Wanzole wa Ntinu

4 Nkento mosi muna akazi a wan’a ngunza,+ okazidi kwa Elesa, oku vo: “Nkaz’ame wa selo kiaku wafwa, otomene wo zaya vo selo kiaku Yave kavuminanga.+ Owau muntu ona twadia e mfuka wizidi kimana kabaka wan’ame wole bakala se abundu andi.” 2 Elesa umvovese vo: “Adieyi ndenda vanga mu kuma kiaku? Unzayisa, nki una kiau muna nzo?” Ovutwidi vo: “Selo kiaku kena ye lekwa ko muna nzo, mvungu a mazi kaka.”+ 3 Umvovese vo: “Wenda lomba mvungu miankatu kwa mfinangani zaku zawonso. Twasa miawonso olenda. 4 I bosi, kota muna nzo aku, ukizikidila mûna yo wan’aku. Zadisa mvungu miawonso ye mazi, mina miazala ye mazi sia mio vamosi.” 5 I bosi, okatukidi vana kena.

Vava kakikangidila muna nzo yo wan’andi, o wan’andi bayantikidi kumvana mvungu, ozadisi mio yo mazi.+ 6 Vava mvungu miazala, ovovele kwa mosi muna wan’andi vo: “Umpana mvungu wankaka.”+ Umvutwidi vo: “Kavena diaka mvungu ko.” Muna diadi, mazi mafokokele.+ 7 I bosi, wizidi dio zayisa kwa muntu a Nzambi aludi, Elesa ovovele vo: “Nda teka mazi wafuta mfuka aku, e nzimbu zisuva, i zina odia yo wan’aku.”

8 Lumbu kimosi Elesa wele kuna Suneme+ kuna kwakala nkento mosi watoma zitiswanga, o nkento undodokele vo kakota mûna kadia.+ Konso ntangwa Elesa kaviokelanga mu nzila yayina, wakotanga mûna yo dia. 9 O nkento ovovese nkaz’andi vo: “Nzeye wo vo muntu ndioyo oviokelanga kwaku, muntu avauka a Nzambi. 10 Dodokolo, yambula twavanga suku diakete vana nludi,+ twansila mo mfulu, meza, kunda ye zangikilwa kia mwinda. Konso ntangwa kekwiza kwaku, i mûna kelwakila.”+

11 Lumbu kimosi, vava kalwaka kûna, okotele muna suku dia ntandu kaleka. 12 Ovovese Ngekazi+ wa selo kiandi vo: “Bokela nkento ndioyo wa Nsuneme.”+ Umbokele, otelamene vana kena. 13 Elesa ovovese Ngekazi vo: “Umvovesa vo, ‘Mayingi ovangidi mu kuma kieto.+ Adieyi ozolele twavangila?+ Nga yamokena yo ntinu+ yovo kwa mfumu a makesa muna wete diaku?’” O nkento ovutwidi vo: “Ve, ngina kwame kiambote, kadi vakati kwa nkangu ame izingilanga.” 14 Elesa oyuvuidi vo: “Adieyi difwete vangwa mu kuma kiandi?” Ngekazi ovutwidi vo: “Kena ye mwana ko,+ o nkaz’andi se nunu kwandi.” 15 Vana vau, ovovele vo: “Umbokela.” Ngekazi umbokele, o nkento okotele yo telama vana mwelo. 16 Elesa ovovele vo: “Muna mvu ukwiza, muna nsungi yayi, olela mwana yakala.”+ Kansi, o nkento ovovele vo: “Ve, e mfumu ame wa muntu a Nzambi aludi! Kuvuni ntaudi aku ko.”

17 I bosi, nkento obakidi lukau, owutidi mwan’ayakala muna nsungi yayina, muna mvu walanda wauna Elesa kamvovesa. 18 Mwana okolele, lumbu kimosi wele tala se diandi kuna kakala ye akutiki a mbongo. 19 Ovovese se diandi vo: “Ekwe ntu ame, ekwe ntu ame!” O se diandi ovovese selo kiandi vo: “Unata kwa ngudi andi.” 20 Unete kwa ngudi andi, ovuende muna nkat’a ngudi andi yamuna midi, i bosi ofwidi.+ 21 Otombokele yandi kuna suku dia ntandu, unlekese vana mfulu a muntu a Nzambi aludi,+ okangidi kielo, ovaikidi. 22 Obokele nkaz’andi, umvovese vo: “Dodokolo, untwikila selo kimosi ye buluku, ungiambula ngienda mu nzaki kwa muntu a Nzambi aludi yo vutuka.” 23 Kansi, umvovese vo: “Ekuma okwenda kunkingulwila o unu? Ke nzangam’a ngonde ko+ ngatu lumbu kia vundu.” Umvutwidi vo: “Ke diambu ko.” 24 O nkento okubikidi e buluku, ovovese selo kiandi vo: “Diatisila mu nzaki. Kudiatisidi malembe ko mu kuma kiame, nanga vo yavovesa wo.”

25 Wele kwa muntu a Nzambi aludi kuna Mongo a Kamele. Vava muntu a Nzambi aludi kamwene kuna vala, ovovese Ngekazi wa selo kiandi vo: “Tala, nkento a Nsuneme. 26 Dododoko, tikuna kimana wankika, unyuvula vo: ‘Nga una kiambote? O nkaz’aku una kiambote? Mwan’aku una kiambote?’” Ovutwidi vo: “Kiambote.” 27 O nkento vava kalweke kwa muntu a Nzambi aludi vana mongo, unsimbidi mu malu mandi.+ Ngekazi ofinamene kankatula, kansi o muntu a Nzambi aludi ovovele vo: “Unyambula kadi mu ntantu kena,* Yave unswekele diambu diadi, kanzayisi dio ko.” 28 Nkento ovovele vo: “Nga mwana yalomba kwa mfumu ame? Nga kiavovesa ko vo, ‘Kumpani vuvu kia luvunu ko e’?”+

29 Vana vau, Elesa ovovese Ngekazi vo: “Kanga mvuatu aku muna luketo,+ nata nkau ame va koko kwaku, wenda. Avo owanane yo muntu, kunkayisi ko; ndiona okukayisa kuntambulwidi ko. Wenda sia nkau ame vana mpolo a mwana.” 30 Muna diadi, o ngudi a mwana ovovele vo: “Ndidi e ndofi muna Yave wa Nzambi amoyo, yamuna moyo aku vo kikusisa ko.”+ Elesa otelamene, wele yandi. 31 Ngekazi ubavitidi kuna ntwala, osidi nkau vana mpolo a mwana, kansi ke vakala sinsu kia moyo ko.+ Ovutukidi, wele kika Elesa, umvovese vo: “Mwana kasikamene ko.”

32 Elesa vava kakotele muna nzo, o mwana wafwa, walavalala vana mfulu andi.+ 33 Okotele muna suku, okangidi kielo, yau awole kaka bakala muna suku, Elesa oyantikidi samba kwa Yave.+ 34 I bosi, omente vana mfulu, olele vana ntandu a vimbu dia mwana. Osidi nu’andi vana nua a mwana, o meso mandi vana meso ma mwana, moko mandi vana moko ma mwana, olavalele kaka vana ntandu a mwana; i bosi, nitu a mwana iyantikidi yanduka.+ 35 Elesa oyantikidi kangala muna nzo kenda oku yo vutuka oku, omente vana mfulu, olavalele diaka vana ntandu a vimbu dia mwana. E kindende kitele nkesia nkumbu nsambwadi. I bosi, otemwene meso.+ 36 Elesa obokele Ngekazi, umvovese vo: “Bokela nkento a Nsuneme.” Umbokele, o nkento wizidi kwa yandi. Elesa ovovele vo: “Bonga mwan’aku.”+ 37 O nkento okotele muna suku, obwidi vana malu ma Elesa, umvumbamene, i bosi obongele mwand’andi yo vaika.

38 Vava Elesa kavutukidi kuna Ngilengale, mvengele wakala muna nsi.+ O wan’a ngunza+ bafongele vana kena, Elesa ovovese selo kiandi vo:+ “Teleka kinzu kianene vana ziku, lambila wan’a ngunza madia.” 39 Mosi muna yau wele kuna kiana kavela mvudi, osolwele nsinga wa mfinda yo vela bundu yandi, ozadisi yo muna mvuatu andi. Vava kavutukidi, ozengonuene yo, osidi yo muna kinzu lembi zaya kana nkia bundu yoyo. 40 I bosi, bavene mo kwa wantu badia, kansi vava badidi mo bakazidi, oku vo: “E muntu a Nzambi aludi, lufwa luna mu kinzu!” Ozevo, ke balendele mo dia ko. 41 Ubavovese vo: “Nuntwasila e mfumfu.” Vava katubidi yo muna kinzu, ovovele vo: “Nuvana mo kwa nkangu badia.” Muna kinzu ke mwakala diaka lekwa kiambi ko.+

42 Valweke muntu mosi otukidi kuna Bale-salesa,+ otwasidi muntu a Nzambi aludi mbolo 20+ zavangilwa muna mbongo antete ya bale yabwaka ye nsaku a mbwaza zampa.+ I bosi, Elesa ovovele vo: “Vana zo kwa nkangu badia.” 43 Kansi, e selo kiandi unyuvuidi vo: “Aweyi idikila wantu 100 muna mbolo zazi?”+ Elesa umvutwidi vo: “Vana zo kwa nkangu badia, kadi i wau wuwu kavovele o Yave, ‘Dia bedia, yo sisa zo.’”+ 44 Muna diadi, ovene zo kwa nkangu, badidi, e mbolo zisuvidi+ mun’owu wa diambu dia Yave.