Wantete wa Ntinu

21 Kuna kwalanda, vabwa diambu mu kuma kia mpatu a vinyu a Nabote wa Nyizerele; e mpatu yayi kuna Yizerele+ yakala, vana ndambu a lûmbu lwa Akabi wa ntinu a Samaria. 2 Akabi ovovese Nabote vo: “Umpana mpatu aku a vinyu kimana yakuna mo lekwa, kadi lukufi ina ye nzo ame. Ikuvana mpatu yankaka ya vinyu isundidi yayi o wete. Avo ozolele, ikuvanina yo ntalu andi muna nzimbu.” 3 Kansi, Nabote ovovese Akabi vo: “Kilendi kuvana e vua dia mase mame ko,+ kadi o Yave wasima diambu diadi.” 4 Akabi okotele muna nzo andi okendalele wau vo Nabote wa Nyizerele umvovese vo: “Kilendi kuvana e vua dia mase mame ko.” Olambalele vana mfulu andi, ovilwidi mpolo andi kuna yaka, kazolele dia ko.

5 O nkaz’andi Izebele+ wizidi kwa yandi, unyuvuidi vo: “Ekuma okendalele yo lembi dia?” 6 Akabi umvutwidi vo: “Mpovese Nabote wa Nyizerele vo: ‘Untekela e mpatu aku a vinyu. Avo kuzolele ko ikuvana mpatu ankaka a vinyu.’ Kansi, ovovele vo: ‘Kilendi kuvana mpatu ame a vinyu ko.’” 7 Izebele wa nkaz’andi umvovese vo: “Nga ku ntinu a Isaele ko e? Telama wadia, wayangidika ntim’aku. Ikuvana e mpatu a vinyu a Nabote wa Nyizerele.”+ 8 Muna diadi, Izebele osonekene nkanda muna nkumbu a Akabi yo sia mio dimbu+ kia ntinu yo twika mio kwa akuluntu+ y’azitu ana bakala muna mbanz’a Nabote. 9 Osonekene muna nkanda vo: “Nuboka nkoki wa fionkonona,* nuvuandisa Nabote vana kati kwa nkangu. 10 Nusola yimpumbulu yole, bavuanda vana ntwal’andi, bansila kimbangi kia luvunu,+ oku vo: ‘Otiangwini Nzambi yo ntinu!’+ I bosi, lunata Nabote kuna mbazi a mbanz’a, nuntuba matadi yavana kefwa.”+

11 Esi mbanz’a Nabote, akuluntu y’akwa zitu ana bazingilanga muna mbanz’andi bavanga wauna Izebele kasoneka muna nkanda kabatwikila. 12 Babokele nkoki wa mfionkonona yo vuandisa Nabote va kati kwa nkangu. 13 Yimpumbulu yole bezidi, bavuende vana ntwal’a Nabote, bansididi kimbangi kia luvunu vana vena nkangu, oku vo: “Nabote otiangwini Nzambi yo ntinu!”+ I bosi, banete Nabote kuna mbazi a mbanza, bantubidi matadi yavana kafwidi.+ 14 Batwikidi nsangu kwa Izebele, oku vo: “Nabote otubilu matadi, ofwidi.”+

15 Izebele wau kawidi vo Nabote otubilu matadi yo fwa, ovovese Akabi vo: “Telama, ndá bonga e mpatu a vinyu a Nabote wa Nyizerele+ ina kazola kutekela ko, kadi Nabote kasidi diaka moyo ko, ofwidi.” 16 Akabi vava kawidi wo vo Nabote ofwidi, vana vau otelamene, okulumukini kuna a mpatu a vinyu a Nabote wa Nyizerele, kimana kabonga yo.

17 Kansi, e diambu dia Yave dizidi kwa Eliya+ wa Ntesebe, oku vo: 18 “Telama, kulumuka wenda wanana yo Akabi wa ntinu a Isaele, ona wina muna Samaria.+ Okulumukini kuna mpatu a vinyu a Nabote, kabonga yo. 19 Umvovesa vo, ‘I wau wuwu kavovele o Yave: “Ovondele muntu,+ owau obongele mpe mpatu andi e?’”*+ Umvovesa vo, ‘I wau wuwu kavovele o Yave: “Vana fulu kina e mbwa zavendela menga ma Nabote, i vana mpe mbwa zivendela menga maku.”’”+

20 Akabi ovovese Eliya vo: “E mbeni ame unsolwele!”+ Eliya umvutwidi vo: “Isolwele. ‘Wau vo osiandamene* vanga mambu mambi vana meso ma Yave,+ 21 ikutwasila mpasi, ikufukisa yo fwasa emvimba wan’amakala* awonso+ a nzo a Akabi kumosi yo ntovoki ye munkondwa nsadisi muna Isaele.+ 22 Ikitula nzo aku nze nzo a Yerobame+ wa mwan’a Nebate, ye nzo a Basa+ wa mwan’a Akiya, kadi unkendelekele kikilu yo sumukisa Isaele.’ 23 Yave ovovele mu kuma kia Izebele vo: ‘E mbwa zidia Izebele kuna mpatu muna Yizerele.+ 24 Konso muntu muna nzo a Akabi ofwila muna mbanza, e mbwa zikundia, ona ofwila muna kiana, e nuni za zulu zikundia.+ 25 Ke vasidi kala muntu wafwanana yo Akabi+ ko, ona wasiandama* vanga mambu mambi vana meso ma Yave, wavukumunua kwa Izebele+ wa nkaz’andi. 26 Wavanga mambu mangemi mu landa teke yangemi* wauna bavanganga Aneyamore awonso ana Yave kayinga vana vena Aneyisaele.’”+

27 Akabi vava kawidi mambu mama, otiazwini mvuatu miandi, ovuete ngoto; ofionkonuene,* olambalele vana ngoto yo kwendela kuna lukendalalu. 28 E diambu dia Yave dizidi kwa Eliya wa Ntesebe, oku vo: 29 “Nga omwene una Akabi kayikululwidi mu kuma kiame?+ Wau vo uyikulwidi ova ngina, kitwasa mpasi zazi mu lumbu yandi ko. Itwasa e mpasi zazi muna nzo andi muna lumbu ya mwan’andi.”+