Wantete wa Paulu Kuna kwa Esi Korinto

4 Wantu bafwete kutubadikila vo tu asadisi a Kristu, tu selo ya mbumb’avauka a Nzambi.+ 2 Muna kuma kiaki, divavuanga kwa selo vo bakala ye kwikizi. 3 Kuna kwa mono, diambu diakete kwandi avo mfimpilu kwa yeno yovo kuna mbazi a nkanu. Mono kibeni kikuyifimpanga nkutu ko. 4 Kadi kimwene diambu diambi ko omu mono. Kansi, muna diadi kiyilungisi ko; kadi Yave* okufimpanga.+ 5 Dianu vo, ke nuviti fundisa+ diambu ko yavana kekwiza o Mfumu. Yandi ovaikisa ku mbazi mambu ma tombe maswekama yo sengomona makani ma ntima, konso muntu otambula lusanisinu lwandi kwa Nzambi.+

6 Ampangi, muna wete dieno mpovele mambu mama kwa mono kibeni yo Apolo,+ kimana muna yeto nualongoka nkanikinu owu: “Ke nulutakana mana masonama ko,” nualembi kuyitundidika+ yo badikila mosi vo osundidi nkwandi. 7 Nani usidi nswaswani ye ankaka? Nkia lekwa una kiau kina walembi tambula?+ Avo tambula watambula kio, ekuma okuyisanina nze kiau walembi tambula?

8 Nga nuyukuti kala? Nga nuvueme kala? Nga nuyantikidi kala yala,+ kondwa kwa yeto? Nzolele wo kikilu vo oyeno nuayantika oyala kimana oyeto mpe twayala yeno.+ 9 Kadi mbwene vo yeto antumwa, Nzambi wasukinina kutuvaikisa muna kimpa, nze wantu bazengelwa tumbu kia lufwa,+ e kuma kadi tukitukidi se kimpa kitalwanga kwa nza,+ kw’ambasi ye kwa wantu. 10 Oyeto tu mazowa+ muna diambu dia Kristu, kansi oyeno nu alungaladi muna Kristu; oyeto tu atovoki, kansi oyeno nuakumama; oyeno nuzitiswanga, kansi oyeto tuvezwanga. 11 Yamu wau, nzala tufwanga,+ vuina tumonanga,+ nkonga twina, wandwa tuwandwanga,+ ke tuna ye nzo ko, 12 tufuntukanga ye salu yo sadila muna moko meto.+ Vava tutiangunuanga, tusambulanga;+ vava tubangikwanga, tuzizidilanga;+ 13 vava tuvovelwanga e mbi, tuvutulanga kuna lulembamu;*+ tukitukidi se mvindu* ya wantu a nza, titi ya lekwa yawonso, yamu wau.

14 Inusonekene mambu mama, ke mu kunufusulwisa nsoni ko, kansi muna kunulukisa nze wan’ame anzolwa. 15 Kana una vo nuina ye 10.000 ma akengi* muna Kristu, ke nuna ye mase mayingi ko; kadi nkitukidi se dieno muna Kristu Yesu muna diambu dia nsangu zambote.+ 16 Dianu inudodokele vo, nuntanginina.+ 17 Kiaki i kuma inutumini Timoteo wa mwan’ame anzolwa ye nkwa kwikizi muna Mfumu. Okunusungamesa ndekwa zame* muna Kristu Yesu,+ wauna ilongelanga muna fulu yawonso ye muna nkutakani zawonso.

18 Ankaka bazala ye lulendo vika sia vo kikwiza kwa yeno ko. 19 Kansi, ke kolo ko se ngiza kwa yeno, avo i luzolo lwa Yave,* ke mu kwiza zaya e mvovo mi’awana bazala ye lulendo ko, kansi nkum’au. 20 Kadi e Kintinu kia Nzambi ke diambu dia mvovo ko, kansi dia nkum’a Nzambi. 21 Adieyi nuzolele? Ngiza kwa yeno yo lubamba+ yovo muna zola ye mwand’a lulembamu e?