono i Yave wa Nzambi aku, ona wavaikisa muna nsi ya Engipito, muna nsi ya ubundu.*+ 7 Kufwete sambila nzambi zankaka ko, mono kaka ofwete sambila.+

8 “‘Kufwete kuyivangila teke kiavalwa ko+ yovo fwaniswa kia konso lekwa kina kuna zulu yovo ova ntoto yovo muna maza. 9 Kufwete yo vumbamena ko ngatu vukumunua muna kubasadila,+ kadi omono Yave wa Nzambi aku, i Nzambi ona ovavanga vo wantu basambila kaka yandi.+ Iyambula vo wana ye mbandu ina yantatu ye mbandu ina ya nyá ya awana bekumbenganga, bamona e mpasi mu kuma kia bi wa mase mau,+ 10 kansi isonganga walakazi* yamuna mbandu ina ya funda y’awana bekunzolanga yo lunda e nkanikinu miame.

11 “‘Kusadila nkumbu a Yave wa Nzambi aku mu mpila yambi ko,+ kadi Yave tumba ketumba ndiona osadila e nkumbu andi mu mpila yambi.+

12 “‘Lunda e Lumbu kia Vundu kimana kiakala kiavauka, wauna o Yave wa Nzambi aku kakanikina.+ 13 Ofwete sala yo fokola e salu yaku yawonso mu lumbu sambanu,+ 14 kansi e lumbu kiansambwadi i lumbu kia vundu kuna kwa Yave wa Nzambi aku.+ Kufwete sala konso salu ko,+ kana ngeye, kana mwan’aku ayakala yovo mwan’aku ankento ngatu ntaudi aku ayakala yovo ntaudi aku ankento, kana ngombe aku yovo buluku diaku yovo konso twelezi kiaku ngatu nzenza ina omu mbanza zaku,*+ kimana o ntaudi aku ayakala yovo ntaudi aku ankento kavunda nze ngeye.+ 15 Sungamena vo ngeye mbundu wakituka muna nsi ya Engipito, o Yave wa Nzambi aku wavaikisa mûna yo koko kwankuma ye koko kwalambuka.+ Kiaki i kuma o Yave wa Nzambi kakanikina vo walunda e Lumbu kia Vundu.

16 “‘Zitisa se diaku yo ngudi aku,+ wauna Yave wa Nzambi aku kakanikina, kimana wazinga lumbu yayingi yo vatumuka* muna nsi ina Yave wa Nzambi aku kekuvana.+

17 “‘Kuvondi ko.+

18 “‘Kute zumba ko.+

19 “‘Kuyiyi ko.+

20 “‘Kusila nkwaku umbangi waluvunu ko.+

21 “‘Kulokokela nkento a nkwaku ko.+ Kulokokela nzo a nkwaku ko yovo mpatu andi yovo ntaudi andi ayakala yovo ntaudi andi ankento yovo ngombe andi yovo buluku diandi ngatu konso lekwa kia nkwaku.’+

22 “Emiami i nkanikinu* kavova o Yave kwa nkutakani eno yawonso vana mongo, tuka vana tiya, tuti, tombe kiangolo kikilu+ ye nding’angolo, kakudikila diaka diambu ko; i bosi, wasoneka mio mu babu yole ya matadi yo vana yo kwa mono.+

23 “Kansi, vava nuawá e ndinga tuka vana tombe, ekolo mongo wakwamanga o tiya,+ awonso bavitanga o ntu muna makanda meno ye akuluntu bafinama kwa mono. 24 I bosi nuavova vo: ‘Yave wa Nzambi eto utusongele o nkembo andi yo nene wandi, oyeto tuwidi e nding’andi tuka vana tiya.+ O unu, tumwene vo Nzambi olenda mokena yo muntu, o muntu ndioyo olenda kwamanana zinga.+ 25 Owau, ekuma tufwete fwila? Kadi o tiya twatu twampwena tulenda kutubomona. Avo tukwamanene wá e nding’a Yave wa Nzambi eto, fwa kikilu tufwa. 26 Kadi, nani muna wantu awonso* wawá kala e nding’a Nzambi amoyo tuka vana tiya wauna tuwididi yo yeto yo kwamanana zinga? 27 Wenda ngeye kibeni wafinama mu wá mawonso kevova o Yave wa Nzambi eto, ngeye okutuzayisa mawonso mana Yave wa Nzambi eto kekuzayisa, oyeto tuwá yo vanga mo.’+

28 “Muna diadi, Yave wawá mana nuavova kwa mono, Yave wampovesa vo: ‘Ngwidi e mvovo mivovele o nkangu wau kwa ngeye. Mawonso bavovele mambote.+ 29 Ekwe kele vo bakala ye ntima mikumpuminanga lumbu yawonso+ yo kwamanana lemvokela e nkanikinu miame miawonso,+ mambu mau ye ma wan’au mambote madi kala yakwele mvu!+ 30 Wenda, ubazayisa vo: “Nuvutuka muna nzo zeno za ngoto.” 31 Kansi, ongeye kala yame ovava, yambula yazayisa e nkanikinu miawonso, nsiku ye nzengo za mfundisa zina ofwete kubalonga, zina belemvokela muna nsi ina ikubavana kimana bavua yo.’ 32 Owau, nutoma keba kimana nuavanga wauna Yave wa Nzambi eno kanukanikina.+ Ke nuviluka ku lunene ko ngatu ku lumonso.+ 33 Nufwete kangalela una ufwene muna nzila ina Yave wa Nzambi eno kanukanikina,+ kimana nuazinga yo vatumuka yo wokesa e lumbu yeno muna nsi ina nuvua.+