Wanzole wa Tusansu

32 Vava kiavioka mambu mama ye mavangu mama makwikizi,+ Sankerebe wa Ntinu a Asuri, wizidi nuanisa Yuda. Ozungidi mbanza zangolo ye kani dia kota yo kutumuna zo.+

2 Kizekeya vava kamona vo Sankerebe wizidi ye kani dia nuanisa Yerusaleme, 3 wau katekele mokena ye akuluntu ye makesa mandi, obakidi e nzengo za kanga e nto za maza zakala kuna mbazi a mbanza,+ oyau banyikamene. 4 Bakutakese wantu ayingi, bakakidi nto za maza zawonso ye nkoko miakala muna nsi yayina, bavovele vo: “Ekuma ntinu a Asuri kekwiza wanina ulolo wa maza?”

5 Vana ntandu, obakidi e nzengo za tungulula e yaka kiabangulwa, otungidi nzo zandá muna yaka, otungidi yaka kiankaka kuna mbazi. Ovangulwidi mpe e Kundubulu*+ kia Mbanz’a Davidi yo vanga ulolo wa nuaninua* ye ngubu. 6 I bosi otumbikidi mfumu za makesa muna nkangu, ubalungalakese vana yanzala kia vitu dia mbanza, ubakasakese,* oku vo: 7 “Nukala yo unkabu, nukumama. Ke numoni wonga ko ngatu vumiswa mu kuma kia ntinu a Asuri+ ye ndonga kena yau, kadi awaya bena yeto engi ke mu awana bena yandi ko.+ 8 Ngolo za wantu zina kuna sambu diandi, kansi, Yave wa Nzambi eto wina oku sambu dieto, yandi okutusadisa yo nuana e vita zeto.”+ O nkangu ukumamene muna mvovo mia Kizekeya wa Ntinu a Yuda.+

9 Ekolo Sankerebe wa ntinu a Asuri kakala kuna Lakisi+ yo makesa mandi mawonso,* otumini selo yandi kuna Yerusaleme kwa Kizekeya wa Ntinu a Yuda ye kwa Ayuda awonso muna Yerusaleme,+ oku vo:

10 “I wau wuwu kavovele Sankerebe wa Ntinu a Asuri, ‘Mu nki nubundidi e vuvu, wau nuina muna Yerusaleme izungilu e?+ 11 Nga kanumwene ko vo Kizekeya vuna kekunuvunanga yo kunuyekola lwafwila muna nzala ye vuina wau kavovele vo: “Yave wa Nzambi eto okutuvuluza vana moko ma ntinu a Asuri e”?+ 12 Nga ke Kizekeya ko wabangula mabata+ ma Nzambi eno ye maziku+ mandi yo vova kwa Yuda ye Yerusaleme vo: “Ziku dimosi kaka nufwete vumbamena yo yokela ndumbu eno e”?+ 13 Nga ke nuzeye wo ko una twavanga yo mase mame kwa nkangu miawonso mia nsi e?+ Nga nzambi za zula ya nsi zazi zalenda vuluza e nsi zau ova moko mame?+ 14 Vana vena nzambi za zula ina mase mame bafwasa, nkia nzambi walenda vuluza nkangu andi va moko mame? Nga Nzambi eno olenda kunuvuluza ova moko mame?+ 15 Ke nuyambula ko vo Kizekeya kanuvuna ngatu kunuleba mu mpila yayi!+ Ke nunkwikila ko, kadi ke vena nzambi a zula ko yovo kintinu kialenda vuluza nkangu andi va moko mame ye vana moko ma mase mame. Diau dimosi mpe, Nzambi eno ke lenda kunuvuluza ko ova moko mame.’”+

16 Ntaudi zandi basakisi tianguna Yave wa Nzambi aludi yo Kizekeya wa ntaudi andi. 17 Osonekene mpe nkanda+ muna veza Yave wa Nzambi a Isaele+ yo kuntianguna, oku vo: “Wauna nzambi za zula ka zalenda vuluzila nkangu miau ko va moko mame,+ o Nzambi a Kizekeya mpe ke lenda vuluza nkangu andi ko ova moko mame.” 18 Bavovesele nkangu a Yerusalame wakala vana yaka muna nding’a ngolo muna Kiyuda muna kubavumisa yo kubamwesa wonga kimana bakutumuna e mbanza.+ 19 Batiangwini Nzambi a Yerusaleme wauna batiangunuini nzambi za nkangu mia nsi, ezi zina vo salu ya moko ma wantu. 20 Kansi, Kizekeya wa Ntinu yo Yesaya wa ngunza+ wa mwan’a Amoze bakwamanene samba muna diambu diadi yo lomba lusadisu kuna zulu.+

21 I bosi Yave otumini mbasi mosi ovondele makesa mawonso,+ afidi ye mfumu za makesa muna ndo ya ntinu a Asuri, I kuma Sankerebe kavutukila kuna nsi andi ye nsoni. Vava kakotele muna nzo* a nzambi andi, akaka muna wan’andi bamvondele muna nsosolo.+ 22 Muna diadi, Yave wavuluza Kizekeya ye nkangu a Yerusaleme vana moko ma Sankerebe wa Ntinu a Asuri ye vana moko ma mbeni zankaka yo kubavana e vundu muna ndambu zawonso. 23 Ayingi batwasanga tukau kwa Yave kuna Yerusaleme, ye lekwa yantalu kwa Kizekeya wa Ntinu a Yuda,+ tuka muna ntangwa yayina Kizekeya wazitiswa kikilu muna zula yawonso.

24 Muna lumbu yayina, Kizekeya wayela, fioti fiasala nga wafwa, wasamba kwa Yave+ ona wamvana mvutu ye sinsu.+ 25 Kansi, Kizekeya kavutwidi matondo ko muna wete una kavangilu, okitukidi se nkwa lulendo, o makasi ma Nzambi mezidi muna yandi ye muna Yuda ye Yerusaleme. 26 Kansi, Kizekeya uyikulwidi, oyambwidi ntim’a lulendo,+ yandi yo nkangu a Yerusaleme, dianu vo makasi ma Yave ke mabalwakidi ko muna lumbu ya Kizekeya.+

27 Kizekeya okedi ye kimvuama kiayingi yo nkembo;+ otungidi malundilu+ ma palata, wolo, matadi mantalu, mazi ma balasamu, ngubu ye lekwa yawonso yantalu. 28 Otungidi mpe malundilu ma masa, vinyu yampa, mazi ye mpaka za twelezi ya mpila zawonso ye mpaka za makambi. 29 Otungidi mpe mbanza za yandi kibeni, okedi ye ulolo wa twelezi, mameme ye ngombe, kadi Nzambi wamvana mavua mayingi. 30 Kizekeya wakaka e nto a maza+ ma Ngikoni,+ oziwidi nzila kimana makukula kuna yanda, kuna weste yakuna Mbanz’a Davidi,+ Kizekeya wasikila muna salu yandi yawonso. 31 Mfumu za Babele vava batuma wantu banyuvula e sinsu+ kiamoneka muna nsi,+ Nzambi aludi wanyambula yandi mosi muna kuntonta+ mu zaya mawonso makala muna ntim’andi.+

32 Vo i mambu mankaka ma lusansu lwa Kizekeya, mavangu mandi ye walakazi wandi,+ masonama muna mona-meso kia Yesaya+ wa ngunza wa mwan’a Amoze, muna Nkanda wa Ntinu mia Yuda ye Isaele.+ 33 I bosi, Kizekeya olele yo mase mandi, banzikidi vana ntombokelo ya ziami kia wan’a Davidi;+ ozitisu kikilu kwa Ayuda awonso y’esi Yerusaleme vava kafwa. Manase wa mwan’andi oyantikidi yala vana fulu kiandi.