Zasoneka Luka

9 I bosi, Yesu obokele yau Kumi ye Zole, ubavene nkuma ye wisa kia vaikisa nkuya miawonso+ yo wuka mayela.+ 2 Ubatumini benda samuna e Kintinu kia Nzambi yo sasula mbevo, 3 ubavovese vo: “Ke nunati lekwa ko muna nkangalu yovo nkau yovo nkutu a madia yovo mbolo yovo nzimbu;* ngatu nata yinkutu yole.*+ 4 Kansi, konso nzo nukota, nukala mûna yavana nukatuka mo.+ 5 Konso ana balembi kunutambula, vava nukatuka muna mbanza yayina, nukubula mbundukutu a tambi yeno, muna umbangi kuna kwa yau.”+ 6 Bakatukidi, bele muna mavata mawonso ma zunga, bele samuninge nsangu zambote yo wuka mbevo mwawonso.+

7 Vava Erodi* wa nyadi a mvivu kawidi o mambu mawonso mavangamene, otokane kikilu kadi ankaka bavovanga vo Yoane ofulukidi muna mafwa,+ 8 kansi ankaka vo, Eliya omonekene, ankaka vo, mosi muna ngunza za nz’ankulu ofulukidi.+ 9 O Erodi ovovele vo: “O Yoane yanzenga o ntu.+ Owau, nani ndioyo ngwidi ovanganga e mambu mama?” Muna kuma kiaki, ovavidi kumona.+

10 Antumwa vava bavutukidi, basamwini kwa Yesu mawonso bavangidi.+ Ubanete vana fulu kia yau kaka muna mbanza ina ye nkumbu vo Betesaida.+ 11 Kansi e ndonga vava izeye wo, inlende. Otomene kubatambula, ubasamunuini mambu mu kuma kia Kintinu kia Nzambi, osaswidi awana bavavanga o wukwa.+ 12 O kuma kuyantikidi o fwa. Yau Kumi ye Zole bezidi kumvovesa vo: “Sindika e ndonga, kimana benda muna mavata mazietele ye muna mpatu, bavava e fulu kia leka yo madia, kadi va makanga twina.”+ 13 Ubavovese vo: “Oyeno nubavana lekwa kia dia.”+ Bavovele vo: “Mbolo zitanu kaka tuna zau ye mbizi zole za maza, nanga vo yeto kibeni twenda sumba madia mu kuma kia wantu awaya awonso.” 14 Kadi vakedi tezo kia 5.000 ma akala. Ovovese alongoki andi vo: “Nubafongesela mu buka kia makumatanu-makumatanu.” 15 Bavangidi wo, bafongese yau awonso. 16 Obongele mbolo zau zitanu ye mbizi za maza zau zole, osengwele o meso kuna zulu, osambwidi zo. I bosi, obukunuini zo, ovene zo kw’alongoki batambika zo kwa ndonga. 17 Awonso badidi yo yukuta, bakutikidi e nkesona zisuvidi, yitunga 12.+

18 Vava kasambidinge vana fulu kia yandi kaka, alongoki bezidi kwa yandi, ubayuvuidi vo: “E ndonga nani ikungikilanga?”+ 19 Bamvutwidi vo: “Yoane wa Mvubi, ankaka vo, Eliya, ankaka mpe vo, mosi muna ngunza za nz’ankulu ofulukidi.”+ 20 Ubavovese vo: “Oyeno, nani nukungikilanga?” Petelo ovutwidi vo: “U Kristu a Nzambi.”+ 21 Otomene kubakanikina vo ke basamuni wo kwa muntu ko,+ 22 ovovele mpe vo: “O Mwan’a muntu kafwete mweswa e mpasi zayingi yo bembolwa kw’akuluntu ye nganga zambuta ye asoneki yo vondwa+ yo fulwa muna lumbu kiatatu.”+

23 I bosi, ovovele kw’awonso vo: “Konso ona ozolele kwiza ndandi, yambula kayivanina o nkalu+ yo nata o nti andi ampasi* lumbu ke lumbu, yo kwamanana kundanda.+ 24 Kadi konso ona ozolele vuluza o moyo andi, vidisa kevidisa wo, kansi konso ona ovidisa o moyo andi mu kuma kiame, i yandi ovuluza wo.+ 25 Ozevo, nkia mfunu dikala kwa muntu avo obakidi e nza yawonso kansi ovidisi o moyo andi yovo kuyitwasila e mpasi e?+ 26 Kadi konso ona okumbwena e nsoni yo mwena mambu mam’e nsoni, o Mwan’a muntu mpe okumwena e nsoni vava kekwiza muna nkembo andi ye muna nkembo a Se diandi ye nkembo a mbasi zavelela.+ 27 Kieleka, inuvovese wo vo, ankaka batelamene ovava ke beyeleka nkutu lufwa ko yavana bemona Kintinu kia Nzambi.”+

28 Vava kavovele mambu mama, vaviokele tezo kia lumbu nana, i bosi, onete Petelo yo Yoane yo Yakobo, otombokele kuna mongo kasamba.+ 29 Ekolo kasambidinge, e mpw’a ndose andi isobele, e mvuatu miandi mikitukidi se miampembe yo kezima. 30 Wantu wole bayantikidi mokena yandi; Mose yo Eliya. 31 Bamonekène muna nkembo, bayantikidi mokenena mambu ma ngiend’andi, mana melunganena muna Yerusaleme.+ 32 Vo i Petelo ye awana bakedi yandi, babakamene tulu twangolo, kansi vava basikamene, bamwene o nkembo andi+ ye wantu wole ana batelamene yandi. 33 Ekolo bekatukanga vana kena, o Petelo ovovese Yesu vo: “E Nlongi, diambote kwa yeto twakala vava. Dianu vo, yambula twatunga saba tatu, kimosi kiaku, kimosi kia Mose, kimosi kia Eliya.” Kazeye dina kavovele ko. 34 Kansi, ekolo kavovelenge mambu mama, e tuti dizidi, dibayitalele. Vava dibafukidi, bamwene o wonga. 35 I bosi, e ndinga+ itukidi muna tuti, oku vo: “Ndioyo i Mwan’ame ona yasola.+ Nunwila.”+ 36 Vava e ndinga iwakane, o Yesu osidi yandi mosi kaka. Oyau badingalale kwau, muna lumbu yayina ke basamuna kwa muntu ko kana nkutu diambu dimosi muna mana bamona.+

37 Muna lumbu kialanda, vava bakulumuka kuna mongo, ndong’ayingi izidi kunkika.+ 38 Vakedi muntu obokanga vana vena e ndonga, oku vo: “E Nlongi, dodokolo diaku, tala o mwan’ame ayakala, i mwan’ame mosi kaka,+ 39 o mwanda avo umbakidi, vana vau okazanga yo tuntumuka yo vaika e fulu-fulu muna nua, diampasi dikalanga muna kunyambula kana nkutu umene kunyoyesa. 40 Ndodokele alongoki aku bavaikisa wo, kansi ke balendele wo ko.” 41 O Yesu ovutwidi vo: “E mbandu yakondwa lukwikilu yo bendomoka,+ yamu nkia kolo ikwamanana kala yeno yo zizidila mavangu meno? Twasa o mwan’aku ovava.”+ 42 Kansi, ekolo kafinamanga, o nkuya umbwisidi vana ntoto, untutumwini kikilu. Kansi, o Yesu otumbidi mwand’a usafu, osaswidi o nleke, umvutwidi kwa se diandi. 43 Awonso basivikidi kikilu onene wa nkum’a Nzambi.

Ekolo besivikanga mu kuma kia mambu mawonso kavangidi, ovovele kwa alongoki andi vo: 44 “Nutoma wá yo sungamena mambu mama, kadi o Mwan’a muntu oyekolwa vana moko ma wantu.”+ 45 Kansi, ke babakwidi ko dina kavovele. Kadi maswekama kuna kwa yau, kimana balembi mo bakula, bamwene o wonga wakunyuvula diambu diadi.

46 I bosi, e mpaka zivaikidi vana bena kana nani muna yau osundidi o nene.+ 47 O Yesu wau kazeye makani mau ma ntima, obongele kingiana-ngiana, untelamese vana ndambu andi, 48 ubavovese vo: “Konso ona otambwidi kingiana-ngiana kiaki muna nkumbu ame, mono mpe katambwidi; konso ona mpe untambwidi, Ndiona wantuma mpe katambwidi.+ Kadi ndiona okuyisakidika vovo nuina yeno awonso, yandi i wanene.”+

49 O Yoane ovutwidi vo: “E Nlongi, tumwene muntu mosi ovaikisanga nkuya muna nkumbu aku, tunsimini, kadi ke kutulandanga ko.”+ 50 O Yesu umvovese vo: “Ke nunsimi ko, kadi konso ona olembi kunusia kitantu, ku sambu dieno kena.”

51 Vava kiafinamanga e lumbu ketomboka kuna zulu,+ obakidi e nzengo za kwenda* kuna Yerusaleme. 52 Dianu vo, otumini akaka muna alongoki benda viti. Bele, bakotele mu vata dimosi dia esi Samaria, kimana bankubikila e fulu. 53 Kansi ke bantambwidi ko,+ kadi wakala ye kani dia kwenda* kuna Yerusaleme. 54 Vava alongoki andi Yakobo yo Yoane+ bamwene wo, bavovele vo: “E Mfumu, nga ozolele vo twalomba o tiya twakulumuka kuna zulu, twabafukis’e?”+ 55 Ozevo, Yesu ovilukidi, ubatumbidi. 56 Bele ku vata diankaka.

57 Ekolo bayendanga muna nzila, muntu mosi umvovese vo: “Ikulanda konso kuna okwenda.” 58 Kansi, Yesu umvutwidi vo: “E mbulu bena ye nduka, e nuni za zulu zina ye nzialwa, kansi o Mwan’a muntu kena ye fulu kasia ntu ko.”+ 59 Ovovese wankaka vo: “Undanda.” Oyandi vo: “E Mfumu, ungiambula ngienda zika ntete o se diame.”+ 60 Umvutwidi vo: “Yambula mafwa+ mazika mafwa mau, vo i ngeye, wenda mwanganisa e nsangu za Kintinu kia Nzambi.” 61 Wankaka ovovele vo: “Ikulanda, e Mfumu, kansi ungiambula ngienda teka kanina esi nzo ame.” 62 O Yesu umvovese vo: “Ke vena muntu ko osimbidi e nsengo yo tala kunima,+ kakala wafwana muna Kintinu kia Nzambi.”+