Nsiku

4 “E Isaele, owau nuwá e nsiku ye nzengo za mfundisa zina ikunulonga nualemvokela, kimana nuazinga,+ nuakota yo vua e nsi ina Yave wa Nzambi a akulu eno kekunuvana. 2 Ke nufwete kudikila diambu ko muna mvovo ikunukanikinanga, ke nufwete mo katula mpe diambu ko;+ nulunda e nkanikinu mia Yave wa Nzambi eno mina ikunukanikinanga.

3 “O meso meno mamona mana Yave kavanga mu diambu dia Bale-Peo; Yave wa Nzambi eno wafukisa akala awonso ova kati kweno ana balanda Bale-Peo.+ 4 Kansi, oyeno nuatatidila Yave wa Nzambi eno, yeno awonso nuina moyo yamu unu. 5 Tala, omono yanulonga e nsiku ye nzengo za mfundisa,+ wauna o Yave wa Nzambi ame kankanikina, kimana nualemvokela mio muna nsi ina nuvua. 6 Nufwete mio lemvokela una ufwene,+ kadi ediadi disonga vo nu akwa ngangu+ ye umbakuzi+ vana meso ma wantu ana bewá e nsangu mu kuma kia nsiku miami miawonso yo vova vo: ‘Kalukatikisu ko vo e zula kiaki kianene i nkangu angangu ye umbakuzi.’+ 7 Kadi, nkia zula kianene kina ye nzambi zikubafinamanga wauna o Yave wa Nzambi eto kekutufinamenanga konso ntangwa tukumbokelanga?+ 8 Nkia zula kianene kina ye nsiku miansongi ye nzengo za mfundisa zafwanana yo Nsiku wau wawonso isianga ova ntadisi eno unu?+

9 “Toma keba yo sia sungididi,* kimana walembi vilakana mambu mana o meso maku mamwene, kimana malembi katuka muna ntim’aku muna lumbu yawonso ya zingu kiaku. Ofwete mo zayisa mpe kwa wan’aku ye kwa atekolo aku.+ 10 Muna lumbu kina nuatelama vana ntadisi a Yave wa Nzambi kuna Korebe, Yave wampovesa vo: ‘Unkutakesela o nkangu kimana bawá e mvovo miame,+ kimana balongoka kumpumina+ e lumbu yawonso bezinga ova ntoto ye balonga o wan’au.’+

11 “Muna kuma kiaki, nuafinama yo telama vana sina dia mongo, o mongo wakwamanga tiya twalwakanga yakuna kati kwa zulu;* vakala tombe, tuti ye tombe kiangolo kikilu.+ 12 Yave wayantika vovana yeno tuka vana tiya.+ Oyeno nuawá e zú dia mvovo, kansi ke nuamona muntu ko+—ndinga kaka nuawá.+ 13 Oyandi wayika e kangu+ diandi kwa yeno dina kanukanikina vo nualemvokela, i sia vo, Nsiku Kumi.*+ I bosi, wasoneka mio mu babu yole ya matadi.+ 14 Muna ntangwa yayina, Yave wankanikina vo yanulonga e nsiku ye nzengo za mfundisa, zina nufwete lemvokela muna nsi ina nukota nuavua yo.

15 “Wau vo ke nuamona muntu ko muna lumbu kina Yave kamokena yeno vana mongo a Korebe tuka vana kati kwa tiya, nutoma sia e sungididi* 16 nualembi vanga mambu mambi muna kuyivangila konso teke kiavalwa kiafwanana ye konso lekwa, kiakala fwaniswa kia yakala yovo kia nkento,+ 17 kiakala fwaniswa kia konso bulu ova ntoto yovo fwaniswa kia konso nuni itilumukanga muna zulu,+ 18 kiakala fwaniswa kia konso vangwa kiyatatanga ova ntoto yovo fwaniswa kia konso mbizi ina muna maza muna nsi a ntoto.+ 19 Vava osengola meso maku kuna zulu yo mona e ntangwa, ngonde ye ntetembwa—e vu kiawonso kia zulu—kuvukumunua ko, kuvumbamena yo ko ngatu sadila yo.+ Yave wa Nzambi aku ubavene kwa nkangu miawonso oku nsi a zulu diawonso. 20 Kansi, yeno i kabonga o Yave yo kunuvaikisa muna fûlu dia tiya dia fudila e sengwa, i sia vo, muna Engipito, nuakituka se nkangu andi akivuila,*+ wauna nuina o unu.

21 “Yave wamfungila makasi mu kuma kieno,+ wadia e ndofi vo kisauka Yodani ko ngatu kota muna nsi yambote ina Yave wa Nzambi eno kekunuvana se vua.+ 22 Kadi mu nsi yayi ifwila; kisauka Yodani ko,+ kansi oyeno nusauka yo vua e nsi yoyo yambote. 23 Nutoma keba kimana nualembi vilakana e kangu dia Yave wa Nzambi eno, dina kakanga yeno,+ ke nuyivangila teke kiavalwa ko, kiafwanana ye konso lekwa nuasimwa kwa Yave wa Nzambi eno.+ 24 Kadi o Yave wa Nzambi eno tiya+ twambomoni, i Nzambi ona ovavanga vo wantu basambila kaka yandi.+

25 “Vava nuwuta wana ye atekolo yo zinga kolo kiayingi muna nsi, nuavanga mambu mekunutwasila lufwasu yo vanga teke yavalwa+ ya konso mpila yo vanga oma mambi vana meso ma Yave wa Nzambi eno muna kumfungisa makasi,+ 26 yambula awonso bena kuna zulu y’ova ntoto bakala se mbangi zame o unu mu kuma kieno vo mu nzaki kieleka nuvidila muna nsi ina nuvua vava nusauka e Yodani. Ke nuzinga kolo kiayingi ko muna nsi, kansi fwaswa kieleka nufwaswa.+ 27 Yave okunumwanganesa muna nkangu,+ akete kaka muna yeno besala o moyo+ muna zula ina Yave kekununata. 28 Okwakuna, nusadila nzambi za nti ye za matadi ezi zavangilwa muna moko ma wantu,+ e nzambi zina ke zilendi mona ko yovo wá yovo dia ngatu nunkuta.

29 “Tuka kwakuna, avo ovavidi Yave wa Nzambi aku, okunsolola kieleka,+ avo untombele yo ntim’aku wawonso yo moyo* aku wawonso.+ 30 Muna ntangwa yayina, vava okala mu mpasi zayingi yo bwilwa mambu mama mawonso, ongeye ovutuka kwa Yave wa Nzambi aku, owá e ndinga andi.+ 31 Kadi o Yave wa Nzambi aku, Nzambi a nkenda.+ Oyandi ke kubembola ko yovo kufwasa ngatu vilakana e kangu kadila e ndofi kwa akulu aku.+

32 “Owau, yuvula oma ma lumbu yankulu, vitila tandu kiaku, tuka muna lumbu kina Nzambi kasemena o muntu ova ntoto; vavulula tuka ku nsuka eyi ya zulu yakuna nsuka yankaka ya zulu. Nga vavangama kala diambu dianene dia mpila yayi? Nga mwawakana kala diambu dia mpila yayi?+ 33 Nga vena yo nkangu wawá kala e nding’a Nzambi tuka vana tiya muna mpila ina owididi yo ye okwamanene zinga?+ 34 Yovo, nga Nzambi wateza kala kuyibongela zula vana kati kwa zula kiankaka muna mfundisa,* sinsu, masivi,+ vita,+ koko kwankuma,+ koko kwalambuka yo mavangu mansisi,+ wauna Yave wa Nzambi eno kavanga mu kuma kieno muna Engipito vana meso meno? 35 O mambu mama kwa yeno masongwa kimana nuazaya wo vo Yave i Nzambi aludi;+ ke vena wankaka ko.+ 36 Wanuwisa e ndinga andi tuka kuna zulu muna kunusingika. Ova ntoto, wanumwesa o tiya twandi twampwena, nuawá e mvovo miandi tuka vana tiya.+

37 “Wau vo wazola akulu eno yo sola e mbongo au ikubalandila+ yakala se nkangu andi, oyeno nuavaikiswa muna Engipito vana meso mandi muna nkuma andi anene. 38 Wayinga vana ntadisi eno e zula inusundidi o nene yo nkuma, kimana kanukotesa muna nsi au yo kunuvana yo se vua, wauna dina o unu.+ 39 Tuka unu kiaki, zaya dio yo sia dio muna ntim’aku vo Yave i Nzambi aludi kuna zulu diantandu ye ova ntoto kuna nsi.+ Ke vena wankaka ko.+ 40 Ofwete lunda e nsiku miandi ye nkanikinu miandi mina ikukanikinanga o unu, kimana ongeye yo wan’aku bekulandila nuasambulwa, wazinga kolo kiayingi muna nsi ina Yave wa Nzambi aku kekuvana.”+

41 Muna ntangwa yayina, Mose ovambwidi mbanza tatu kuna este ya Yodani.+ 42 Avo muntu ovondele nkwandi lembi wo kana ye kateka kumenga ko,+ kafwete tinina mu imosi muna mbanza zazi kimana kazinga.+ 43 Ezazi i mbanza: Bese,+ ina muna makanga vana mongo alelama mu kuma kia Anerubeni; Ramote+ ina muna Ngiladi, mu kuma kia Anengadi; Ngolane,+ ina muna Basani mu kuma kia Anemanase.+

44 Owau i Nsiku+ una Mose kasia vana ntadisi a nkangu a Isaele. 45 E miami i mîna, nsiku ye nzengo za mfundisa zina Mose kavana kwa Aneyisaele vava bavaika muna Engipito,+ 46 muna zunga kia Yodani, muna ndimba una watalana ye Bete-peo,+ muna nsi ya Sikone wa Ntinu a Aneyamore, ana bazingilanga muna Kesebone,+ ana Mose yo Aneyisaele basunda vava bavaika muna Engipito.+ 47 Babaka e nsi andi ye nsi ya Onge wa Ntinu+ a Basani, atinu wole a Aneyamore ana bakala muna zunga kia este kia Yodani, 48 tuka kuna Arowa,+ eyi ina vana ndambu a Ndimb’a Arenone yakuna Mongo a Sione, i sia vo, Keremone,+ 49 ye Araba yawonso muna zunga kia este kia Yodani, yakuna Mbu wa Araba,* vana sina dia miongo mia Pisenga.+