Afundisi

4 Vava Eude kafwa, Aneyisaele bavangidi diaka mambu mambi vana meso ma Yave.+ 2 I dianu vo, Yave ubayekwele* vana moko ma Yabini wa ntinu a Kenani,+ ona wayalanga muna Kaso. O mfidi a makesa mandi i Sisera ona wakala kuna Karosete+ ya zula.* 3 Aneyisaele babokele kwa Yave,+ kadi Yabini makalu 900 ma vita mena ye sakilwa ya sengwa*+ kakala mau, mvu 20 kabangika Aneyisaele.+

4 Debora wa ngunza ankento+ wa nkaz’a Lapidote, wafundisanga Isaele muna ntangwa yayina. 5 Kuna nsi a ba dia Debora kavuandanga, vana kati kwa Rama+ ye Betele+ muna zunga kia miongo mia Eferaime; Aneyisaele bayendanga kwa yandi kabafundisa. 6 Otumisi Baraki+ wa mwan’a Abinoa tuka kuna Kedese-Nafetali,+ umvovese vo: “Yave wa Nzambi a Isaele ukanikini vo: ‘Tomboka kuna* Mongo a Tabo, nata 10.000 ma wan’a Nafetali yo wan’a Zebulune. 7 Ikutwasila Sisera wa mfidi a makesa ma Yabini kuna nkoko a Kisone+ yo makalu mandi ma vita yo makesa mandi, ikunyekola vana moko maku.’”+

8 Baraki umvovese vo: “Avo okwenda yame, se ngienda, kansi avo kukwenda yame ko, omono mpe kikwenda ko.” 9 Ovutwidi vo: “Kwenda ikwenda yaku. Kansi, e vita yayi ke ikutwasila nkembo ko, kadi Yave oyekola Sisera vana moko ma nkento.”+ Debora otelamene, wele yo Baraki kuna Kedese.+ 10 Baraki otumisi Zebulune yo Nafetali+ beza oku Kedese, 10.000 ma wantu banlende. Debora mpe wele yandi.

11 O Kebe wa mwan’a Kene wavambana yo Anekene,+ wan’a Kobabe wa kô wa Mose,+ e saba kiandi kiakala vana ndambu a nti anene kuna Sananimi muna Kedese.

12 Bazayisi Sisera vo Baraki wa mwan’a Abinoa otombokele kuna Mongo a Tabo.+ 13 Vana vau, Sisera okutakese makalu mandi mawonso ma vita—900 za makalu ma vita mena ye sakilwa ya sengwa*—ye makesa mandi mawonso, kimana benda kuna Karosete ya zula yakuna nkoko a Kisone.+ 14 Debora ovovese Baraki vo: “Telama, kadi kiaki i lumbu Yave keyekola Sisera vana moko maku. Nga Yave ke singa kuvita kuna ntwala ko e?” Baraki okulumukini tuka kuna Mongo a Tabo, 10.000 ma wantu banlende. 15 Ozevo, Yave okotese mvuanga kwa Sisera ye makalu mandi ma vita ye vu kiandi kiawonso+ vana vena nsosolo a Baraki. I bosi, Sisera okulumukini muna kalu diandi, otinini kia malu. 16 Baraki olakamene makalu mandi ma vita ye makesa yakuna Karosete ya zula. E vu kiawonso kia Sisera kiavondelwa muna nsosolo; ke vavuluka muntu ko.+

17 Sisera otinini kia malu kuna saba kia Yaele+ wa nkaz’a Kebe+ wa Nkene, kadi Yabini+ wa ntinu a Kaso ye nzo a Kebe wa Nkene mu ungudi bakala. 18 Yaele ovaikidi kakika Sisera, umvovese vo: “Wiza e mfumu ame, kota kwaku. Kumoni wonga ko.” Okotele muna saba kiandi, umfukidi e vunga. 19 Umvovese vo: “Umpana fimaza yanua, kadi vuina ngina diau.” Oziwidi mvungu a kimvumina umvene kanua,+ i bosi umfukidi diaka. 20 Sisera umvovese vo: “Telama va mwelo a saba, avo muntu wizidi kuyuvula vo: ‘Nga muntu una mo e?’ vova vo: ‘Ve!’”

21 Yaele wa nkaz’a Kebe obongele mpalu a saba ye malutelo. Wau vo wayoya kakala, olele wosola kia tulu, Yaele oyombokele vana kakala, okomene mpalu muna ntu andi, utompokele yamuna ntoto, ofwidi.+

22 Vava Baraki kalweke vana saba mu vava Sisera, Yaele ovaikidi wele kunkika, ovovele vo: “Wiza yasonga muntu ovavanga.” Okotele yandi muna saba, omwene Sisera olavalele wafwa ye mpalu a saba muna ntu.

23 Ozevo, tuka muna lumbu kiakina, Nzambi wasakidika Yabini wa ntinu a Kenani vana vena Aneyisaele.+ 24 O koko kwa Aneyisaele kwazitanga kaka vana vena Yabini wa ntinu a Kenani+ yavana bafwasa Yabini wa ntinu a Kenani.+