Levitiku

19 Yave ovovese diaka Mose vo: 2 “Vovesa nkangu awonso wa Aneyisaele vo: ‘Nufwete kala nuavauka, kadi omono Yave wa Nzambi eno yavauka.+

3 “‘Konso muntu mu yeno kafwete zitisa ngudi andi yo se diandi,+ nufwete lundanga e lumbu yame ya vundu.+ Mono i Yave wa Nzambi eno. 4 Ke nuviluki kwa fwafwala ya nzambi ko,+ ke nuyivangila mpe nzambi za sengwa ko.+ Mono i Yave wa Nzambi eno.

5 “‘Avo se nutambika kimenga kia ungudi kwa Yave,+ nufwete kio tambikila mu mpila ikunusadisa mu vua e dienga dia Nzambi.+ 6 E kimenga kifwete diwa muna lumbu nutambika kio ye muna lumbu kilanda, kansi konso kina kisuva yamuna lumbu kina kiatatu kifwete yokwa vana tiya.+ 7 Kansi, avo e ndambu a kimenga idilu muna lumbu kiatatu, e mbizi yoyo ya kimenga ikitukidi se yangemi, ke itondakana ko kwa Nzambi. 8 O muntu odia yo otumbwa mu kuma kia bi wandi, kadi osafwidi e lekwa kiavauka kia Yave, o muntu ndioyo kafwete vondwa vana vena nkangu andi.

9 “‘Vava nukutika e mbongo a ntoto eno, kufwete kutika mbongo awonso ko ina muna nsuk’a mpatu aku ngatu nona ina isidi muna nkutik’aku.+ 10 Kufwete mpe kutika ko ina isidi muna mpatu aku a vinyu yovo nona uva zisotokele muna mpatu aku a vinyu. Ofwete zo sisa mu kuma kia nsukami*+ yo nzenza ozinganga yeno. Mono i Yave wa Nzambi eno.

11 “‘Ke nuyiyi ko,+ ke nuvunginika ko,+ ke nuvunaziani ko. 12 Ke nudie ndofi a luvunu ko muna nkumbu ame+ yo safula e nkumbu a Nzambi eno. Mono i Yave wa Nzambi eno. 13 Kuvunginika nkwaku ko,+ kuyiyi ko.+ Kusimbinina mfutu a nsadi ko fuku wawonso yamuna mene.+

14 “‘Kusibi fwa matu ko, kusie lekwa kitesesa sakuba ko vana ntwal’a mpofo;+ ofwete kala yo vumi wa Nzambi aku.+ Mono i Yave.

15 “‘Kufwete tekomona nzengo ko muna mfundis’aku. Kufwete songa nkenda kwa nsukami ko wau vo nsukami yovo lungisa o mvuama wau vo mvuama.+ Ofwete fundisila nkwaku muna unsongi.

16 “‘Kufwete kwenda oku y’oku ko vana vena o nkangu aku muna mwanganesa makumbu.+ Kufwete telamena moyo a* nkwaku ko.*+ Mono i Yave.

17 “‘Kufwete menga mpangi aku ko omo ntima aku.+ Kufwete yambula semba nkwaku ko,+ walembi kala e ntwadi muna sumu diandi.

18 “‘Kulandi wan’a nkangu aku kunda ko+ ngatu kubalundila makasi; ofwete zola o nkwaku wauna okuyizolelanga.+ Mono i Yave.

19 “‘Nufwete lunda e nkanikinu miame: Ke nufwete vukanesa bulu yole ko ya vata ya makanda maswaswana. Kufwete kuna mpila zole za mbongo ko muna mpatu aku,+ kufwete vuata mvuatu wavangilwa mu mpila zole ko za nsinga miasangalakana.+

20 “‘Avo mwan’ayakala ovukane yo nkento, o nkento kakala vo selo kiazitikilwa kwa muntu ankaka, kansi kakûlwa ko ngatu vewa luvevoko, yau awole bafwete tumbwa. Kansi, ke bafwete vondwa ko, kadi o nkento kavevuelo ntete ko. 21 O yakala otwasa lukau lwandi lwa kuzuka kwa Yave vana mwelo a saba kia wananina, meme dia koko se lukau lwa kuzuka.+ 22 O nganga osadila e meme dia koko dia lukau lwa kuzuka mu lomba luyambulwilu lwa masumu vana ndose a Yave mu kuma kia muntu, mu kuma kia sumu kavolele, ololokwa e sumu kavolele.

23 “‘Vava nukota muna nsi yo kuna konso nti uyimanga e bundu ya dia, kuna lubantiku nufwete badikila e bundu yandi vo yafunzuka ye yasimwa.* Mu mvu ntatu, e bundu ikala se yasimwa* kwa yeno. Ke ifwete diwa ko. 24 Kansi muna mvu una wa nyá, e bundu yandi yawonso ikituka se yavauka, ikala se ntangwa yakiese vana ndose a Yave.+ 25 Muna mvu una watanu, nulenda kweno dia e bundu yandi kimana nuawokesa e mbongo eno nukutika. Mono i Yave wa Nzambi eno.

26 “‘Ke nufwete dia konso lekwa ko kina yo menga.+

“‘Ke nufwete tá ngombo ko ngatu vanga mavangu ma nkisi.+

27 “‘Ke nufwete tenda* nsuki zeno ko muna kinzieta kia ntu, ke nufwete zenga nsuka za nzevo zeno ko.+

28 “‘Ke nulweki nitu zeno ko mu kuma kia muntu ofwidi,*+ ke nuyizengi nsamba ko. Mono i Yave.

29 “‘Kufunzula mwan’aku ankento ko muna kunkitula se nkembi,*+ kimana e nsi eno yalembi safulwa kwa akembi yo zala yo mambu mansoni.+

30 “‘Nufwete lunda e lumbu yame ya vundu+ yo zitisa* e nzo ame avauka. Mono i Yave.

31 “‘Ke nuendi kwa nganga za matombola ko,+ ke nuendi kwa nganga za ngombo ko,+ kimana balembi kunufunzula. Mono i Yave wa Nzambi eno.

32 “‘Ofwete telama vana vena nkwa mvu,*+ ofwete zitisa o nunu,+ ofwete kala yo vumi wa Nzambi aku.+ Mono i Yave.

33 “‘Avo nzenza ozinganga yeno omu nsi eno, ke nufwete kumbangika ko.+ 34 O nzenza ozinganga yeno nufwete kumbadikila nga mungutukila vovo nuina;+ nufwete kunzola wauna nukuyizolelanga, kadi oyeno mpe anzenza nuakala muna nsi ya Engipito.+ Mono i Yave wa Nzambi eno.

35 “‘Ke nufwete sadila tezelo ya luvunu ko muna teza o lá, zitu yovo lekwa ya nzonga.+ 36 Ofwete sadila balanza za ziku, tezelo ya mazitu ya ziku, tezelo ya lekwa yayuma ya ziku* ye tezelo ya lekwa ya maza-maza ya ziku.*+ Mono i Yave wa Nzambi eno, ona wanuvaikisa muna nsi ya Engipito. 37 Muna kuma kiaki, nufwete lundanga e nkanikinu miame miawonso ye nzengo zame za mfundisa zawonso, nufwete zo lemvokela.+ Mono i Yave.’”